李潔瑩
李潔瑩（英文：Kit Li，1983年10月1號—），香港浸會大學畢業，老公係騎師梁家俊。佢係前香港賽馬會節目︰《賽馬直擊》主持之一，專業評馬人。因佢個樣同藝人李施嬅好似，而且兩個人都姓李，所以曾經被人誤會李施嬅係佢家姐。
經歷[編輯]
李潔瑩喺2004年讀緊書期間，參加咗由商業電台同亞洲電視合辦嘅「馬壇廣播新人王」比賽，喺比賽中入咗五強[1] 。比賽之後就踏入馬圈，做咗兼職賽馬主持。兩年之後轉做空姐，直至2008年因為同家人聚少離多，就放棄咗空姐工作，重返馬圈，正式投入評馬人工作。2016年10月16號，李潔瑩喺主持直播賽馬節目期間突然疑似講粗口，而有關片段更被人上載去互聯網，結果馬會將佢停職[2]。之後，李潔瑩回應傳媒話佢因為唔能夠承受太多網上嘅留言壓力，而且同老公梁家俊已經有咗生仔大計，所以佢選擇辭職。生仔之後，李潔瑩喺2018年7月同蘋果日報簽約，喺馬經版寫專欄，重返馬圈[3]。
參考資料[編輯]
- ↑ （"馬壇廣播新人王決賽五強產生｜14/09/2004 香港賽馬會 互聯網檔案館嘅歸檔，歸檔日期2009年7月15號，."）
- ↑ 人妻阿Kit否認被馬會停職
- ↑ 〈【才子配美女】鄒凱光、莎拉、阿Kit 強勢加盟《蘋果馬經》〉. 原著喺2018年7月18號歸檔. 喺2018年11月8號搵到.