抑鬱症

  提示：呢篇文講嘅唔係憂鬱。

呢幅油畫由梵高所畫，描述想像中嘅抑鬱症。

抑鬱症（參見英文：major depressive disorder，MDD），又叫憂鬱症，係種心理病，病人會覺得情緒好低落，好唔開心，好無助，難集中精神，會令食慾同睡眠時間明顯上升或下降，影響日常生活，甚至會有自殺傾向。

成因

據講呢種病症嘅成因係由遺傳、環境同心理因素多方面綜合而成嘅。風險因素包括家族病史、某啲藥物、藥物濫用、慢性健康問題同生活中嘅重大轉變等等。研究顯示約莫有 40% 風險因素同遺傳有關。診斷主要靠病人講出自己嘅經歷，同進行精神狀態檢查所得嘅結果；目前未有驗血或化驗可以直接確診，但可以透過測驗排除其他相似疾病。重度憂鬱唔同普通嘅悲傷，佢更加深更加長。美國預防服務工作小組（USPSTF）建議凡 12 歲或以上人士都做憂鬱症篩檢；不過考科藍合作組織嘅系統綜合評估指出，常規嘅篩檢問卷對發現同治療呢種病幾乎冇幫助咁滯。

亦有心理學家用習得型無助呢個概念嚟解釋抑鬱症。習得型無助呢個概念講緊噉嘅現象：當一隻動物，佢一而再再而三噉受到一個懲罰型嘅刺激，而且無論佢做啲乜到避唔開呢個刺激，隻動物通常會變得消極，唔再嘗試做任何嘢嚟避開個刺激；譬如家吓有隻狗，佢俾研究員擺喺一間房入面，房嘅地板定時定候會過電電佢，每次將會有電嗰陣都會有盞燈閃；同時間房有道門，道門鎖咗，隻狗點郁都走唔甩；過咗一段時間後，盞燈閃嗰陣隻狗會淨係企喺度唔郁，等受電嘅痛楚－隻狗「學識」進入「無助」嘅狀態；而且進一步嘅研究仲發現，隻動物進入咗習得型無助之後，就算下次俾佢有機會避開個刺激佢都會冇動力去行動（無助後，隻狗下次盞燈閃嗰陣就算道門大開，佢都會照樣企喺度唔郁等受電嘅痛楚）變到好似冇晒心機做任何嘢噉。

習得型失助嘅概念對精神醫學等嘅領域嚟講相當有用：有心理學家指出，習得型失助同某啲心理病嘅徵狀好相似，例如抑鬱症或者物質濫用等嘅現象，往往涉及個病人喺重複噉遇到一啲令佢哋覺得無力嘅事之後，放棄解決問題，改為做一啲幫唔到手解決問題嘅行為（好似係靠吸毒同飲酒等嘅方法嚟逃避）。

將隻狗擺入去實驗盒入面電佢嘅圖解；假如佢著住件緊嘅衫，令佢難以跳去安全地帶，佢通常會進入習得型失助嘅狀態。

處理

一般治療方法包括對患者進行心理諮商同提供抗憂鬱藥。藥物喺重度患者身上特別有效，但對於呢啲藥係咪能夠減低自殺風險，學界仍未有定論。常用嘅心理療法包括認知行為療法（CBT）同人際取向心理治療。若果其他方式都冇效，就可以考慮電痙攣療法。如果患者有自殘嘅風險，住院甚至強制送醫有時都係必要措施。

重度憂鬱發作就算冇治療都有可能自然舒緩，要幾耐就因人而異。門診病人喺排期等候期間，大約有 10–15% 症狀舒緩，當中大約 20% 唔再符合診斷條件。而一次症狀發作期間中位數大約為 23 星期，三個月內嘅康復機率最高。2013 年嘅一篇綜述文顯示，輕度至中度未治療成人患者中，23% 會喺 3 個月內康復，32% 會喺 6 個月內康復，而 53% 會喺一年內恢復

流行病學

2015 年，全球約有 2.16 億人患有重度憂鬱症，佔世界人口約 3%。而終身患病率喺唔同國家地區可以爭好遠—由日本嘅約 7% 到法國嘅約 21%；已開發國家平均約 15%，開發中國家約係 11%。憂鬱症係第二大嘅健康生命損失年來源，僅次於下背痛。

發病高峰為二十至三十幾歲，女性患者比例大約係男性嘅兩倍。1980 年，美國精神醫學會喺 DSM‑III 首次將嗰陣仍屬於《神經症》範圍內嘅此症，單獨列為一個診斷類別；喺 DSM‑II 時期，呢一組病症曾包括持續性抑鬱症、適應障礙症。患病初期或有病歷者，往往會受到社會上嘅汙名化。

工作能力

憂鬱症可能會影響人嘅工作能力。結合臨床照顧同返工支援（例如減少工時或調整工作職責），可以減少約 15% 病假日數，仲可以改善憂鬱症狀同工作能力，每年平均返少 25 日病假。若果只係幫手跟進，唔接駁臨床治療，暫時未見明顯效益。加入額外心理干預（例如網上 CBT），比淨係做標準管理更加有效，能進一步減少病假。改良護理流程或者加設憂鬱專責人員，亦有助進一步減病假.

睇埋

• 憂鬱
• 行為科學
• 犒賞系統
• 習得型無助