拾遺，又叫做地下執到寶，好似嚮街執到唔知邊個人大懵留低嘅手機、錢、手錶、黃金、文件袋都係。
啲人話，地下執到寶，問天問地攞唔到；又有話，拾遺不報，是為賊也。小學老師話過，唔係你嘅嘢，唔好要，一定要畀返人，如果唔係，一世都唔安樂。又有人笑過，唔據為己有，就一世都唔安樂至真。
有報紙講過，有個道友執到人張六合彩飛仔，發現係中獎飛，以為神仙可憐佢窮，醒佢發達，點知原來馬會有咗記錄，話要告佢偷嘢。
傳說，執到寶交差館，3個月冇人認領，件寶物就係你合法所有。不過，交差館時一定要點算清楚，同埋問差人攞返張收條。因為世界上好少人會咁誠實。
