港人首次置業先導計劃

港人首次置業先導計劃（"Starter Homes" Pilot Scheme for Hong Kong Residents），又叫港人首置上車盤，係香港2017年由時任行政長官林鄭月娥提出嘅一項房屋政策^[1]，對象係唔符合買居屋資格嘅中產家庭，畀佢哋用低過市價嘅價錢首次置業。

根據2017年施政報告嘅介紹，港人首置上車盤嘅土地來源會係私人發展商擁有或由政府買返嚟嘅地。交畀發展商起樓嗰陣，會用地契條款要求發展商作混合發展，同時提供私人房屋單位同埋首置單位。首置單位出售對象資格由政府規定，包括要係居港滿七年嘅香港居民，從未喺香港置業，收入限額係居屋收入限額再加三成之內，轉讓年期限制亦會比居屋嚴謹。報告亦提到已經喺觀塘安達臣道預留一塊地推行港人首置上車盤。

2018年6月，當局為咗加快推出港人首置上車盤，宣佈同市區重建局達成協議，將土瓜灣馬頭圍道/春田街重建項目（即係而家嘅煥然懿居）嘅其中450個單位轉做港人首次置業先導計劃頭一個項目，喺同年底開賣，預計2020年入伙。