林繼賢
林繼賢（John Lam，1959年－）係香港首位被稱為小丑藝術家嘅義工[1]。佢係天主教徒，結咗婚，有一仔一女。
生平
[編輯]林繼賢祖籍廣東（但佢話過自己係水上人[2]），細個喺新界住同埋讀小學，阿爸係公務員。1973年經小學升中試被派到黃大仙嘅中華基督教會扶輪職業先修學校（家下嘅中華基督教會扶輪中學）。1974年學校由東頭邨借用嘅基協實用中學搬到樂富龍翔道157號，佢亦跟隨到新校址上堂，至1976年中三完成電工專科畢業，係該校第二屆傑出校友。
畢業後加入荃灣嘅南海紗廠（而家嘅麗城花園即九咪半舊址），並參加工業學院嘅技工學徒計劃。1970年代尾結婚並加入政府機電署工作，長期喺香港太空館同紅磡體育館度做。
表演生涯
[編輯]林繼賢讀中學嗰時，表演天分已經表露無遺，參加咗話劇表演。熱心助人，班嘅同學同埋老師都好鍾意佢，而且，係全校都識嘅紅學生。
工作後仍然以佢嘅專長：電器維修協助有須要人士，但因為要長期輪班工作，冇辦法正規進修。到1999年終於響上級支援協助下，開始讀專業文憑，為晉升做準備。只係響2003年SARS後政府為咗減少支出，推出自願退休計劃。2004年林繼賢參加咗呢個計劃，離開工作24年嘅工作崗位[3]，全身投入佢嘅小丑義工生涯。其實喺之前，佢已經自學小丑表演協助有需要人士，其中以林建明（大姐明）創立嘅「心晴行動」為代表。
近年嘅小丑表演教育：2005年為香港金鐘青年獅子會為國際獅子總會港澳 303 區青年獅子會之屬會嘅《小丑義工兵團》導師 [4]。2007年為法住文化書院「茶禪」系列，組織同埋主講「小丑、魔術與生命的空間」[5]。2010年參加香港中文大學教育學院教育學士課程教育沙龍「開心教．快樂學」嘅導師 [6]。
林繼賢除咗自學小丑表現藝術，響全港各地組織小丑義工隊外，重響大學（例如嶺南大學、香港中文大學）同埋大專組織教授小丑表演技術，因此被稱為小丑藝術家，有別於坊間嘅小丑表演者。
參考
[編輯]- ↑ 〈青。專題〉。原著喺2012年10月19號歸檔。喺2011年12月24號搵到。
- ↑ 〈小丑叔叔林繼賢 喜樂生命傳愛心〉。原著喺2016年3月4號歸檔。喺2012年12月23號搵到。
- ↑ 〈金巴崙長老會耀道中學：人物專訪〉 (PDF)。原著 (PDF)喺2013年10月20號歸檔。喺2011年12月24號搵到。
- ↑ 〈「小丑義工兵團」〉。原著喺2020年5月1號歸檔。喺2011年12月24號搵到。
- ↑ 〈「法住文化書院 週六「茶禪」」〉。原著喺2013年10月22號歸檔。喺2011年12月24號搵到。
- ↑ 教育沙龍