形聲

東漢學者許慎嘅畫像；佢所寫嘅《說文解字》一書，提到六書嘅概念，好多後世學者都會參考。

形聲（粵音：jing4 sing1）係六書裡便其中一種構成中文字（又叫漢字）嘅方法，由表達意思嘅形符同表達讀音嘅聲符夾埋一齊。東漢學者許慎喺佢本著作《說文解字》當中係噉嚟描述形聲嘅：

「形聲者，以事為名，取譬相成，江、河是也。」

一個形聲字有兩個主要部分，就係形符（又叫意符、義符等）同埋聲符。形符可以理解成係表示個中文字「意思上面係屬於邊類」而聲符就大概表示個中文字點樣讀。聲符嘅讀音通常都唔會同成個中文字嘅讀音一模一樣，但係會好相似，可能淨係差一個聲母、韻母或者聲調咁多。

唔係所有聲符都單純聲符，有時聲符先至意義所在。好似晴字，青字反而意思所在，指天青，日字後尾加上去別義，唔係靠形聲造出來。又如雲字，本字云，雨字後尾加上，唔能講成靠形聲造出來。有聲符並唔意味形聲構字。

語言學家王力，編寫同源字典，就指出一啲近音字可能同源，音有意思。如狗字，貌似聲符無意思，實情句字同佢異字勾字，會指一啲細嘢，曲嘢。「小犬爲狗，小熊、小虎爲豿，小馬爲駒，小羊爲羔。」句勾反映喺曲義，有鉤，有枸，有軥，有笱，有拘，有痀，有朐。睇落無乜意義聲符，實情意符來，有意義，並非形聲構字。

驟見望落以為好多形聲構字，亦未必真正形聲。

字例：傳統漢字

以下係形聲字嘅一啲例子，讀音一律以粵語作準：

漢字	形符	聲符	解釋
媽	女	馬	阿媽係女人，所以形符係女，而喺漢語，媽（maa1）發音一般近似馬（maa4）。
情	心（忄）	青	講得情感，定必同心有關，所以形符係心，而喺漢語，情感個情（cing4）發音一般近似青（cing1/ceng1）。
江	水（氵）	工	江係大水體，所以形符係水，而喺漢語，江（gong1）發音一般近似工（gung1）。
港	水（氵）	巷	海港近水，所以形符係水，而喺漢語，港（gong2）發音一般近似巷（hong2）。
澳	水（氵）	奧	澳一字讀做 ou3 嘅話原意係指港灣可泊船之處，所以形符係水，而喺漢語，澳發音一般近似奧（ou3）。
拍	手（扌）	白	拍打係用手做嘅動作，所以形符係剔手邊，而喺漢語，拍打個拍（paak3）發音一般近似白（baak6）。
蝴	蟲（虫）	胡	蝴蝶係昆蟲，所以形符係虫，而喺漢語，蝴（wu4）發音一般近似胡（wu4）。
菜	⾋（艹）	采	菜係種出嚟嘅，所以形符係草花頭，而喺漢語，蔬菜個菜（coi3）發音一般近似采（coi2）。
踩	足	采	踩依個動作，係用腳做嘅，所以從足部，而喺漢語，踩（caai2）發音一般近似采（coi2）。
鯨	魚	京	鯨魚望落似魚噉形而且住喺水中，所以形符係魚，而喺漢語，鯨（king4）發音一般近似京（ging1）。

字例：粵語用字

睇埋：粵字

粵字係專門用嚟寫粵語嘅中文字。粵字好有歷史，會用到好多古老嘅中文字，例如睇（現代粵語讀音同體）一字，就可見於春秋時期嘅《楚辭》，而諗一字就可以追溯至《詩經》咁久遠。

除咗依啲古字，粵字亦包含咗唔少新造字。新造字出現可以有好多成因，可能係古字失傳，又或者係自然嘅語言演變引致新嘅口語字詞出現，所以要造新字嚟寫，譬如𨋢字就係依種情況。粵語群體造親新字，普遍都係跟從六書建構嘅，當中形聲字就佔咗好大一部份，譬如係：

粵字	形符	聲符	解釋
劏	刀（⺉）	當	劏（tong1）嘢係用刀做嘅，所以形符作刀，而個口語字詞同當（dong1*3）發音相近，所以當就做聲符。
掟	手（扌）	定	掟（deng3）嘢係要用手嚟做嘅，所以形符係手，定（ding6）個讀音同隻口語字詞有啲接近，做聲符。
煲	火	保	煲（bou1）嘢要用到火，所以用火做形符，而保（bou2）就擬口語字詞嘅音。
瞓	目	訓	瞓（fan3）指瞓覺，係一種要閉目嘅活動，所以用目做形符，而訓（fan3）就擬口語字詞嘅音。
脷	肉（⺼）	利	脷係用肉造嘅，所以形符係肉，而個口語字詞（lei6）同利（lei6）發音相近，所以用利做聲符。
踎	足	否	踎低（mau1 dai1）係用雙髀做嘅動作，所以形符係足，否（fau2）個讀音同隻口語字詞有啲接近，做聲符。
𨋢	車	立	依隻粵字（讀音 lip1）源自廿世紀，指一種機械，個名借自英文 lift。因為依種機械係用嚟載人郁動嘅，所以形符係車，而其讀音有少少似立（laap6），所以就用立做聲符。

此外，亦可以睇吓粵語字裡便嗰一大拃從口字部嘅字，譬如係嘅、啲、嗰、啱、嗮等對語法嚟講不可或缺嘅字。依啲字「係寫緊口語」所以從口，而口旁邊加一個讀音有返咁上下接近嘅聲符。依啲字都可以算係形聲字。

構造分析

形聲字又可以按構造分類，即係考慮形符同聲符嘅位置點擺。

形符擺左，聲符擺右：好多

		聲符
		右	可	申
形符	亻	佑	何	伸
	口		呵	呻
	礻	祐		神

形符擺左，聲符擺右：相當多

		聲符
		工	交	吉
形符	力		効
	攵	攻	效
	頁	項		頡

除咗左右之外，形符同聲符仲可以分上下擺（例如宇、草、雲、想、斧等）或者分內外擺（例如園、閥等），當中分內外嘅形聲字，通常形符喺外，但係都有例外，譬如係聞一字。

對比會意

内文：會意

形聲同會意嘅共同點就係，兩種都係將比較簡單基本嘅中文字，組合成更複雜嘅中文字。兩者嘅分別係，形聲字揀聲符嘅時候只係睇佢點讀，完全唔理佢嘅意思。好似鯨魚嘅鯨噉，鯨魚同京（即係首都，古時亦有用嚟指高聳嘅建築物）喺意思上完全冇瓜葛，創字嘅人用京字嘅時候純粹係為咗攞佢讀音。

形聲同會意有時都幾難分別。好多睇落好似形聲字嘅中文字，個聲符都可以兼做形符。好似趾字噉，解作腳趾，有足部，而腳趾個趾粵讀同止一樣係 zi2 。但係噉唔代表止一定淨係做聲部：止字喺甲骨文寫做止，個形狀俾人話係好似腳趾，所以止喺趾字入面可能都係兼做緊形符。跟據呢個講法，趾字其實係會意字。亦有人話，趾字係既形聲又會意嘅字。

起源推測

睇埋：假借同定符

有關形聲字嘅起源，上海出身嘅學者裘kau4錫圭提倡，話形聲字可能源自假借。裘錫圭係噉講嘅：

最早嘅形聲字唔係直接用意符同音符砌成，而係透過假借上面加個意符落去，或者喺表意字上面加音符而產生嘅。就算係等到形聲字大量出現，直接用意符同音符砌成形聲字嘅情況都唔係好多。好似清朝末年國人為咗翻譯西方嘅自然科學著作，要應對化學方面嘅一啲專業詞彙，而造出鋅、鐳、鈾等嘅中文字，依然唔係好常見嘅狀況。

可以睇睇漢語喺廿世紀點樣為化學元素畀中文字名。

亦可以睇吓文字學上講到嘅定符概念。

睇埋

• 六書
• 會意
• 定符：文字學上一個概念，如果話某個符號係一個定符，意思係話依個符號屬於形意符號，用嚟加喺某個符號側邊，標示個符號語義上屬於咩類型，防止寫低嗰句嘢有歧義；形聲漢字用到嘅形符就成日被指係定符嘅一種形式。
• 語義同語音：為口語字詞創造形聲字嗰陣，要同時考慮晒依兩樣嘢。