李尚福

李尚福（1958年 2月—）喺四川成都出世，係一個紅二代。佢阿爸李紹珠曾經做過解放軍鐵道兵西南指揮部副司令員。

事業

李尚福喺國防科技大學畢業。1982年，加入中國西昌衛星發射中心。2003年12月升做主任，之後曾經擔任「嫦娥二號」任務發射場區指揮部指揮長。中共十八大之後，佢喺2013年9月調離西昌衛星發射中心，升做中央軍委總裝備部司令部參謀長；2014年12月再升做總裝備部副部長；2016年1月，擔任「軍改」後新成立嘅戰略支援部隊副司令員兼參謀長；2017年9月接替升任軍委副主席嘅張又俠，出任中央軍委裝備發展部長；2019年晉升做上將。

2022年10月中共20屆一中全會，李尚福升任中共中央軍委委員，成為第一個戰略支援部隊出身嘅軍委委員；2023年3月佢再喺全國兩會期間，出任排名第一嘅國務委員兼國防部長。

2023年8月29號，李尚福喺北京舉行嘅中非和平安全論壇開幕式發表演說之後，就再冇露過面，中方嘅理由係佢「建康狀況」，不過據知係「貪腐問題」。

2023年10月24號，十四屆全國人大常委會第六次會議表決，決定免去李尚福嘅國務委員、國防部長、國家中央軍事委員會委員職務，同時亦都免去前外交部長秦剛嘅國務委員職務，但係就冇解釋原因。於是，組成唔到8個月嘅李強內閣嘅五個國務委員就剩返王小洪、吳政隆同諶貽琴三個。不過，李尚福同秦剛仍然係中共第二十屆中央委員會委員。

2024年6月，李尚福同魏鳳和因為「利用職務便利為他人謀取利益並收受巨額錢款」等等嘅罪名被開除黨籍，重移送軍事檢察機關審查起訴。

事蹟

2018年9月，美國國務院宣布，中央軍委裝備發展部同作為部長嘅李尚福，因涉及向被美方制裁嘅俄羅斯武器出口商購買軍火，被美方實施制裁。

參考

〈李尚福秦剛免職國務委員5剩3 防長懸空李同時免國家中央軍委委員〉。《明報新聞網》 (繁體中文)。喺2023-10-25搵到。
〈中國終於宣布了！李尚福被免去國防部長職務〉。《Yahoo!新聞》 (繁體中文)。喺2023-10-25搵到。
〈李尚福被免全部職務：將權力關進制度的籠子才是真正挑戰〉。《香港 01》 (繁體中文)。喺2023-10-25搵到。
〈前防長李尚福魏鳳和開除黨籍軍籍三中全會7·15舉行一日鍘二副國級〉。《明報新聞網》 (繁體中文)。喺2024-06-28搵到。

出面網頁