德國級戰列艦
德國級戰列艦或者叫做德意誌級戰列艦[a]（德文：Linienschiff der Deutschland-Klasse）係喺德意志帝國海軍開始起無畏艦之前，最後一批戰艦嘅船級。
成員
[編輯]呢種船級總共有5隻船：德國號、漢諾威號、波美拉尼亞號、西裏西亞號、同埋石勒蘇益格-荷爾斯泰因號。
歷史
[編輯]推出
[編輯]呢啲艦只係喺1903年至1907年期間起，而佢哋就同之前嘅級數“布倫瑞克級”好類似。唯一嘅分別，就係德國級戰列艦有更加強嘅裝甲嚟防護，而副炮亦都有重新布置過。
因為呢啲船好遲先起，到起好嘅時候，英國已經推出咗最新嘅無畏艦，令呢5隻船都未用過就已經out哂。不過，德國依然繼續有用，只係用啲比較輔助性質嘅用途，例如同海軍人員做訓練。
一次大戰
[編輯]當一次大戰喺1914年7月爆發之後，德國級嘅呢5隻船，用咗嚟對英國嘅海岸做突襲戰略。到1916年5月31號—6月1號，日德蘭海戰去到最高潮，呢5隻船都一齊做緊唔同嘅行動。雖然佢哋比唔起英國嘅無畏艦，但係仍然都會有啲功效，包括保護德國自己嘅巡洋艦。
喺其中一次夜晚嘅行動期間，波美拉尼亞號喺混亂之中，畀英國嘅一隻驅逐艦射咗魚雷沈咗。打完之後，其餘嗰4隻船調出咗前綫，做比較安全嘅工作。到德國輸咗之後，佢哋簽嘅《凡爾賽條約》只係容許德國留啲舊式嘅戰艦咁大把，但係就包括埋呢四隻德國級嘅船。
戰後
[編輯]德國號到1920－1922年之間完全拆解，但係好多其他嘅類似船種就有繼續用，主要係用嚟做訓練同演習。
漢諾威號喺1931年退役，原本打算會改造成為一隻靶艦，但從冇做到，最終喺1944－1946年期間拆埋。西裏西亞號同石勒蘇益格-荷爾斯泰因號，就喺1930年代做咗威瑪共和國嘅海軍嘅訓練船。呢兩隻船到二次大戰嘅時候，都會做啲低級嘅行動，包括入侵波蘭、丹麥、同埋挪威等等，但係到打完仗之前都已經沉哂。