杭劇

杭劇又叫做武林調、武林班，係中國戲曲嘅一個劇種，杭劇源於宣卷，而宣卷係喺始於宋元，嚴格嚟講，宣卷唔係戲曲或者音樂，而係佛教嘅講經儀式，同宋元明嘅其他戲曲同音樂好唔同，宣卷係無樂器伴奏，淨係用木魚嚟打節拍，係一個人獨唱，好多人和唱「南無阿彌陀佛」，內容多數係勸人為善，到咗清末民初期間，已經成為自我娛樂嘅一種說唱形式。

杭劇嘅歷史只有大約一世紀嘅歷史，1923年（民國12年）幾個愛好宣卷嘅織綢工人將宣卷演唱搬上舞臺，組成民樂社，因為杭州嘅古名叫武林，所以又叫做武林班，而武林班就係杭劇嘅雛形，佢哋所唱嘅曲調有「平板」、「大陸調」、「遊魂調」、「大經調」、「小經調」、「杭州攤簧」。杭劇最初係無女演員嘅，去到1926年（民國15年）之後，先至仿效其他劇種，引入女演員，變成男女合演。去到1932年，「杭紹劇春秋社」正常成立，開始用「杭劇」呢個名。杭劇嘅代表作品有《獨佔花魁》、《銀瓶》、《蘇小小》、《李慧娘》等。

中國嘅「文化大革命」期間，《李慧娘》受到批判，影響咗整個杭劇，1968年杭州嘅杭劇劇團俾人撤銷咗。到咗1973年，中國成立咗杭劇改革組，想重新振興杭劇，不過已經太遲，無幾耐呢個改革組就解散咗。從1932年正式成立，到1985年基本上消失，杭劇經歷咗只有半個世紀左右 。