香港有線電視解僱新聞部員工風波

出自維基百科,自由嘅百科全書

香港有線電視解僱新聞部員工風波,係指2020年12月1號起,香港有線電視(下稱「有線」)解僱40名新聞部員工引起嘅風波,當中涉及招牌節目,曾製作多項獲獎偵查報道嘅《新聞刺針》全組被裁走[1],員工追問裁員準則被拒,結果引發大量員工辭職抗議。

由於新聞刺針過往曾經做過一啲對香港修例風波同埋建制派(親中派)民調操作唔科學嘅報道,有線近年嘅財政狀況亦已經有好轉[2],所以有線新聞呢個決定被部分泛民主派人士質疑係政治決定。[3]

背景[編輯]

喺2020年9月,有線新聞部空降咗一班管理層,包括許方輝李臻同埋陳興昌。當時就已經被人話呢個空降係有政治任務同埋打算裁員。[4]

另外,《新聞刺針》歷年做咗唔少偵查報道,當中觸及一啲中港政治議題,例如探討親中派多番引用嘅民意調查機構調查唔科學,代表性存疑,懲教署生產嘅CSI口罩流出市面問題,中學教科書被教育局政治審查,部分立法會議員、政協等人士接受未獲當地政府認可嘅美國同加拿大學術機構銜頭等。[5]

宣布決定當日[編輯]

12月1號,有線新聞正式宣布裁走40個員工,當中大部份都係資深員工,喺新聞部服務多年,部分過往表現突出,名單更包括《新聞刺針》全組嘅記者。[6]呢批員工向管理層追問裁員準則,但四個高層都只係話架構重組同節省資源,陳興昌更加以「爛仔」形容據理力爭嘅員工。另外,好多被裁嘅員工,佢哋嘅上司事前都唔知呢個決定。[7]有員工質疑,自從邱達昌入主之後,有線新聞部嘅新聞自由已逐步收緊,而家仲要炒晒成組《新聞刺針》,質疑以後仲可唔可以做偵查報道。[1]

結果,好多其他員工即刻遞信辭職抗議,包括港聞部16個記者,令成個部門得返8個人。[7]另外,有線中國組,以及多個部門主管亦決定集體請辭。[7][8]

後續風波同外間關注[編輯]

外間評論[編輯]

浸大新聞系高級講師呂秉權形容,事件對員工嘅士氣影響好大,日後好難收服[7],又話事件涉政治因素,有線財政狀況唔係咁差,估計上層係想換血,加入更多信得過嘅人。[5]

記協主席楊健興話,新聞刺針成組人被裁,令人擔心係咪有非財政嘅考慮,做過一啲對反送中運動同埋親中派民調操作嘅報道,所以有線面對一定嘅政治壓力,管理層可能因此向新聞刺針「開刀」。[3]

李臻被指合作溫和採訪林鄭月娥[編輯]

喺公佈解僱決定之後,蘋果日報就報導咗一段之前李臻專訪特首林鄭月娥入面,未有出街嘅一段片段。當中林鄭月娥語氣帶些少不屑咁批評佢嘅訪問技巧溫和,李臻當時就話第二節會硬淨啲,林鄭就回應話唔怪得知新聞秘書話個訪問會好合作好配合。[4]新聞工作者區家麟就形容,咁樣表示佢嘅表現已經係「新聞秘書高官界」嘅共識,唔會擔心佢提出嘅問題尖銳,對記者嚟講係一種終極恥辱。[9]

香港以外關注[編輯]

台灣民進黨副秘書長林飛帆話,香港政府打壓壹傳媒,加上有線裁員事件,都大大影響咗香港新聞自由,質疑中共近期種種動作都有好大嘅政治目的。[10]

睇埋[編輯]

參考[編輯]

  1. 1.0 1.1 線裁員|新聞刺針記者質疑審查 現職員工批同TVB新聞無分別. Apple Daily 蘋果日報 (香港中文). 原著喺2021-02-12歸檔. 喺2020-12-03搵到.
  2. 線裁員|股東涉千億中港地產富豪 中移動 惟向前線記者開刀. Apple Daily 蘋果日報 (香港中文). 原著喺2021-02-12歸檔. 喺2020-12-03搵到.
  3. 3.0 3.1 線新聞裁40人 不容新聞刺針 中國組總辭 5組主管辭職起義. Apple Daily 蘋果日報 (香港中文). 原著喺2021-01-23歸檔. 喺2020-12-03搵到.
  4. 4.0 4.1 線裁員|片段流出!林鄭不屑專訪問題太溫和 李臻口窒:二節就會...硬淨啲. Apple Daily 蘋果日報 (香港中文). 原著喺2021-02-24歸檔. 喺2020-12-03搵到.
  5. 5.0 5.1 線裁員|新聞刺針、中國組兩大埋 呂秉權:管理層想換血. Apple Daily 蘋果日報 (香港中文). 原著喺2021-02-24歸檔. 喺2020-12-03搵到.
  6. 線裁員百人 新聞部佔約 40 人 調查報道 聞刺針組炒 中國組總辭、多組主管辭職抗議 | 立場報道 | 立場新聞. 場新聞 Stand News (英文). 原著喺2021-01-23歸檔. 喺2020-12-04搵到.
  7. 7.0 7.1 7.2 7.3 線裁員|港聞組16名記者請辭明志:高層一手摧毁新聞部 現僅餘8人. Apple Daily 蘋果日報 (香港中文). 原著喺2021-02-24歸檔. 喺2020-12-03搵到.
  8. 者總辭抗議線新聞中國組主管司徒元 率領全組記者遞信辭職 抗議裁員 | 立場報道 | 立場新聞. 場新聞 Stand News (英文). 原著喺2021-01-23歸檔. 喺2020-12-04搵到.
  9. 個記者的終極恥辱 | 區家麟 | 立場新聞. 場新聞 Stand News (英文). 原著喺2021-02-24歸檔. 喺2020-12-04搵到.
  10. 注黎智英還柙、有線裁員 台政界促港府停止侵害人權 保障新聞自由 | 立場報道 | 立場新聞. 場新聞 Stand News (英文). 原著喺2021-02-12歸檔. 喺2020-12-03搵到.