林多玫

林多玫（韓文：임다미，英文：Dami Im）係一位韓國裔嘅澳洲創作型女歌手。佢喺1988年10月17號喺韓國漢城（而家叫首爾）出世，9歲嗰年同屋企人移民咗澳洲。2010年，佢發行咗一張個人福音專輯《Dream》。2013年，林多玫參加咗澳洲嘅真人選秀節目「X音素」，最後贏咗冠軍，成為首位贏得呢個節目嘅亞裔歌手。佢贏咗冠軍之後，同澳洲索尼音樂簽咗唱片合約，被稱為「首位亞裔澳洲流行巨星」。

林多玫贏咗「X音素」之後，發行咗佢嘅冠軍單曲《Alive》，首個星期就登上澳洲單曲排行榜冠軍。之後佢推出咗一張同名錄音室專輯《Dami Im》，首個星期就奪得澳洲專輯排行榜冠軍，最終獲得澳洲唱片業協會嘅白金唱片認證。佢成為「X音素」嘅參賽者當中，首位贏咗冠軍單曲同冠軍專輯嘅歌手。林多玫嘅第三張專輯《Heart Beats》喺2014年推出，進入排行榜嘅前十位，其中兩隻單曲《Super Love》同埋《Gladiator》亦進入排行榜嘅前二十位。

2016年，林多玫代表澳洲參加咗喺瑞典斯德哥爾摩舉行嘅歐洲歌唱大賽，憑住歌曲《Sound of Silence》獲得咗當屆大賽嘅亞軍。佢亦係首位參加歐洲歌唱大賽嘅韓裔歌手。

響2023年9月到11月播映嘅第五季蒙面歌手，佢演出嘅『雪狐』就嬴咗冠軍。