張志和

出自維基百科,自由嘅百科全書
Jump to navigation Jump to search
張志和
子同
煙波釣徒、玄真子
原名張龜齡
出世732年農曆正月初一(?)
長安
774年農曆十二月(?)
死因浸水
國籍大唐
籍貫婺州(而家浙江金華
知名作品《漁父》詞五首
宗教信仰道教

張志和粵拼zoeng1 zi3 wo4;730年?—810年?),字子同zi2 tung4),本名龜齡gwai1 ling4),中國唐代婺州人(而家浙江金華),自號煙波釣徒jin1 bo1 diu3 tou4),道號玄真子jyun4 zan1 zi2),係唐代有名嘅道士、詞人、詩人。

張志和嘅老豆係張游朝,通曉《莊子》、《列子》,曾經做過《象罔》、《白馬證》嘅註說。受老豆影響,張志和喺官場失意後傾向咗道家,成爲道教學者兼道士。而佢老母生佢時發咗個夢,夢見楓樹喺佢肚上生,之後就生咗佢出來。

佢博學能文,善於畫山水畫,酒量了得,有時醉咗酒會演奏鼓、笛。虛歲十六歲時就明經及第,畀唐肅宗面見,並且直接同皇帝獻策,佢嘅名「志和」就係皇帝賜嘅。佢先後擔任翰林待詔、左金吾衛錄事參軍。後來佢獲罪被貶做南浦尉,於是佢對官場失望。佢嘅性格唔受拘束,所以雖然後來卸還返,但佢以屋企居喪爲由棄官,開始浪跡江湖,遊玩天下山水,喺祁門赤山鎮隱居,自號「煙波釣徒」,意思係「喺煙波之中嘅漁夫」,佢經常望落似釣魚,但魚鉤無魚引,就係仿照姜太公釣魚噉。後來佢阿哥張鶴齡驚佢就噉唔見咗人,喺越州(而家紹興)城東搭咗間茅屋畀佢住。

佢留低幾多軼事。唐肅宗賜佢一奴一婢,佢幫佢哋起名做漁童、樵青,並且畀佢哋兩個結婚。雖然係名人,但縣令要佢做浚渠嘅徭役都照做。對屋企人亦冇架子,曾經想用塊大布整裘,佢阿嫂幫佢織好,於是佢着上身,即使天時熱都唔除。觀察使陳少遊經常探佢,留咗好耐,幫佢間屋起名做玄真坊;因爲門口太窄,幫佢買地整大個門巷,起名做回軒巷,又爲佢搭橋,啲人起名做大夫橋。陸羽問佢:「有咩人同你來往呢?」佢答話:「宇宙(太虛)係我住嘅房,明月係我支燭,同四海嘅各位一齊相處,未曾離開過,噉有咩所謂來唔來往呢?」

作爲道教學者,佢留低咗《玄真子》呢本書,另外又寫咗十五篇嘅《太易》,共三百六十五卦。另外佢亦係有名嘅詞人,佢所填嘅五首《漁父》詞流傳至今,引起衆多文人和作,後來傳去日本,連嵯峨天皇亦跟住和作,成爲日本填詞嘅開山之作。之後佢嘅詞成爲《漁歌子》呢個詞牌嘅定格。佢興趣高遠,常人及唔上佢,唐憲宗曾經求佢嘅詞而不得。李德裕評佢話:「漁父係賢人但無名聲,鴟夷有智慧而功績高。但都唔似張志和,佢雖然隱居但有名,即使有名而無事煩住,既唔窮,亦唔富貴,實在比得上嚴光。」(隱而有名,顯而無事,不窮不達,嚴光之比)

張志和同顏真卿本來係老友,同陸羽一樣係佢嘅門客。後來顏真卿做湖州刺史時,同門客宴飲,唱和嘅詞就係張志和嘅《漁父》,唱和咗二十幾首,張志和爲呢啲詞作畫,啲人都讚歎啲畫。有次張志和探顏真卿,顏真卿有部船穿咗,想補返佢,張志和就話:「想攞部船當做屋企(浮家泛宅),喺苕、霅一帶遊蕩就夠嘑。」

最後佢哋一齊去湖州平望驛嘅鶯脰湖玩,張志和飲醉咗酒,話要爲啲人表演水上遊戲,結果浸親過世。按道教《續仙傳》嘅講法,就話佢嘅坐席鋪喺水上唔沈,坐喺上面好似行船噉,之後飛來一班白鶴圍住佢叫,張志和同顏真卿擺手表示謝意後就同白鶴飛天成仙。

參攷資料[編輯]

  • 沈汾. "卷上:玄真子傳". 《續仙傳》. 中國哲學書電子化計劃.
  • 歐陽脩、宋祁. "列傳第一百二十一:隱逸傳 — 張志和傳". 《新唐書》.
  • 辛文房. "卷三:張志和傳". 《唐才子傳》.