張祺忠

張祺忠（Cheung Kie-chung，1964年—），香港大學機械工程學系前副教授，曾經係工程學院副院長，偉倫堂宿舍舍監。

早年經歷

佢喺香港土生土長，讀完中學之後去咗英國，先後攞到英國伯明翰大學學士、威爾斯大學博士學位，然後1992年返香港加入香港大學工程學院。

佢喺香港大學工程學院擔任過一啲行政工作，曾經做過助理院長，之後做埋副院長。任內佢亦曾經推動香港大學同劍橋大學嘅聯合課程。

殺妻案

喺2018年8月，張祺忠喺偉倫堂宿舍內勒死自己老婆陳慧文，之後一度陪個女到警署報警，甚至同差人同埋家人一齊尋妻，但係差人最後喺佢喺港大嘅辦公室，搵番佢老婆嘅屍體。

案件去到2020年開審，佢否認謀殺罪，但承認誤殺罪，未被控方接納。另外，佢亦承認一項阻止合法埋葬罪。

審訊嗰陣，案件受到廣泛報道。青山醫院法醫精神科部門主管蕭慧敏，同埋精神科醫生何美怡，都喺作供嘅時候，話張祺忠喺案發嘅時候患有抑鬱。其中何美怡更指張患有嚴重抑鬱症，而且佢嘅精神狀況自2013年起已轉差，2018年情況更嚴重。臨床心理學家鄭健榮就話，陳慧文對張嘅語言暴力，已達致中等至嚴重程度嘅心理虐待。

另外，雖然張祺忠作供嗰陣對老婆生前嘅性格有正面評價，但係案件其他證人都話陳慧文唔易相處。其中陳慧文嘅細妹，就話死者經常對自己老公指指點點，有作供嘅偉倫堂宿舍職員稱呼死者做「天拿水」，形容如果有人逆佢意，佢會「一撻就着」。另外，有一個星展銀行嘅經理作供時候亦形容死者霸道。

張祺忠喺2020年11月被判謀殺罪成，12月3號被判終身監禁。