攝家

攝家（日文：摂家，せっけ^Sekke）係日本公家嘅一種，同時係公家之中最高級嗰個，響鐮倉幕府時代成立，成員有近衛家、九條家、二條家、鷹司家同埋一條家，而佢哋全部都由係藤原北家分支出嚟嘅。由於舊日本規定大納言、右大臣、左大臣、攝政、關白同埋太政大臣呢六個最高官位要由呢五家嘅人做，所以佢哋又叫五攝家、攝關家同埋執柄家。

日本史上所有關白（關白係舊日本最高級嘅官位，同佢同級嘅有攝政，兩者合稱叫「攝關」）大部份都係由攝家嘅人出任，而唔係攝家出嚟嘅就係豐臣秀吉同埋佢嘅庶大仔秀次。

歷史

早期

藤原北家成員良房個女明子嫁咗畀文德天皇，生咗大仔惟仁（即後嚟嘅清和天皇），而文德天皇個阿媽正正就係良房個同父異母家姐順子，咁良房就係天皇嘅外戚，所以佢靠住天皇，順利升做攝政。由外戚做攝政，響當時日本係新鮮事。良房開咗先例，但變相就令最高嗰六個官位就由天皇外戚控制嗮。之後藤原北家另一成員道長有三個外孫都係天皇（後一條天皇、後朱雀天皇、後冷泉天皇），令到佢響朝廷好有勢力。佢後嚟做咗攝政，而佢死後就將攝政一位傳畀大仔賴通，久而久之最高官位就變成只可以由藤原北家成員、兼且係道長嘅後人先至做得。

後嚟響太上天皇底下，有咗院政呢個職位，所以攝政一位先至短暫唔再由藤原北家出任。

平安時代尾，藤原忠通庶大仔基實另起陽明家，本身佢係要繼承攝政一位，但係佢早死，而佢個仔基通嗰時又細個，就由基實個細佬基房繼承呢個位，咁就搞到分裂，分閞咗近衛家同埋松殿家兩支。之後發生戰亂，近衛家同松殿家地位下降，基房同基通失勢，同時之間當時個關白兼實另起攝家九條家，成功搶走攝政一位。但係之後攝政一位一直都傳得唔穩定。

後嚟，兼平由近衛家分家，另起攝家鷹司家。之後又分出一條家同埋二條家。1252年，鷹司兼平就任關白，廿年後發生政變，由九條家嘅忠家繼任關白，而忠家制定咗一條體制，就係「五攝家體制」，其中規定最高官位要由五家嘅人出任。

中期

後嚟江戶幕府成立，之後就制定咗禁中並公家諸法度，規定關白同攝政要經幕府審過先。之後幕府規定當一個家族當主冇仔嗰陣，可以從屋企人或者皇室嗰邊契一個仔返嚟，但就唔可以亂契。

另外，以前嘅天皇就一定要娶公家嘅女仔做老婆，但江戶幕府就批准天皇可以娶官員嘅女，唔一定要公家出嚟嘅，但前提就係天皇嘅正室一定要係公家出身。

江戶時代尾，一度絕家嘅松殿家迎嚟道基而再興，而幕府將軍德川家光想將松殿家都列入攝家，話嗮松殿家都係道長嘅後人。無奈道基早死，又冇仔，所以計劃就不了了之。

江戶初期經濟好，所以攞到嘅俸錄特別多，分別係九條家3000石、近衛家2860石、一條家2044石、二條家1708石、鷹司家1500石；而後尾九條家一部份俸錄被幕府瓜分，加上經濟又轉差，所以就變成近衛家2862.8石、九條家同一條家2044石、二條家1708.8石、鷹司家就1500石。

明治維新之後

爆發明治維新之後，明治天皇規定實行新制度，將全部家都封為華族，而五攝家都係公爵。後嚟攝政同關白都畀天皇廢除，所以攝家又畀人叫做「舊攝家」。

另外，明治維新之後唔再限制一定要從屋企人或者皇室嗰到契一個仔，而係可以任何華族都契得。

1947年之後

1947年，響駐日盟軍總司令指示底下，華族制度畀人廢除，即係話華族冇嗮官位。雖然五攝家保住咗銜頭，但官位同俸錄都冇嗮。同年新皇室典範實施，入面話攝家唔使再一定要同華族式皇室成員結婚，可以自由婚姻。

五攝家現任當主分別係：近衛忠煇（近衛家）、九條道成（九條家）、一條實昭（一條家）、二條基敬（二條家）同埋鷹司尚武（鷹司家）。

關係

其實五攝家全部都係藤原北家嘅後人，而仲有另一個同樣都係由藤原北家分支出嚟嘅係松殿家，不過松殿家一早已經絕咗家（江戶時代尾迎嚟道基而再興，收尾道基早死，又冇仔，所以再次絕家），所以就冇將松殿家納入為攝家之一。

藤原忠通 藤原北家當主

近衛基實 近衛家初代當主

九條兼實 九條家初代當主

近衛基通 近衛家第二代當主

九條良經 九條家第二代當主

近衛家實 近衛家第三代當主

九條道家 九條家第三代當主

近衛兼經 近衛家第四代當主

鷹司兼平 鷹司家初代當主

九條道實 九條家第四代當主

二條良實 二條家初代當主

一條實經 一條家初代當主

近衛家系

鷹司家系

九條家系

二條家系

一條家系