提款機

一部NCR Personas 85-Series系列嘅多功能提款機，喺美國、香港等地都好普及。

自動櫃員機之一存支票機

提款機，又叫櫃員機、自動提款機、自動櫃員機（譯自英文Automated Teller Machine，簡寫ATM），係一可以做到銀行櫃員攞錢工作嘅機，唔單止提款，部機可以畀客人做入錢，轉賬等等唔同交易。提款機其實係部電腦通訊裝置，駁埋銀行中央電腦系統。用提款機攞錢叫㩒錢，因提款機要㩒制先攞到錢。

提款機係銀行第一種畀客自己用嘅機器，之後重有打簿機、轉賬、入錢機同入票機，減省銀行櫃員工作，長遠亦都幫銀行慳人工錢。

歷史

1967年6月27號，英國人 John Shepherd-Barron 將世界第一部電腦自動提款機，安裝喺英國倫敦北部嘅柏克萊銀行 Enfield 分行。佢係見到朱古力售賣機嘅意念，設計自動提款機。佢喺2004年得到英女王頒授帝國員佐勳章。

而當時發明同生產提款機嘅公司，係英國印鈔公司之一 De La Rue。

基本功能

提款機基本上係一部電腦，有讀咭機，讀取磁咭或智能咭上面嘅客戶資訊，同埋一個鍵盤，用嚟輸入交易資料。另外有部顯示器，會寫出命令同資訊，重有部打印機印收據，同埋一部駁住夾萬嘅銀紙發放機。

而提款機可以用來查戶口資料、提款、找數、申請支票簿同月結單，兼且可以改戶口密碼等基本功能。

特別櫃員機

近年銀行為咗慳返啲人手，推出咗一啲只會負責存款嘅櫃員機。例如掃描支票影像嘅入票機，同埋快速畀人存現金嘅自動存款機等。呢類機一般無咗銀紙發放機，亦無咗轉賬嗰啲功能。但會有掃描器，用嚟掃描入嚟嘅支票同銀紙，同埋存放收返嚟嘅支票同銀紙嘅夾萬。

軟硬件

典型現代櫃員機嘅構造圖

作業系統

一部法國嘅櫃員機用緊Windows 2000開機

呢家嘅自動櫃員機用嘅作業系統同一般電腦差唔多，包括咗 UNIX 家族嘅作業系統，例如 Linux，亦有櫃員機用 Microsoft Windows，而家重有唔少舊款提款機用緊 OS/2 以及 RMX。

除咗傳統嘅作業系統，而家亦都有公司，用 Java 作為提款機嘅作業環境。

以匯豐為例，全線ATM已經喺2007年7月由 OS/2 嘅作業系統轉為 WinXP，並且加入自動修復嘅功能。當硬件有問題發生，軟件會發出指令更正有關錯誤，令服務不致於中斷。

保安措施

智能卡

新一代嘅櫃員機裝有智能卡讀卡機，儲喺智能卡晶片裏面嘅客戶資料全部經過加密，防止黑客嘅入侵。

生物認證

有啲日本銀行嘅櫃員機，已經用到指紋等生物認證技術，比密碼，以至加密咗嘅密碼，更能夠防止黑客嘅入侵。

保安問題

雖然呢家嘅自動櫃員機，都有唔少嘅保安功能，但係始終有啲保安上嘅問題，仍然需要去解決。

黑客襲擊

由於IBM唔再推出OS/2，令唔少原本用開OS/2嘅櫃員機要改作業系統。由於唔少櫃員機改咗用Windows作業系統，加上唔少銀行嘅櫃員機網絡會用IP做骨幹，會令櫃員機有機會成為黑客嘅目標。

磁帶保安

香港同埋巴西，都發現過賊仔，靜雞雞響櫃員機讀卡機度加多咗個磁帶閱讀器，重用呢個閱讀器，拎到第啲客戶卡上嘅資料，再配合偷返嚟嘅密碼，透過櫃員機網絡偷錢。

假銀紙

世界各地銀行負責營運嘅提款機極少會出假銀紙，但喺中國，有唔少存戶試過喺銀行提款機收到假銀紙。呢種嘢無得防，只可以報警。