新丁香耀

新丁香耀
出世	陳少麟 1892年
死	1965年1月18號（73歲） 香港廣華醫院
別名	丁叔
職業	粵劇演員
知名作品	《雙孝女萬里尋親記》、《嫦娥奔月》、《芙蓉恨》、《臨去秋波》、《天女散花》
親屬	何浩泉（外父）

新丁香耀（1892年—1965年1月18號）原名陳少麟，人稱丁叔，係粵劇演員，擅長演花旦、正印丑生。首本戲《雙孝女萬里尋親記》、《天女散花》、《臨去秋波》。弟子有阮兆輝等。

生平

新丁香耀初時跟鄭君可學戲，後來入「普長春」班，同新麗湘（李自立）唔分正副，兩個人都係豔旦，演《雙孝女萬里尋親記》紮咗之後獨當一面。班主何浩泉好睇佢，畀錢過佢去上海學北劇。返來廣東之後同小生福拍檔演《嫦娥奔月》，吸收咗京劇反身拗腰舞絲帶呢啲技藝，當其時嘅粵劇頗爲新穎，觀衆讚佢「古裝豔旦」。後尾同何浩泉個女結婚。又同何浩泉組「寰球樂」班，睇重度新戲同每齣戲嘅旦角，亦操班政亦做戲，同朱次伯拍住上，其中觀衆好讚賞《臨去秋波》。朱次伯過身之後，新丁香耀又請到靚少鳳頂替。佢主理「寰球樂」班期間度嘅新戲有《珠崖劍影》、《苦姻緣》、《恩仇血》、《顛倒君王》、《憐香客》等。

「寰球樂」散班之後，過「大堯天」班拍住薛覺先，無耐同關德興組「共和樂」班，做丑生，用真名陳少麟。收尾自己組「高陞樂」班，唔識睇數蝕咗入肉，亦令到何家破產。後尾去「覺先聲」做貼旦。晚年由堂妻舅何少保接濟，住砵蘭街八和會館宿舍，亦周時瞓喺茂林街。1965年1月18號，喺香港廣華醫院過身。