楊志雲家族
楊志雲家族係香港一個商人家族，祖籍廣東中山，奠基人楊志雲最初做金舖起家，後來又涉足鐘錶珠寶、旅遊、酒店、地產同證券範疇，百足咁多爪，目前家族喺世界各地仍然有唔少物業收租。
歷史
[編輯]楊志雲喺1916年出世，細個響中山縣立師範學校讀書，之後喺大陸做金舖生意。到1949年，楊志雲喺香港成立景福金行，最初淨係做打金同買賣金條，之後憑住成色高嘅999金條打響名堂。
1957年，楊志雲等人收購原本屬於西班牙天主教會嘅美麗華酒店，開始涉足酒店業；差唔多呢個時期，楊志雲亦都開始經營地產業務，喺港九各地起咗唔少樓，到1970年，佢同珠寶行家鄭裕彤、冼為堅等人創立新世界發展，鄭裕彤做主席，而楊志雲就係副主席，一路做到佢過身。
1985年，楊志雲因為中風過身，終年72歲，佢有5個仔，但係佢哋對喺香港嘅家業都冇乜興趣，心力都擺喺揸住一堆海外物業嘅私人家族公司楊志誠置業[1]，最後由大仔楊秉正頂住先，並且一路放風話想賣走美麗華。
1988年，楊家將景福集團上市。
到1993年，美麗華先後由長實同中信泰富同埋恒基收購，喺一輪收購戰之後，楊家決定將34%美麗華股權賣畀恒基，有傳原因之一係長實同中信泰富喺收購之後打算將美麗華「拆骨」，而楊秉正同楊志雲夫人就想保留楊志雲一番心血，而恒基老闆李兆基應承咗呢個要求，事實上，楊秉正的確喺賣盤後繼續打理美麗華酒店，直到1995年過身。[2]
1995年，楊秉正因心臟病發突然過身，景福主席由孻仔楊秉樑去做；美麗華就改由李兆基做主席。根據楊秉正生前所立嘅遺囑，遺產會分畀老婆洪玲君同埋慈善基金[3]，但一直有圍繞遺產嘅官司，包括追返楊秉正生前借落嘅債[4]、老婆洪玲君同遺囑執行人互告對方[5]，2001年更加發生生前情人揸住遺囑附錄，要求分身家等。
2016年，出任景福主席好多年嘅楊秉樑宣佈因為個人業務而辭職，由大佬楊秉堅接任，但係過冇半年，楊秉堅就已經病死，景福之後喺2017年就交畀鄧日燊（鄧肇堅個仔）做主席，佢亦係第一個非楊家嘅人做景福主席，同一年，楊嘉成成為景福嘅執行董事，係第一個入去景福做嘅第三代，不過佢到2020年已經辭任，目前景福董事局入面嘅楊家成員得返女婿王渭濱。
資產
[編輯]家族樹
[編輯]參考
[編輯]- ↑ 〈家族擁紐約第五大道物業〉。《e123長青網-長者服務及老人院資訊》 (繁體中文)。喺2023-10-25搵到。
- ↑ 〈笑言「眼光麻麻」投資 四叔昔日收購美麗華 贏誠哥因一個承諾？｜巨子 ICON〉。《巨子 ICON》 (香港中文)。2021-04-17。喺2023-10-25搵到。
- ↑ 〈稱手持93年遺囑附錄 楊秉正情人獲遺產 | 蘋果日報•聞庫〉。《聞庫》。2009-03-16。喺2023-10-25搵到。
- ↑ 〈商人入稟向楊秉正追債 - 大公報〉。《大公文匯 www.tkww.hk》。喺2023-10-25搵到。
- ↑ 〈太 陽 報 網 頁〉。the-sun.on.cc。喺2023-10-25搵到。