廣州市第15中學
| 廣州市第15中學 Guangzhou No. 15 Middle School | |
|---|---|
| 位置 | |
| 大概德政北路同中山四路嘅交界東北角 | |
| 明細 | |
| 成立 | 大清光緒廿九年（1903年） |
| 停辦 | 1969年春 |
| 校區 | 越秀區 |
| 級別 | 中學六年全日制 |
廣州市第15中學係廣州市一間冇咗嘅全日制中學，大清光緒廿九年（1903年）成立，1969年春停辦，位置大概喺而家嘅越秀區德政北路同中山四路嘅交界東北角（而家廣州少年兒童圖書館嘅所在地）。
史
[編輯]呢間學校初期時從番禺學宮演變而來。喺大清光緒廿九年（1903年）受到廢除科舉制度政策影響，令學宮開始轉型，變成間學校，名亦變成番禺官立高等小學堂。但6年後改辦成番禺官立初級師範學堂長達3年，又改辦成番禺縣立師範學校。15年後又改辦成番禺旅市師範學校。1929年加開中學部而成為完全中學機構。1932年因為番禺縣政府搬到新造鄉（而家係番禺區新造鎮），番禺旅市師範學校亦搬埋出廣州，原址改成辦私立禺山中學。變成禺山中學後，雖然喺1936年成為廣州市内規模比較大嘅中學之一，但兩年後因為日軍侵華，廣州淪陷，學校被迫搬到香港同八桂中學合辦，期間一直用緊禺山八桂聯合中學個名，直到1946年日軍投降為止。日軍投降後，學校搬返去舊時嘅德政北路同中山四路嘅交界東北角繼續開辦[1]。
1949年10月14號，學校同嗰時嘅嶺嶠、中德、八桂、開越呢四間中學合併而改名做廣州市八桂中學。4年後因受到私人機構轉為公辦機構嘅規定影響，學校改名做廣州市第15中學，持續咗13年時間。1969年初春受到文革破四舊影響，加上嗰時農講所搞擴建工程，令學校連同中山四路小學一齊，一夜消失到無影無蹤[2]。
後續
[編輯]學校停辦之後，一大堆嗰時讀緊書啲學生同教書啲先生集體搬到14中入面繼續上堂。而原址隨後演變成農講所嘅一部分，部份教學樓亦演變成民宅同幼稚園機構，而圖書館大樓變成廣州圖書館一部份直到2013年4月1號停用為止[2]。從2015年3月1號開始，圖書館大樓改成辦少年兒童圖書館用途[3]。
