朱子治家格言

《朱子治家格言》，又叫《朱子家訓》、《柏盧先生治家格言》、《朱柏廬先生治家格言》，係明末清初理學家朱用純一篇家訓格言，有五百零六字，主要敎人立身處世，勸人勤儉持家，安份守己，注重倫常。而因為治家格言內容淺白，道理由生活入手，所以廣為傳誦，亦見於家下通勝，對唐人社會有深遠影響。

個名因為叫《朱子治家格言》，唔少人誤以為係，另一個成日畀人叫朱子，宋代嘅朱熹所作。朱子只不過係一個尊稱，而咁啱朱熹又寫過一篇《朱文公家訓》，所以唔少人都搞亂。

《朱子治家格言》有好多名句，就算未睇過，日常生活都聽過，如『一粥一飯，當思來處不易』，『宜未雨而綢繆，毋臨渴而掘井』，『莫貪意外之財，莫飲過量之酒』，『凡事當留餘地，得意不宜再往』，『見色而起淫心，報在妻女』等等。