躺平主義
(由躺平跳轉過嚟)
躺平主義（粵拼：tong2 ping4 zyu2 ji6，粵文直譯：瞓低主義，意譯:本迆，英：lie flat）[註 1]，泛指一啲中國大陸年青人主張嘅低消費主義，當中包括五個「唔」：唔買樓、唔買車、唔結婚、唔生B、唔消費。奉行躺平主義嘅人，只會維持最低生存標準，拒絕成為其他人賺錢嘅機器同埋俾其他人剝削嘅奴隸[2]。「躺平」呢個詞衍生自另一大陸俗語「割韭菜」（畀有勢力嘅人欺壓），皆因「躺平」（瞓低）咗嘅韭菜唔好割，所以就用「躺平」嚟比喻。
呢個詞語最初出自百度貼吧一篇已俾人刪除，標題係「躺平即是正義」嘅帖子，背後有一啲憤世嫉俗嘅主張；但亦因為喺中國內地，年青人面對生活成本太高、壓力大、高樓價、高物價、工作難求、結婚生仔都難[2]，令佢哋唔再覺得有付出就會有回報，所以引起佢哋唔少嘅共鳴。另外，亦有人話呢啲算係一種中國政治高壓極權統治之下嘅消極不合作主義[2][3]。
隨住躺平主義得到更多人嘅注目，社會亦開始有唔少人公開討論，例如有啲中國官媒同學者就形容呢啲講法係「毒雞湯」、「可恥」、「極不負責任」[4]。
評論
[編輯]- 香港教育大學社會學系講師黎明指，由於內地就業環境競爭日益激烈，僱主對勞動者嘅要求越來越苛刻，但對於勞動者嘅保障同回饋就完全跟唔上，例如996、007、886呢啲工作安排越嚟越常見，仲俾僱主吹捧為畀員工嘅福報，所以躺平主義嘅論述出現嗰陣，就引發咗好多網上「打工人」嘅共鳴，亦都表達咗一種想要反其道行之嘅願望[3]。
- 內地政治學者吳強認為，當下反抗中國極權嘅可能性被逐漸削弱，社會改革嘅希望日漸黯淡，政治陷入僵化、社會陷入停滯成為共識，社會態度開始形成一種共識，以躺平主義嘅方式出現[3]。
- 南方日報喺2021年5月發表咗一篇文章，標題為「躺平可恥，哪來的正義感？」，話年輕人喺壓力面前選擇「躺平」，唔單止唔正義、而且係可恥，形容呢啲鼓吹係「毒雞湯」，無任何價值[4]。
睇埋
[編輯]註
[編輯]參考
[編輯]- ↑ 〈「躺平主義」內地瘋傳 網民熱議港版「躺平」用字：Hea？瞓低？〉。2021-06-01。原先內容歸檔喺2021-07-07。喺2021-09-23搵到。
- ↑ 2.0 2.1 2.2 〈躺平主義危險嗎〉。《RFI - 法國國際廣播電台》 (繁體中文)。2021-06-01。原著喺2021-06-01歸檔。喺2021-06-01搵到。
- ↑ 3.0 3.1 3.2 〈躺平主義｜「不想跪着 不能站着 只好躺着」 內地青年新態度 學者：拒絕資本與國家雙重暴力 ｜ 蘋果日報〉。《Apple Daily 蘋果日報》 (香港中文)。原著喺2021-06-02歸檔。喺2021-06-01搵到。
- ↑ 4.0 4.1 聯合新聞網 (2021-05-29)。〈低慾望「躺平主義」對不起父母？ 清華教授與網民互嗆 | 聯合新聞網：最懂你的新聞網站〉。《聯合新聞網》 (中文)。喺2021-06-01搵到。
{{cite web}}: CS1 maint: url-status (link)