廣州戰役 (國共內戰)

廣州戰役（粵拼：gwong2 zau1 zin3 jik6），中國大陸官方叫廣州解放（粵拼：gwong2 zau1 gaai2 fong3），係第二次國共內戰入面，廣東爆發嘅戰爭事件。

背景

1949年4月，中國人民解放軍過咗長江兼攻陷南京之後，國民黨喺中國大陸嘅統治基本上係四面楚歌，剩低啲政府集團走到廣州避難嚟抵抗共產黨。喺廣東駐守嘅國民黨有3個兵團，夾埋15萬人。嗰時中國國民黨國防部畀余漢謀嘅指令係「鞏固粵北確保廣州」。而中共中央搵葉劍英做華南分局第一書記，而張雲逸同方方分別做咗第二同第三書記，仲確定咗進攻廣東嘅作戰方案同埋接手廣東等重大問題。

經過

1949年9月底，廣州地區仲喺國民黨控制之下，解放軍第四野戰軍團嘅三個軍隊，跟住粵漢路兩邊南下先霸韶關，再霸廣州；第十五兵團嘅兩個軍隊，先經翁源、從化等地南下到廣州包圍國民黨；兩廣縱隊組織廣東地方部隊由和平、龍川等地向東殺到東莞，唔畀敵人再向南走佬。

同年9月22號，人民解放軍跨過粵北五嶺，隨後無耐大規模殺到廣東一帶。同年10月2號爆發廣東戰役，人民解放軍開始兵分三路，霸咗清遠、花縣（今日嘅花都區）、從化、增城、博羅等地，形成三面環軍，一面環海嘅姿態。

由於嗰時國民黨意識到鬥唔過人民解放軍，令國民軍出手無策，人民解放軍最後大獲全勝，嗰時行政院長閻錫山走到臺灣避難，代理總統李宗仁揸飛機飛到重慶，余漢謀向西江一帶走佬。期間國民軍隊試過炸海珠橋。

結果

經過半個月嘅戰鬥，1949年10月14號18:30（UTC+8），第十五兵團先頭部隊從廣州北郊殺到廣州市區。原先向西南走佬嘅敵人，冚唪唥主力喺陽江一帶被殺。當晚喺愛羣大酒店掛咗「中國人民站起來了！」嘅字樣。

同年10月24號，廣州市區成立咗中國共產黨廣州市委，4日後成立廣州市人民政府。期間葉劍英擔任第一任書記同第一任廣州市長。

同年11月11號，喺廣州街頭搞咗一系列嘅慶祝「廣州解放」嘅活動。

連出去