籌碼

籌碼

籌碼係賭博嗰陣時用嚟代替現金嘅用品。現時，細額嘅通常整成圓形膠餅仔，大額嘅一般為大塊啲嘅長方形膠餅；舊時，有好多其他質地同形狀嘅品種流行過。

澳門賭場

賭場籌碼往往帶有精密科技，包括藏喺裏面嘅電子晶片，以及見於外面嘅防偽特徵。

現金碼

現金碼係最常見嗰種，用來賭錢或者換成同面值相等嘅貨幣都得；因為賭客可以直接同賭場買賣現金碼，次次都唔使蝕水，所以又叫生碼（粵拼：saang1 maa5）。

有唔少賭場之內及附近嘅舖頭，乃至於的士司機，都願意接受顧客用現金碼嚟埋單。

泥碼

泥碼以前可能為淺泥黃色，或者因而得名——係種只可以用來落注嘅籌碼，因此又叫死碼。

家陣澳門賭場會用略低於面額嘅價錢賣泥碼畀疊碼仔，等渠哋用面值價轉賣畀所屬賭廳入面嘅賭客，來食叫做碼佣嘅中間差價，作為拉客嘅部分酬勞；用泥碼落注之後，若果贏咗，荷官會將增加嗰部分，換算成現金碼去派畀賭客，原本押落去嗰啲唔會被換成現金碼；用泥碼賭輸咗，就當然會收歸賭場啦；亦有啲疊碼仔會畀少過其面值好多嘅現錢過賭客去買泥碼。

顧客有時亦都會喺營銷活動之中直接由澳門賭場度得到泥碼，因此佢又叫推廣碼。

林鳯娥响二十世紀七十年代將泥碼引入澳娛，由賭場經疊碼仔賣畀賭客，用於賭廳；喺當時，用嚟落注嘅泥碼，會喺該局俾荷官全部收走，只要中獎，賭客收返嘅一律係現金碼。响一九八〇年，澳娛開始揾疊碼仔等人帶賭團；响二十世紀八〇年代，周錦輝增加其數目及出發地。响二十世紀八〇年代，謝肇鴻將泥碼嘅用法改成而家噉樣，令到同數額嘅泥碼銷售，帶嚟比以前更多嘅投注；其他地方陸續跟風。