張織雲
張織雲（1904年—1963年11月2號），原名張阿善（阿喜），係中國電影女演員。佢係廣東番禺人，細個搬上海住。1920年代，佢係中國第一代女明星之一，亦係第一位中國影后。
電影皇后
[編輯]張織雲細細個嘅時候，阿爸過身，屋企艱難，中學未畢業就輟學，生活由養母支持。
1924年初，顧肯夫、陸潔、卜萬蒼等人創辦大中華影片公司，登報紙招演員，借申報館信箱來收件。10日後，電影公司開箱檢驗，收到萬幾張女子相片，但係冇一位啱心水。有人呢下話俾電影公司知，報館某記者自己開過信箱，揀咗啲靚相走。顧肯夫交涉，記者交返10張出來，其中一張即係張織雲倩影。張其實唔係特別靚，不過因此受到重視，錄用之後入學校培訓。佢做咗無聲片《人心》、《戰功》嘅女主角。1925年轉入明星影片公司，主演《可憐的閨女》、《新人的家庭》、《空谷蘭》等。1926年，上海新世界遊藝場選「電影皇后」。喺12位入選女演員之中，張攞到2146票而當選，成為中國第一位電影皇后。
1927年，張同有錢佬唐季珊去美國結婚，後被抛棄。1934年，佢同周孝伯同居，立下婚約。3個月後佢因為周出軌而告上法庭，卒之解除婚約。
1933年，明星影片公司以佢嘅遭遇拍攝《失戀》，由佢本人主演。
淡出影壇
[編輯]1934年張織雲南下香港，同一位蔡醫生相交，生咗一個女。[1]1935年參演有聲片《新桃花扇》。1937年參加拍攝粵語片《天之驕女》。
二戰結束後，張生活幾落拓。佢個女1952年喺香港嫁畀中區一間五金舖老細個仔，親家有時接濟佢。1953年12月，時年48歲嘅張織雲喺香港嫁畀52歲嘅張永明[2]。
1963年11月2號，張織雲喺香港病逝[1]。