張祺忠

出自維基百科,自由嘅百科全書
跳去導覽 跳去搵嘢

張祺忠(Cheung Kie-chung,1963或1964年—),香港大學機械工程學系前副教授,曾經係工程學院副院長[1]偉倫堂宿舍舍監。

早年經歷[編輯]

佢喺香港土生土長,讀完中學之後去咗英國,先後攞到英國伯明翰大學學士、威爾斯大學博士學位,然後1992年返香港加入香港大學工程學院[1]

佢喺香港大學工程學院擔任過一啲行政工作,曾經做過助理院長,之後做埋副院長。任內佢亦曾經推動香港大學同劍橋大學嘅聯合課程[2]

殺妻案[編輯]

喺2018年8月,張祺忠喺偉倫堂宿舍內勒死自己老婆陳慧文,之後一度陪個女到警署報警,甚至同差人同埋家人一齊尋妻,但係差人最後喺佢喺港大嘅辦公室,搵番佢老婆嘅屍體。

案件去到2020年開審,佢否認謀殺罪,但承認誤殺罪,未被控方接納。另外,佢亦承認一項阻止合法埋葬罪[3]

審訊嗰陣,案件受到廣泛報道。青山醫院法醫精神科部門主管蕭慧敏,同埋精神科醫生何美怡,都喺作供嘅時候,話張祺忠喺案發嘅時候患有抑鬱。其中何美怡更指張患有嚴重抑鬱症,而且佢嘅精神狀況自2013年起已轉差,2018年情況更嚴重。臨床心理學家鄭健榮就話,陳慧文對張嘅語言暴力,已達致中等至嚴重程度嘅心理虐待[3]

另外,雖然張祺忠作供嗰陣對老婆生前嘅性格有正面評價,但係案件其他證人都話陳慧文唔易相處。其中陳慧文嘅細妹,就話死者經常對自己老公指指點點,有作供嘅偉倫堂宿舍職員稱呼死者做「天拿水」,形容如果有人逆佢意,佢會「一撻就着」。另外,有一個星展銀行嘅經理作供時候亦形容死者霸道[3]

張祺忠喺2020年11月被判謀殺罪成,12月3號被判終身監禁。

參考[編輯]

  1. 1.0 1.1 中時新聞網. "殺妻藏屍辦公室11天 港大副教授被以謀殺起訴 - 兩岸". 中時新聞網 (中文). 喺2020-11-28搵到.
  2. "港大-劍橋 合推5年3證書招生計劃". 大紀元時報 香港|獨立敢言的良心媒體 (中文). 喺2020-11-28搵到.
  3. 3.0 3.1 3.2 朱棨新 (2020-11-26). "張祺忠涉殺妻|啞忍妻語言暴力多年終殺妻 張被裁定謀殺罪成". 香港01 (中文). 喺2020-11-28搵到.