擺爛

擺爛（英文：let it rot 或者 bai lan）係中國喺2022年初開始嘅新興潮語，係喺年輕人失業率屢創新高之下，繼2021年嘅潮語「躺平」之後嘅新潮語，根據牛津大學中國中心研究員馬格努斯（George Magnus）喺金融時報嘅文章嗰度指出，「擺爛」喺年輕族群嗰度流行起嚟，傳達咗更深嘅悲觀情緒，係中國年輕人面對未來嘅希望破滅嘅困境嘅反映。「擺爛」喺中國年輕人用嘅生活方式上，有一個更令人擔心嘅層面：積極擁抱一個惡化緊嘅情況，而唔係試圖扭轉佢；「擺爛」有「破罐破摔」同「死豬唔怕開水燙」嘅感覺，指完全唔會嘗試去做任何嘢去改變現狀。

擺爛同躺平嘅差別

「擺爛」同「躺平」呢兩個潮語嘅意思接近，都有只做最低嘅要求同埋自我放縱嘅意思，但係佢哋嘅意思唔一樣，簡單啲講就係「擺爛」比「躺平」更負面。

中國年輕網民嘅流行語已經從「躺平」，進化到一種新嘅表達方式叫做「擺爛」，直到2022年10月為止，喺微博上面，「擺爛」相關嘅 hashtag 已經累積咗超過9320萬次瀏覽，而喺小紅書上面搜尋「擺爛」嘅結果發現有超過260萬個用戶內容（user-generated content，UGC）包含「擺爛」，可見佢嘅流行程度。同2021年嘅潮語「躺平」唔同，啲人躺平係想反抗疲勞嘅 996 工作文化，同埋宣揚比較簡單而合理啲嘅生活方式，所以做夠嘢就可以，但求過日子；而「擺爛」係指啲人已經失望，所以寧願放棄努力，以防止情況進一步惡化。