泰拳

泰拳選手

少年泰拳比賽

女子泰拳比賽

泰國小學生示範泰拳

泰拳（泰文：มวยไทย）係泰國嘅傳統搏擊技術，特點係可以喺極短嘅距離之下，運用拳頭、腳、膝頭、手踭進行攻擊，係一種非常注重實用性同極具殺傷力嘅武術。

泰拳分類

泰國武學源於幾百年前，統稱泰拳，原本只有一種形式，隨住時間同地區嘅差異出現咗幾種派系同分類。

古泰拳

細分為南部風、東部風格、中部風格、北部風格、北部風格清邁分支等等。

擂台泰拳

有專業拳手（唔戴頭套，只戴拳套）同業餘拳手（有戴頭套同拳套）兩種。

表演泰拳

有傳統禮法同飾物。

健身泰拳

冇制服、傳統禮法、招式同飾物，唔係為格鬥只係為咗健身。

平民泰拳

冇制服、傳統禮法、招式同飾物，一切從簡。

街頭泰拳

冇制服、傳統禮法同飾物，招式兇狠，戰鬥為主，源自20幾年前嘅監獄時期，而家已經失傳。

傳統泰拳

由街頭式、擂台式同埋三種古泰拳整合而成，有制服，禮法，飾物同古招式。

起源

當代學者對泰拳嘅歷史同起源都有啲爭論。歷史上，泰國曾經同緬甸發生過幾次戰爭，好多同泰拳有關嘅歷史資料喺古代緬甸軍隊攻陷阿育陀耶王朝都城嘅時候已經遺失。

同其它各類技擊術一樣，泰拳嘅產生同發展亦必然經歷咗由低級到高級、由簡單到複雜嘅過程。人類喺進化、發展嘅過程當中，無可避免會受到野獸或者人類內部嘅敵人襲擊。為咗保障自己嘅安全，人類運用身體各部位嘅本能對襲擊自己嘅野獸同敵人搏鬥，噉樣就產生咗原始嘅攻防動作。泰民族嘅祖先將自己嘅思想同喺生活經驗當中獲得嘅知識，同攻防嘅具體實踐結合起嚟，並進一步提煉，於是形成咗具有佢哋民族特色嘅徒手搏擊技術體系。

從前，泰拳手喺搏鬥嘅時候用粗棉繩將雙拳綁到好似鎧甲噉，並喺拳峰嗰度紮成結，然後將雙拳浸喺粘液度，再撒上碎玻璃嘅砂礫，令到雙拳表面非常粗糙。後嚟呢種方法逐漸停止使用，而用拳擊手套代替。二十世紀初，玫瑰園廣場設立拳台之後，泰拳就成為一項具備一系列規則嘅體育運動，拳台地板由木質材料製成，喺上面鋪以用燈芯草做成嘅墊，拳手着短褲比賽。比賽以分鐘嚟計時，設有一名裁判。

泰拳正式傳入中國，要追溯到20世紀90年代末。1998年，喺泰王國駐昆明總領事館嘅積極幫助之下，職業泰拳教練首次通過泰國官方途徑進入中國教授泰拳，令到中國武術界能夠更方便、深入了解泰拳。

訓練特色

泰拳手通常自細就開始接受訓練，每日練習八個鐘，當中包括各種體能、重量、反應、技巧嘅訓練，有啲訓練方法相當艱苦，例如受訓者要將雙手舉高，教練會用旋踢踢受訓者嘅兩脅；或者用拳擊打，以訓練拳手嘅抵抗能力；另外有人直接用鋼棒擊打手臂同小腿，訓練佢哋骨頭嘅堅硬程度。由於泰拳技術比較具有實用性，好多混合式武術（Mixed Martial Arts）選手都會學泰拳。

技術分類

泰拳擂台技術主要包括拳法、肘法、膝法、腿法：

• 拳法：正拳、擺拳、勾拳；
• 肘法：頂肘、挑肘、斜肘、掛肘、擺肘、撞肘、朵肘；
• 膝法：撞膝、飛膝、砸膝、彈膝、側膝；
• 腳法：前蹬、側蹬、後蹬、正蹬、前踢、側踢、後踢、正踢、掃踢、鏟踢、旋踢、後旋；
• 步法：進步、退步、閃步、衝刺步、急退步、環繞步、前滑步、後滑步。

泰拳嘅基本招法劃分為兩大類，母招同子招，各有15項：

• 母招：魚牙交錯、飛鳥掀巢、爪哇投矛、依諾刺劍、舉須彌山、老僧掐瓜、孟人撐柱、插木釘、鍔魚擺尾、折象鼻、扭蛇尾、飛鳥還巢、滅油燈、魔王捉猴、折象頸。
• 子招：神象擊齒、抹面腿、魔王偷女、羅摩射箭、獅子越澗、鹿回頭、山神卷土、蛟龍潛海、神猴獻戒、越人撒網、泰也撐柱、天鵝折翅、扎花環、老僧掃院、切瓜。

拜師拳舞

比賽前儀式

源於古泰拳，擂台式泰拳比賽正式開始之前，泰拳手會喺音樂伴奏之下表演拜師拳舞，祈求平安以及表示對父母同師長嘅敬意，同時亦透過拜師拳舞嚟進行熱身。

常見嘅拜師拳舞（拜神敬師拳舞禮）有「四面梵天」、「少女抹粉」、「天鵝飛翔」、「羅摩逐鹿」、「鷹神展翅」、「猴神撥雲」、「象神揺鼻」、「猴神射箭」、「勇士磨刀」、「美人照鏡」等動作。

伴奏樂器

泰拳比賽要有音樂伴奏。伴奏音樂通常由四位樂手演奏，用嘅樂器包括有爪哇笛（ปี่ชวา）、印度式雙面鼓（กลองแขก）、鑔（ฉิ่ง）、鑼（ฆ้อง）四種。

護具

泰拳手用嘅護具有「蒙坤」（มงคล）同「巴加」（ประเจียด），係一種結繩而成分別配戴喺頭部同上臂，源於古泰拳喺古時候呢樣嘢經過泰神師傅（法師）念咒劃符作法會起到護身作用，泰神教中有幾種密符経咒例如Kata Mahamonkum、Kata Maahwu、Namapattat等，最高等級可以刀槍不入。現代擂台比賽之前，多數只係作為一種儀式，泰拳手頭戴「蒙坤」行拜師拳舞，向恩師表示敬意。拳舞完畢之後，「蒙坤」由教練或經理人喺第一回合比賽開始之前除咗佢。