日本麻雀計番

日本麻雀嘅番叫做「役」，例如一番咁，日本就叫做一番役，或者「一飜」。

牌山每面17張，開牌擲2粒骰仔，手牌13張，摸牌後同埋食糊時牌型14張，無花牌。

開局後順時針摸牌，而逆時針數過去7棟牌一共14張為「王牌」，第1、2棟一共4張牌係開槓補牌用，每局麻雀只允許最多開槓4次；第3至7棟一共10張牌係「懸賞指示牌」，打到流局都唔可以摸。開局時先將逆時針數過去第3張上層牌翻開，呢隻係第一隻「懸賞指示牌」，佢標示咗同款色、下一個數值嘅牌係加番數嘅「懸賞牌」。

一番役

• 門前清自摸和：喺門前清情況下自摸食糊。
• 立直：門前清之下嘅狀態聽牌（叫糊），可以選擇打牌時用1000點點棒宣告立直。立直後唔可以上、碰、明槓、加槓，摸到嘅牌除非可以食糊或開暗槓，唔係就一定要打出。（任何影響叫糊牌型暗槓都唔可以開，如4555678萬 東東東南南南，如摸到5萬唔可以開槓，因為食糊嘅牌會變少）立直後如果食到糊就可以收返當初拎出來嗰1000點，否則點棒會暫時被供託，由下一位食糊嘅人攞晒。立直有最大好處就係食到糊後除咗可以使用上層見咗光嘅「懸賞指示牌」，仲可以翻開對應數量嘅下層「裏懸賞指示牌」；其次好處為加1番，因此可用於滿足1番起糊。
• 一發：立直後，喺一巡內食糊或自摸，但中途有人鳴牌，即上、碰、槓（包括自己暗槓），就唔可以計一發
• 平和：門清冇符嘅糊牌（唔計自摸符）。類似廣東話叫「大雞糊」或者「平糊」，手牌由一組對子（眼）同四組順子組成。一定要喺門前清狀態下叫糊，叫糊時要叫兩邊（唔可以單騎、邊張或中洞），對子亦唔可以係役牌（即唔可以係自風牌、場風牌、三元牌，客風牌可以。）
• 一盃口：即係同廣東牌嘅般高，有兩組同一花色而數字相同嘅順子，例如445566萬，一定要門前清
• 斷么九：無一九牌，無番子。多數玩法允許明牌（有食斷），但也有門清限定玩法（無食斷）。
• 役牌：又叫做翻牌，即係自風牌、場風牌（即門風牌、圈風牌）及三元牌，每有一組役牌嘅槓／刻子，就有一翻。自風、場風如果一樣，嗰組叫連風牌嘅刻子會雙計（雙番東、雙番南）。
  • 三元牌：三元即係白、發、中
  • 風牌：每有一組自風牌、場風牌的槓／刻子，就有一翻。自風、場風如果一樣，嗰組風牌刻子會雙計。客風牌刻子唔會加翻。
• 嶺上開花：即係槓上花，明槓或暗槓補牌後食糊
• 搶槓：食糊食人哋加槓張牌
• 海底摸月：即係海底撈月，牌山摸到最後一張自摸食糊
• 河底撈魚：食糊食人哋最後一張打出嘅牌
• 懸賞牌：「懸賞牌」（Dora）又譯做「寶牌」，如果糊牌上每有一張「懸賞牌」，就計多一番，係逐隻計。開局後槓尾（王牌）數過去第三隻牌，上層嗰張牌會翻開，叫「指示牌」，佢嘅下一張牌就係「懸賞牌」。假設呢隻指示牌係三索，該局會增加番數嘅懸賞牌就係四索。假如指示牌係九筒，懸賞牌就係一筒，食糊嘅時候如果包含一筒開槓，加四番。另外，懸賞牌一局最多有10張。每逢任何人開明槓暗槓，會翻開多一張指示牌（槓尾數過去第三四五六七張上層牌），每局最多開槓4次，槓尾亦只有4張補牌可以摸，同時最多有5張上層牌見光。當有人立直之後食糊，任何翻開咗嘅指示牌，下層嘅牌都會翻開，最多5張，指示「裏懸賞牌」。所以上下層一共最多翻開10張指示牌，指示10張懸賞牌。

關於字牌嘅懸賞，以下係「顯示牌」同「懸賞牌」對應表：

顯示牌 > 懸賞牌
東 > 南
南 > 西
西 > 北
北 > 東
白 > 發
發 > 中
中 > 白
1 > 2
2 > 3
3 > 4
4 > 5
5 > 6
6 > 7
7 > 8
8 > 9
9 > 1

所有懸賞牌翻數，係食糊以後額外「加」嘅Bonus，所以當手牌無翻數嘅時候，即使成手都係懸賞牌，唔符合一番起糊，都冇得食糊。所以要有至少一番糊牌至可以累計懸賞牌。

「赤紅5懸賞牌」為日本麻雀其中一種玩法。成副牌中一般而言有1張五索、1張五萬、2張五筒換成紅色版本。只要手上食糊有紅色懸賞牌，每一隻加一番。

二番役

• 七對子：門清拎到七個唔同嘅對子。不過同一種牌4隻唔可以算做兩對。七對子唔可以複計一盃口二盃口。
• 混全帶么：簡稱全帶，四組牌同雀頭之中都有么九牌，刻子係么九刻，雀頭係么九牌，而順子只可以係123或789順序（如果食糊時有上碰，就減一番）
• 一氣通貫：即係廣東牌同台灣牌嘅一條龍，同一花色123、456、789三組順子（如果食糊時有上碰，就減一番）
• 三色同順：簡稱三色，筒索萬三種花色而數字相同順子（如果食糊時有上碰，就減一番）
• 雙立直：同天聽、地聽規矩一模一樣，一開牌就叫糊，打第一隻牌就立直。如果立直前有碰、上、槓（除咗暗杠）就無效
• 三色同刻：擁有筒索萬三種花色而數字相同嘅槓／刻子
• 三暗刻：有三副自己摸返嚟嘅刻子。
• 三槓子：有三組槓子嘅牌（明、暗槓都得）
• 對對和：即係對對糊，全部係刻子，無順子。可複計三暗刻，而四暗刻係役滿。
• 混老頭：即係廣東牌嘅「花么」，全部係一、九同埋字牌嘅刻子
• 小三元：兩組三元牌刻子同一對三元牌對子

三番役

• 純全帶：簡稱「純全」，同「混全帶么」嘅分別，就係純全帶么無字牌（如果食糊時有上、碰，就減一番）
• 混一色：成副牌都係由字牌同另外單一花色（筒、索或萬）組成（如果食糊時有上、碰，就減一番）
• 二盃口：簡稱「二盃」，就係手牌上有兩組「一盃口」，同「一盃口」一樣一定要門前清先計。唔複計七對子。

五番役以上

• 流局滿貫：又叫做「么九振切」，如果自己打出來嘅牌全部都係么九牌，到流局嘅時候便可以當係自摸和咗，以滿貫分數計算，該局仍當為流局。不過如果當中打出嘅牌被佢家吃、碰或明槓，流局滿貫便失效。
• 清一色：六番役。筒子、索子或萬子之中，只用其中一種類組成嘅糊牌（如果唔係門前清，就減一番）

役滿 （唔可以複計非役滿牌型，役滿牌型可以複計，役滿係13番）

• 大三元：有三組三元牌刻子
• 四暗刻：即係香港麻雀嘅「坎坎糊」，簡稱「四暗」，就係全靠自己摸晒四組暗刻上手，必須雙聽自摸（單吊食糊更好會變雙倍役滿，雙聽如果唔係自摸而去榮和會變成低番數三暗刻）。
• 字一色：全字牌，唔計對對糊。
• 綠一色：只用發、2、3、4、6、8索組成，可以唔需要集齊六種
• 清老頭：即係廣東牌嘅「清么」，全部係一、九嘅刻子同雀頭，無字牌
• 九蓮寶燈：即係廣東牌嘅「九子連環」，筒、索、萬其中一種清一色門清配成：「一一一二三四五六七八九九九」加一至九是但多一張牌嘅牌型
• 國士無雙：即「十三么」，19萬19筒19索，東南西北白發中，加其中是但多一隻。
• 天和：即係「天糊」，莊家一開牌就自摸糊牌
• 地和：即地糊，當閒家摸第一隻牌就自摸糊牌
• 人和：閒家一開牌即叫糊，喺一巡內有人出銃（亦可以設定人胡為滿貫，跳滿，倍滿，三倍滿）。
• 小四喜：以東、南、西、北，組成三個刻子、一對眼嘅糊牌
• 大四喜：以東、南、西、北，組成四個刻子嘅糊牌
• 四槓子：即「十八羅漢」，有四組槓子（明，暗槓都計）
• 大車輪：用咗2~8筒組成嘅七對子。唔係主流玩法。
• 八連莊：連續八次做莊並於第八莊成功和咗，不過必須係和咗嘅連莊，聽牌嘅連莊唔會計算。唔係主流玩法。
• 四連刻：一種花色4副依次遞增一位數嘅刻子。唔係主流玩法。
• 一色四順：一種花色4副序數相同嘅順子。唔係主流玩法。

雙倍役滿（又叫倍滿）

• 純正九蓮寶燈：又叫做九蓮寶燈九面聽，即係九蓮寶燈叫九飛，即手上已經有（1112345678999），叫緊1-9任何一隻
• 大四喜：和牌有齊東、南、西、北四對刻子，另加一對眼 （可以設定大四喜為單倍役滿）
• 國士無雙十三面：即係廣東麻雀嘅「十三么」，分別係叫十三飛，即手上已經有（19筒19萬19索東南西北白發中），叫緊其中任何一隻
• 四暗刻單騎：即係四暗刻單吊眼。
• 大七星：7對子+字一色。唔係主流玩法。