杜審言

出自維基百科,自由嘅百科全書
Jump to navigation Jump to search

杜審言(約645年-708年),字必簡,祖籍襄陽(家下中國湖北省襄樊),阿爸遷居洛陽鞏縣。唐朝著名詩人。

杜審言係杜甫阿爺。杜審言好有才華,但恃才傲世。後生嗰時同李嶠、崔融、蘇味道合稱「文章四友」。唐高宗咸亨元年(公元670年)擢進士第,做隰城尉。後轉洛陽丞。武后聖歷元年(公元698年),坐事貶吉州司戶參軍。武則天好欣賞佢啲詩文,授著作佐郎,官至膳部員外郎。後來因為勾結張易之兄弟,被流放到峰州。冇耐之後召回任國子監主簿、修文館直學士。唐中宗景龍二年(公元708年)死,贈著作郎。

杜審言嘅詩多數為寫景、唱和以及應制之作,以渾厚見稱,杜甫話:「吾祖詩冠古。」工於五律,對近體詩嘅形成同埋發展,幾有貢獻。被後人評論為中國五言律詩嘅奠基者。佢嘅五律《和晉陵陸丞早春遊望》,俾明朝胡應麟讚佢係初唐五律第一。佢嘅五言排律《和李大夫嗣真奉使存撫河東》,長達四十韻,係初唐近體詩中第一長篇。