永安百貨 (上海)

  想搵第二個意思嘅話，請睇永安百貨。

上海永安公司
永安公司倚雲閣
所在國家	中國
所在地點	上海市南京東路635號
建築師	公和洋行
動工日期	1916年
完工日期	1918年
建築成本	200萬港元
建築風格	折衷主義

上海永安百貨公司，簡稱係上海永安公司、永安百貨，係上海南京路度嘅一家老牌百貨公司。喺1918年9月5號落成投入營運，主營環球百貨。

規模

開業時設嘅商場有4層，營業面積0.6萬幾平方，經營品種一到兩萬種。仲兼營大東旅社、大樂酒樓、天韻樓遊樂場、永安保險公司等公司業務。

史

揀地軼事

喺1915年永安公司委託咗郭泉、郭葵去上海搵地方起環球百貨公司。嗰時永安初步揀定咗南京路日升樓傍嘅地皮，然之後請咗兩人帶咗兩個袋，其中一袋係入咗啲豆，人去到南京路就企兩旁，逢嚫有途人行過就會放粒豆去空袋。經過段時間嘅調查，認為南京路南嘅市面過往途人多啲，市面熱鬧啲。於是乎，永安就揀咗先施公司對面去起新嘅百貨商廈。

租地軼事

進入咗1910年代之後，哈同成為咗南京路沿線地產最多嘅持有人。永安公司揀中嘅南京路浙江路西南角嘅八畝地皮，都係哈同名下嘅。哈同嘅開價係年租白銀五萬兩。而唔同對面馬路嘅先施公司，雖然同樣係哈同嘅地皮，但對面到期後大樓係賣咗俾雷氏德洋行，而永安使用幅地30年後，就要將物業無償轉俾哈同洋行，條件係極之苛刻。但永安嘅創始人郭樂認為30年後，永安仲可以喺呢度賺返20噸黃金，所以接受咗哈同洋行嘅報價。

發展

喺1916年4月，上海嘅永安公司就咁開咗工。兩年後，上海永安百貨委託公和洋行設計嘅大樓落成。1918年9月5號，南京路635號嘅永安百貨正式開業。嗰陣時嘅永安百貨係沿著南京路底層設置櫥窗，創上海百貨沿街櫥窗嘅先河。

1966年，永安公司招牌被砸掉。

到1946年永安公司同哈同洋行嘅30年租約到咗期，而公司利用咗哈同、羅迦陵兩人相繼過身，啲仔女仲大打咁遺產案嘅契機，使咗112.5萬美金買低返幅地嘅產權。

中共建政後，1956年1月永安公司被公私合營。1966年改名國營東方紅百貨商店，隨後再改名上海市第十百貨商店，到1988年改名華聯商廈。永安新廈就改做「華僑商店」，喺中國大陸開放外匯兌換前，係上海少數可以用外匯券去買配給以外啲物資嘅商戶。2005年4月，華聯商廈改返叫「永安百貨有限公司」，而實際成為咗國有企業百聯集團下屬嘅子公司，同原本嘅香港永安經已冇嗮關係。

建築物

老永安公司
上海市文物保護單位
喺邊	上海市黃浦區
類	近現代重要史跡及代表性建築
時代	1918年
冧	5-14
登錄	1989年9月25號
地圖

永安公司嘅樓宇係有六層高，局部地方係七層高。嗰陣時嘅公和洋行係照著折衷主義嘅風格去設計。大樓嘅平面總體係長方形，而東北角正門處就係弧形。沿著南京路側係設有十個大玻璃櫥窗，仲有三道愛奧尼克柱式大門。

二樓以上，均有伸出去嘅鑄鐵欄河長廊同露臺。建築外牆係用水磨石敷面，頂樓就有兩層高塔樓，個名叫倚雲閣。喺1987年後，業主一度喺正門上方安咗30米高嘅反光玻璃幕牆，嵌埋「華聯商廈」四隻大字。到咗2005年永安百貨復名時，同大樓搞返大整修，拆咗1987年安嘅玻璃幕牆，原被後移嘅底層櫥窗就恢復返原樣，同時又修復返外部嘅鑄鐵欄河、露臺、窗花等嘅式樣。頂樓嘅花園都修復返咗。

外文名

上海嘅新國有永安百貨英文用普通話拼音“Yongan”，而唔係永安公司一路用開嘅粵式郵政式拼音“Wing On”，同其他啲公私合營後嘅國有企業嘅做法相同。