巴郡
想搵美國公司嘅話，請睇巴郡哈薩威。巴郡係舊時中國（戰國時期至到隋代）嘅一個郡，喺而家重慶市同四川省東部。
史
[編輯]戰國時期，秦國滅巴國。秦惠文王更元十一年（西元前314年）置巴郡。
西漢巴郡隸屬益州，管轄江州、臨江、枳、閬中、墊江、朐忍、安漢、宕渠、魚復、充國、涪陵，夾埋11個縣。西漢末年統計，巴郡有158,643戶人家、708,148人[1]。東漢巴郡管轄江州、宕渠、朐忍、閬中、魚復、臨江、枳、涪陵、墊江、安漢、平都、充國、宣漢、漢昌，夾埋14個縣[2]。興平元年（194年），益州牧劉璋接受趙穎建議，將巴郡分成三份，江州到臨江設永寧郡，朐忍到魚復設固陵郡，巴郡管墊江北邊嘅地區。到咗建安六年（201年），永寧郡改名叫巴郡，原巴郡改名叫巴西郡，固陵郡改名叫巴東郡[3]。
晉朝泰始元年（265年），巴郡改隸益州下越雋郡。永寧元年（301年），李特佔據巴蜀作反，後來建立成漢政權。永和三年（347年），桓溫平定巴蜀，巴郡隸屬梁州，管轄江州、墊江、臨江、枳，夾埋4個縣[4]。南朝宋，巴郡隸益州。泰始五年（469年）喺巴郡置三巴校尉。南齊建元二年（480年）置巴州，原來屬益州嘅巴郡改隸巴州，管轄巴東、建平、巴郡三個郡。永明元年（483年），廢巴州，巴郡復隸益州[5]。南梁太清四年（550年），蕭紀喺巴郡置楚州。天正元年（551年），西魏攻落楚州，改名叫巴州。北周閔帝元年（557年），將巴州改返做楚州。武成三年（561年），又將墊江改成巴縣。
隋開皇三年（583年），郡制廢除，巴郡改名渝州。大業三年（607年），州制廢除，改成郡制，復名巴郡，管轄巴、江津、涪陵呢3個縣[6]。唐武德元年（618年），郡制廢除，巴郡改名渝州。