星際酒店

星際酒店（葡文：Mundo de Estrelas；英文：StarWorld Hotel）起喺澳門，係銀河娛樂集團嘅首座五星級酒店，開幕於2006年10月19號，樓高39層，有497間客房；入面開咗個賭場，叫做星際娛樂場（英文：Casino StarWorld）。

爭議

因壞機而唔派四千萬獎金

响2007年8月30號夜晚七點半左右，香港人田雪芹喺星際娛樂場入面，用五蚊銀打老虎機嗰陣，部嘢顯示佢中獎，有 $40,000,000彩金（準確數目）。好快，有職員行埋去話畀佢知中咗獎；冇幾耐，有其他職員嚟到，話懷疑壞機，唔可以當真住，重要熄機檢查。跟住唔理佢同同行朋友反對，夾硬打開部嘢整下，令到畫面變成顯示八百餘萬（實數不明）積分。爭詏咗兩個鐘頭，都未通知相關政府部門。後嚟駐賭場司警同博彩監察協調局（下稱「博監局」）兩方人員到場……佢哋糾纏到凌晨，終於博監局嘅人靠話調查七日就有派彩與否嘅決定，勸走咗田女士一行人。出事嗰部老虎機，响跟住嘅朝頭早就貼住「暫停使用」告示，無開着，看更人盯人噉監視嚟採訪嘅記者。

到咗9月15號凌晨1點46分，博監局先至喺公報道宣布決定——裁定事件係因為機器軟件反常所致（指部機响事發當日全日都無錄到任何操作，亦無證據顯示田女士有投過注，而機器屏幕又顯示「Machine Disabled – Call Attendant」［文中聲稱代表「機器故障」］訊息），銀娛因而唔使派彩；文中寫嘅係港幣$42,946,400.96（異於田女士所提數額），對應積分 8,589,280（唔知會唔會就係上段所述，職員開機之後先至出現嗰個數目）。田女士响早一日收到有關通知，表示會同律師商量對策，而佢嘅朋友沈先生表示田小姐的確有入錢，唔明博監局何以話佢冇。

學者王長斌批評政府處理得差，打擊賭客信心。佢認為應該喺博監局道設個機構，專門處理賭客同賭場糾紛，並且以先進國家嘅相關制度（尤其是美國內華達州嗰款）做板，整套規範嘅糾紛處理程序。