跳去內容

曹興誠

改拎
出自維基百科，自由嘅百科全書
曹興誠
英文名Robert Tsao
號八不居士
出世 (1947-02-24) 1947年2月24號（77歲）
中華民國 中國北平市
國籍中華民國 中華民國（1947年2月24日－2011年1月、2022年8月30日[1][2]至今）
星加坡 星加坡（2011年1月－2023年1月）
宗教信仰佛教[3]

 

曹興誠（英文：Robert Hsing-cheng Tsao，1947年2月24號——），係台灣嘅企業家，聯華電子嘅創辦人，亦係藝術鑑賞家同埋古董收藏家，別號「八不居士」（不大不小企業家，不多不少收藏家，不高不低佛學家，不得不說為大家）[5]。

生平

[編輯]

曹興誠喺北平出世，一歲半嘅時候跟老豆老母一齊到台灣，佢老豆到咗台灣之後，曾經喺台中縣清水高級中學教中文、歷史等科目。臺灣嘅省立清水中學（依家係臺中市立清水高級中等學校）初中部畢業、臺北市立建國中學畢業、臺灣大學電機系學士，交通大學管理科學研究所碩士。1974年，入咗當時做經濟部長嘅孫運璿所推動嘅財團法人工業技術研究院做嘢。1976年，工研院同美國無線電公司（RCA）簽訂技術移轉授權合約，加入RCA計畫，曹興誠等人於是去咗美國學半導體嘅生產技術。1980年，台灣第一家集成電路公司聯華電子成立，曹興誠轉任聯華電子嘅副總經理，之後接任總經理、董事長。後嚟，聯華電子喺一連串嘅發展同埋併購之後，成為世界第二大晶圓代工廠，啲投資者經常攞佢嚟同世界第一大嘅臺積電做比較；而曹興誠同臺積電嘅董事長張忠謀亦都俾人叫做臺灣半導體雙雄，兩人之間存在「瑜亮情結」[6]。

1990年代，聯電管理層有去中國大陸設廠嘅諗法。當時嘅聯電總經理宣明智曾經帶團到大陸，推廣IC設計技術，然後，2001年嘅時候，喺蘇州投資成立和艦科技。不過因為外界質疑聯電係和艦背後嘅真正投資者，和艦董事長徐建華因為呢單嘢而被捕，有一整年嘅時間，佢只能每日靠電話會議同佢嘅團隊開會，聯電更加因為呢單嘢而陷入長達9年嘅訴訟。之後，因為馬英九政府開放八吋晶圓廠去大陸生產，和艦先至可以喺2013年合法併入聯電。經歷18年嘅努力，和艦喺2018年獲利3億多台幣，占聯電總利潤嘅大約一成五。2014年，聯電同大陸政府合作成立廈門聯芯，喺廈門設立12吋晶圓廠，生產40同埋28奈米嘅晶片，聯芯從動工到量產只係用咗20個月[7]。根據聯電年報，2021年和艦嘅盈利大約係57億新台幣，但係同大陸政府合作嘅聯芯就蝕咗新台幣近16億元。

1998年10月31日，台灣士林地方法院判決《美華報導》第378期（1998年1月3日）有關曹興誠同蕭薔等演藝界女性嘅任何報導嘅內容都係假嘅，同事實不符，確定呢單「自訴案」成立，《美華報導》犯咗誹謗罪（判決書文號「士林87年度自字第23號」）[8]。2005年，聯電因為違反陳水扁政府嘅中國大陸投資規定，間接投資和艦科技而遭到新竹地檢署調查，之後聯電被告「背信罪」同埋違反《商業會計法》，曹興誠亦都因為呢單嘢而辭咗聯電董事長嘅職務。呢件案喺臺灣高等法院更一審（更一審喺台灣嘅司法制度係指：贏咗三審之後，案件發回俾原本二審嘅法庭審理）之後，確定無罪[9][10]。2008年，曹興誠將佢認為最有意義嘅收藏品「乾隆期料胎琺瑯彩筆筒」以6千5百萬港元拍賣出去，啲錢用咗嚟做汶川地震賑災嘅善款。

2011年1月，曹興誠因和艦案訴訟同埋新加坡政府嘅大力邀請，正式申請入籍新加坡，並宣布放棄中華民國國籍[11]。2017年10月，曹興誠將佢珍藏嘅「北宋汝窯天青釉洗」喺香港蘇富比拍賣。喺拍賣會上，經過近三十口叫價，僵持咗近二十分鐘之後，最終以2億9,430萬港元拍出，再次刷新中國瓷器拍賣價格嘅世界紀錄[12]。除咗北宋汝窯天青釉洗外，佢仲將曾經係「全球最貴瓷器」嘅五彩魚藻紋蓋罐攞出嚟拍賣，最終以2.14億港元成交[13]。呢個五彩魚藻紋蓋罐對於曹興誠嚟講，仲有另一層嘅意義——紀念佢嘅公司喺紐約成功掛牌[14]。2020年2月，曹興誠接受《財訊》雜誌訪問，佢發表咗對台灣海峽兩岸半導體發展嘅睇法，佢語出驚人咁表示，「如果能重來，我希望我們沒有到大陸協助設廠。」對聯電協助中國蘇州和艦設廠呢件事，佢表示悔不當初[7]。2020年12月15日，曹興誠同張忠謀一齊出席新竹科學園區慶祝成立40週年嘅活動，之前互相競爭嘅兩個人，退休之後握手言歡[15]。

2022年8月26號，曹興誠著住避彈衣，出席自由亞洲電台節目，並且公布已經重新申請中華民國國籍[16][17]；同月30號獲得批准、攞到中華民國國民身分證。

觀點

[編輯]

早年曹興誠被視為係一個穿梭臺海兩岸嘅工商界成功人士嘅代表，佢曾經好幾次以民間人士嘅身分為兩岸交涉做一啲協調、引薦嘅角色，並且曾經因為致力提倡「統一公投」嘅構想，而俾公眾視為統派、親中派。2007年建國廣場負責人傅雲欽曾經指出，統派嘅曹興誠主張從臺海兩岸「事實上（de facto）獨立、法理上（de jure）統一」嘅現狀基礎上，以統一公投進一步謀求事實上的統一，變成「純正的統一（法理上統一＋事實上統一）」，令臺灣「合併於中國，如同香港」[18]。2008年中華民國總統選舉前夕，曹興誠曾經刊登報紙廣告，提倡自己嘅「兩岸和平共處法」，指「台灣不應舉辦獨立公投；台灣不排斥統一，但統一須經全民公投」，引起當時做中華民國總統嘅陳水扁痛批，話佢係「台灣投降法」、「生意人操弄政治」、「連天上聖母都不會原諒」；曹興誠就刊登廣告、架設部落格發文，指責陳水扁操弄台獨議題[19]。

2019年12月25號，曹興誠喺台北市信民兩岸研究協會演講嘅時候，一反親大陸嘅表態，公開抨擊九二共識。曹興誠先以香港「反送中」做例子，佢話香港特首林鄭月娥將香港人對逃犯條例嘅疑懼同反抗定調做「暴亂」，就係「胡說八道」。「這一胡說八道，大陸方面排山倒海地罵港獨、分裂國土」，接落嚟，就係香港警察對學生嘅暴力鎮壓。曹興誠亦都指出，支持武統論嘅解放軍將領就係相信「台灣自古以來就是中國的領土」嘅「胡說八道」，先至會認為「收回領土」係天職。曹興誠表示，對歷史稍有認識嘅人都會知道，喺明末以前「台灣跟中國一點毛關係都沒有」，曾經控制台灣嘅清朝更加唔係「中國」政權。之後曹興誠話鋒一轉，直指前國安會秘書長蘇起提出嘅「九二共識，一中各表」唔合邏輯，亦都係「胡說八道」。「大陸怎麼會同意你一中可以各表，那就變成兩個中國，大陸不會同意，那怎麼會有共識呢」，「一個胡說八道的東西，你說兩岸會有共識？」[20][21] 至於領土問題點樣解決，曹興誠就重申，佢長期主張嘅兩岸問題解方「統一公投」，即係：中國大陸如果想兩岸統一，「可以，你提出方法，我給你辦個公民投票，公投過了就統一；公投不過，對不起，我們老闆（台灣人民）不同意，你改改條件下次再來」[19]。

2022年3月21號，曹興誠透過民主進步黨立法院黨團總召集人柯建銘嘅LINE媒體群組發文〈保衛中華民國，需要兩國論〉，聲稱想保衛中華民國，就需要兩國論，佢話：「如果世界承認中華民國是獨立的國家，大陸對台灣動武即屬侵略行為，世界各地即可支援台灣、制裁中共」，「自1999年兩國論提出至今，中共從不敢越台海雷池一步」[22]。

2022年8月5號，曹興誠喺解放軍圍台演習嘅第二日，召開記者會，表示「中共的心態和本質，就是地痞流氓；中華人民共和國是一個仿冒成國家形式的黑社會組織」，佢認為依家台灣國防嘅弱點，唔係武器裝備，而係認知同士氣方面嘅不足，佢並且宣布捐出新台幣30億元，用嚟資助推動國防教育，研究反制中共對台灣嘅認知作戰等行動，希望可以喚醒大家喺認知戰、心理戰同埋輿論戰等方面加強戰備[23][24]。事件發酵之後，聯電領導層大動作斬斷同佢嘅聯繫，話已經撤銷咗曹興誠「榮譽董事長」嘅頭銜，關於佢俾自己一手創辦嘅公司火速切割，曹興誠知道之後表示理解，甚至表態話如果換轉係佢，佢都會咁樣做。對於係唔係同公司仍然有關係，佢話自己喺武漢肺炎疫情之前就已經無再持有任何聯電嘅股份，亦都唔會連累公司，佢強調依家將會以個人身份從事自由活動[25]。2022年8月8號，曹興誠著住避彈衣、頭戴鋼盔上節目宣揚兩國論，再次指出九二共識根本係自相矛盾嘅；佢並且強調，如果兩岸真係一中，就只能夠係一方消滅另一方，先至能夠罷休[26]；佢上節目嘅時候表示，希望睇到中國共產黨倒台、睇到中國共產黨遭到中華民族嘅聲討[16][17]。

2022年9月1號，曹興誠宣布將會資助新台幣10億元嚟推動協助防衛嘅民間勇士，加強台灣嘅防衛力量，一個係要喺3年內訓練出300萬個積極協助區域防衛嘅民間勇士（黑熊勇士），可以同國軍戰士配合；另一個計畫，係盡快訓練出30萬個以上嘅民間神射手（保鄉神射），呢個計畫需要協調軍方、警方同埋各個縣市政府，加上民間組織合力推動，宣示「全民皆兵、抵抗侵略」嘅決心。

2022年9月26號，曹興誠批評，臺北市市長兼台灣民眾黨主席柯文哲拋出「兩岸一家親」嚟勾搭中共，2022年九合一選舉所有縣市長、縣市議員參選人都必須宣誓「與職位共存亡」。柯文哲諷刺，曹興誠以前都唔要台灣，改入新加坡國籍；中間消失咗好耐，2022年之後個性卻180度轉變，後面一定有原因。柯文哲回批曹興誠，「他每次都講這種很無聊的題目」[27]。

2022年11月27號，曹興誠宣稱，2022年九合一選舉民主進步黨大敗、中國國民黨大勝，擔心會被視為係向國際社會散布「台灣對中共妥協、姑息」嘅訊息，令人憂心。曹興誠認為，時任中華民國總統蔡英文上任以來，喺「民主同盟」嘅外交上取得咗輝煌成就，令台灣嘅處境得到國際社會嘅普遍認知同埋同情，呢啲係佢呢次選舉支持民進黨嘅主要理由；但係佢又認為，蔡英文政府喺司法改革上躊躇觀望、進步緩慢，令到好多人失望，無疑係民進黨敗選嘅原因之一[28]。曹興誠話，呢次國民黨以「票投國民黨，兩岸無戰場」嘅口號贏得選戰，佢認為呢啲係公然主張放棄國防、率眾投降嘅做法。算命佬江柏樂就表示，曹興誠鼓吹兩岸戰爭嘅言論係民進黨慘敗嘅主要原因之一，「誰希望兩岸戰爭，根本是腦筋壞了。愛台灣不是嘴巴說說而已，他的說法很讓人擔憂」[29]。

2023年2月4號，國民黨臺北市議員徐巧芯表示，曹興誠一陣話要搞統一公投、一陣又話要反共，一陣係中華民國人、一陣係新加坡人、中間再爽爽，搞個雙重國籍，一陣話大手筆要豪氣大捐新臺幣30億元、一陣又話要慢慢嚟，「這種超級多次『反起反倒』的人，在台灣竟然會有人信？我也是醉了」。徐巧芯表示，2022年曹興誠自稱已經係中華民國國籍、放棄新加坡國籍，依家俾佢攞到嘅文件「打臉」，明明係2023年1月先至申請通過放棄新加坡國籍；曹興誠嘅國民身分證上寫住係2022年8月30號發出嘅，曹興誠就喺2022年8月8號開始就有一系列表態支持陳時中等民進黨候選人嘅言論，以「外國人」身分為民進黨助選[30]。

曹興誠喺「民主倒退，公民搶救」集會嗰度演講

2024年5月21號夜晚，曹興誠喺青鳥行動（正式嘅名係「反立法院擴權運動」）現場演說嘅時候提到：「擴權法案是把立法權壓著行政權，壓著司法權，最後變成立法獨大」，「必須堅守陣線不能再退，不然台灣將會變成香港」，「別做中國的走狗」，「不要做破壞民主的幫兇」[31][32][33]。

參考

[編輯]
  1. ↑ 鍾榮峰 (2022-09-01)。〈曹興誠宣布恢復中華民國國籍秀身分證〉。《中央社》 (臺灣中文)。原著喺2022-10-14歸檔。喺2022-09-01搵到。 {{cite web}}: Unknown parameter |dead-url= ignored (|url-status= suggested) (help)
  2. ↑ 陳鈺馥。〈曹興誠宣布投入10億元 訓練30萬平民神射手、300萬「黑熊勇士」〉 (臺灣中文)。自由時報。原著喺2022-09-01歸檔。喺2022-08-09搵到。 {{cite web}}: Unknown parameter |dead-url= ignored (|url-status= suggested) (help)
  3. ↑ 〈低潮16年4／聖嚴師父啟蒙佛法 半導體梟雄改當「八不居士」全台巡迴 | 財經 | CTWANT〉。CTWant (中文)。2020-11-04。原著喺2023-12-11歸檔。喺2023-11-25搵到。 {{cite news}}: Unknown parameter |dead-url= ignored (|url-status= suggested) (help)
  4. ↑ 張建中 (2022-08-06)。〈曹興誠傳遭撤銷頭銜 聯電：早就不是榮譽董事長〉 (臺灣中文)。中央社。原著喺2022-08-09歸檔。喺2022-08-06搵到。 {{cite news}}: Unknown parameter |dead-url= ignored (|url-status= suggested) (help)
  5. ↑ 〈曹興誠 八不居士〉。Facebook。2022-10-31。喺2023-01-28搵到。
  6. ↑ 陳仲興 (2018-02-13)。〈【張忠謀傳奇】讓瑜亮情結的對手都佩服 曹興誠：張忠謀很偉大〉。《鏡週刊》。原著喺2023-01-18歸檔。喺2023-01-18搵到。
  7. ↑ 7.0 7.1 〈聯電曹興誠悔不當初的西進路 「如果能重來...我希望沒有到大陸設廠」〉 (繁體中文)。財訊。2020-02-05。原著喺2020-02-06歸檔。喺2020-02-07搵到。
  8. ↑ 〈曹興誠要告《美華報導》〉。原著喺2016年6月17日歸檔。
  9. ↑ 〈和艦案更一審　曹興誠、宣明智無罪〉。華視。2010-09-14。原著喺2016-03-10歸檔。喺2015-10-31搵到。
  10. ↑ 和艦案更一審 曹興誠無罪[失咗效嘅鏈]
  11. ↑ 〈不再跟猴子打架 曹興誠入籍新加坡〉。聯合新聞網。2011-04-22。原著喺2012-07-23歸檔。
  12. ↑ 陳宛茜，曹興誠珍藏汝窯拍出11億 刷新中國瓷器拍賣紀錄 互聯網檔案館嘅歸檔，歸檔日期2017年10月3號，.，udn聯合新聞網，2017-10-03
  13. ↑ 翻漲4倍HK$1.88億落槌　「樂從堂主」曹興誠的五彩魚罐 互聯網檔案館嘅歸檔，歸檔日期2020年6月16號，.，The Value，2017-11-27
  14. ↑ 專訪「堂主」曹興誠 互聯網檔案館嘅歸檔，歸檔日期2020年6月16號，.，The Value，2017-8-18
  15. ↑ 〈半導體競逐30年 張忠謀曹興誠同台握手破冰〉。中央社。2020-12-15。原著喺2021-01-26歸檔。喺2020-12-16搵到。
  16. ↑ 16.0 16.1 林克倫 (2022-08-26)。〈曹興誠申請回復中華民國國籍：我已決定死在台灣〉。《中央社》。原著喺2022-10-01歸檔。喺2022-08-26搵到。
  17. ↑ 17.0 17.1 〈曹興誠申請回歸中華民國國籍 「我已經決定我會死在台灣」〉。《自由時報電子報》。2022-08-26。原著喺2022-09-07歸檔。喺2022-09-07搵到。
  18. ↑ 傅雲欽 (2007-12-12)。〈我和曹某如同水火〉。建國廣場通告。 {{cite news}}: |access-date= requires |url= (help)
  19. ↑ 19.0 19.1 〈曹興誠重批九二共識 他曾因《兩岸和平共處法》被阿扁痛罵20分鐘…〉 (繁體中文)。信傳媒。2019-12-26。原著 (html)喺2020-02-06歸檔。喺2020-02-07搵到。
  20. ↑ 〈曹興誠：九二共識胡說八道 陷一中圈套沒活路〉 (繁體中文)。中央社。2019-12-25。原著 (html)喺2020-02-06歸檔。喺2020-02-07搵到。
  21. ↑ 〈曹興誠批九二共識胡說八道 專家讚他有勇氣〉 (繁體中文)。台灣大紀元。2019-12-29。原著 (html)喺2020-02-06歸檔。喺2020-02-07搵到。
  22. ↑ 〈曹興誠：保衛中華民國需要兩國論　中共已逐漸成為人類公敵〉。ETtoday新聞雲。2022-03-21。原著喺2022-05-31歸檔。喺2022-03-21搵到。
  23. ↑ 〈曹興誠轟中共「黑社會組織國家」 怒捐30億助反中、國防教育 | ETtoday財經雲 | ETtoday新聞雲〉。finance.ettoday.net (中文)。原著喺2023-07-08歸檔。喺2023-07-08搵到。
  24. ↑ 〈聲明全文／曹興誠怒批中國軍演霸道 宣布捐30億加強國防用在這「5大用途」〉 (臺灣中文)。菱傳媒。原著喺2022-08-31歸檔。喺2022-08-05搵到。
  25. ↑ 〈聯電切割？已撤榮譽董事長頭銜　曹興誠：如果我管，也會這樣做〉 (臺灣中文)。臺灣蘋果日報。原著喺2022-09-03歸檔。喺2022-08-06搵到。
  26. ↑ 〈穿防彈衣、頭戴鋼盔上節目大談「兩個中國論」 曹興誠：九二共識、一中各表根本自相矛盾〉 (臺灣中文)。菱傳媒。原著喺2022-08-15歸檔。喺2022-08-09搵到。
  27. ↑ 劉彥宜 (2022-09-26)。〈曹興誠批勾搭中國 柯文哲：個性180度轉變！背後一定有原因〉。壹蘋新聞網。原著喺2023-01-02歸檔。喺2023-01-02搵到。
  28. ↑ 韓婷婷 (2022-11-27)。〈曹興誠提醒當選人 不可忘記國家主權和衛國責任〉。中央通訊社。原著喺2023-01-31歸檔。喺2022-11-27搵到。
  29. ↑ 王子瑄 (2022-11-29)。〈藍大勝曹興誠嗆這句 慘遭命理師江柏樂當眾打臉：腦筋壞了〉。中時新聞網。原著喺2022-12-05歸檔。喺2023-05-07搵到。
  30. ↑ 李奇叡 (2023-02-04)。〈曹興誠雙重國籍輔選不違法？徐巧芯再揪1點嗆：傻到自爆〉。中時新聞網。原著喺2023-05-11歸檔。喺2023-05-11搵到。
  31. ↑ 李佳穎 (2024-05-21)。〈曹興誠登青島東路舞台讚謝衣鳳 警告擴權法案通過台灣變香港〉。《太報 TaiSounds》 (臺灣中文)。原著喺2024-05-22歸檔。喺2024-05-22搵到。
  32. ↑ 楊仁翔 (2024-05-21)。〈立法院外抗議「立委擴權」 曹興誠現身力挺〉 (臺灣中文)。財團法人中央廣播電臺。原著喺2024-05-22歸檔。喺2024-05-22搵到。
  33. ↑ 謝文哲 (2024-05-21)。〈【立院攻防戰】曹興誠聲援「我們不要變香港」 黃國昌遭砸太陽花被酸：背叛學運〉。《鏡週刊 Mirror Media》 (臺灣中文)。原著喺2024-05-23歸檔。喺2024-05-22搵到。
由「https://zh-yue.wikipedia.org/w/index.php?title=曹興誠&oldid=2171808」收