山地

好高嘅山地

山地，山所載之地咁意，同平地相對。故此山地斜，起起伏伏。尤其話山勢延綿，又或山高一帶。然而以海拔計，幾高先叫山地，各有所謂，二百米又有，五百米又有，一千米又有，唔能一概而論，無一貫講法。

山地一名，由來已久，戰國時管子有寫，「山地者山也、水地者澤也。薪芻之所生者斥也。」可見古時山地視為貧瘠之地，得柴同草，糧產少。就算開墾成田，都好難同平地比。

山地因地殼變動而來，如板塊相撞，邊緣摺曲拱起甚至斷裂，或重重火山造成山脈。經日曬風霜雨雪之蝕，涌江鑿、冰川推，淨低硬淨耐蝕，仍殘餘相當部份，就成山地。

山地有高有低，有分類二千米以上叫高，一千米咁上下叫中，五百米下叫低。生物學講分佈，山地就以一千米以上為界。

山地亦會同高地相混。高地本義，只不過比對地高低，即高過低地咁意。歐洲按其史，常見一國之內分高低地。如蘇格蘭分高低地，如今荷蘭、比利時為中世紀舊國低地。高唔一定山地。有啲遠古時本為平地，因有斷裂，或一邊升高，或一邊降低。故此高一邊唔一定山多。種種學科亦有佢定義，無一貫分法。

嶺南興葬先人喺山，以避水浸，所以先人之墓亦叫山地。