摩星嶺要塞
22°16′37″N 114°07′23″E / 22.27694°N 114.12306°E
摩星嶺要塞，又叫摩星嶺炮台，係一個喺香港中西區摩星嶺山頂同山腰一帶嘅軍事要塞，曾經喺香港保衛戰期間守衛香港島西部，而家祇淨低部份遺址。
史[編輯]
1900年，英軍建議喺摩星嶺起防衛設施。摩星嶺要塞嘅建築工程喺1909年展開，1911年大炮裝置完成，1912年全部完成，取代咗附近龍虎山嘅松林炮台。要塞係由營房、五個炮台、指揮總部同多座瞭望台同掩蔽體組成，其中大炮口徑係9.2吋。要塞配合喺西高山嘅機槍堡，把守住維多利亞港西部同硫磺海峽等航運要道。1939年，為咗加強摩星嶺嘅防衛能力，附近再起多座銀禧炮台。
1941年12月，香港保衛戰爆發，由於日軍喺香港島東北岸登岸，摩星嶺要塞就成為支援香港島東部同中部嘅主要火力。12月16號，喺山頂嘅指揮總部被炸毀，喺12月25號守軍將殘餘嘅設施炸毀之後先至放棄要塞。
