港式日本料理
港式日本料理係指一啲本來來自日本嘅料理，來到香港之後本地化，演變出嚟嘅菜式，算係融合菜嘅一種，香港飲食文化嘅一部分。
特色
[編輯]有別於傳統日本料理餐廳，有啲港式日本料理未必會好講究環境，反而會有「超值推介」易拉架、財神吊飾、「大吉」揮春等等香港好多餐廳有嘅元素，甚至環境有啲嘈雜[1]。
佢哋會攞咗一啲日式嘅元素，混合本地特色做法。有啲會成為個別餐廳受歡迎嘅招牌菜[1]，但亦有啲係亂嚟[2]。其中明將壽司可以話係其中一個表表者，事關佢哋會將任何可能嘅食材都會擺落壽司飯上面，有時甚至會成為媒體同網民嘅話題[3]。有日本網民喺2014年來港嘗試明將壽司，形容進食嘅時候「感到地獄之門打開咗」[4][5]。
另外，日式放題喺香港亦非常流行，任點任食嘅嘢食，除咗一般日式食物魚生刺身、壽司，串燒之外，有時亦會提供泰國，韓國等地嘅小食主菜[6]。
發展
[編輯]早期喺香港嘅正宗日本料理唔多，主要係居港日人幫襯。但隨著日本經濟下滑，居港日人數目喺1997年前後開始大幅下降，喺90年代開業嘅日本料理都係針對本地食客[2]。
喺2019年10月，蘋果日報訪問咗一間喺佐敦渡船角經營嘅港式日本料理餐廳老闆。受訪嘅老闆話，呢啲港式日本料理嘅出現，好大程度係因為百分百日本人口味未必啱香港人口味。於是，港式日本料理嘅廚師就會將一啲日本嘅特色食材，混合自己嘅創意，推出一啲新嘅菜式[1]。
元綠迴轉壽司、加太賀同埋明將壽司，可以話係日本料理喺香港嘅始祖[2]。元綠當時仲同無綫電視合作，喺綜藝節目《超級無敵獎門人》入邊開創一個名為「辣辣壽司邊個食」嘅遊戲環節，加上用咗成龍，Twins等等知名藝人幫手賣廣告，令到當時未盛行嘅日本菜逐漸成為潮流[7]。另外，日本料理喺香港開始流行嘅早期，有啲人會喺食魚生刺身嘅時候，蘸上大量用芥末及醬油混成嘅糊狀物[2]。
踏入千禧年後，壽司店喺香港就如雨後春荀噉湧現，例如板長、板前、爭鮮同埋一壽司等等[7]。另外，日式放題亦成為咗香港人同朋友聚餐其中一個主流選擇[6]。
不過，隨著香港人對正宗日式料理認識多咗，一啲質素低劣嘅港式日本料理亦逐漸退場。例如，最後一間位於天水圍嘅元綠壽司喺2016年2月底執笠[7]，明將壽司最後一間位於沙田分店就喺2020年4月結業[4]。
參考
[編輯]- ↑ 1.0 1.1 1.2 〈【佐敦日本菜】開朗少女遇俊俏大廚 夫婦攜手走過20年 自創鮮蝦膠黃金屋 熟客貪無規無矩 ｜ 蘋果日報〉。《Apple Daily 蘋果日報》 (香港中文)。原著喺2021-02-28歸檔。喺2021-02-25搵到。
- ↑ 2.0 2.1 2.2 2.3 〈專題 – 從加太賀的盛衰看香港日本料理的變遷 | Jason 的虛擬世界〉 (臺灣中文)。喺2021-02-25搵到。
- ↑ 〈【放榜食餐勁】那些年打過的大佬！明將壽司創意回顧合集 - ezone.hk - 網絡生活 - 網絡熱話〉。《ezone.hk 即時科技生活》。喺2021-02-25搵到。
- ↑ 4.0 4.1 〈【暗黑料理】明將壽司最後一店結業 回顧五大伏味濃終極壽司 ｜ 蘋果日報〉。《Apple Daily 蘋果日報》 (香港中文)。原著喺2021-02-28歸檔。喺2021-02-25搵到。
- ↑ 鍵盤大檸檬。〈殺人級別的明將壽司，味道到底如何？ | | 鍵盤大檸檬 | ETtoday新聞雲〉。www.ettoday.net (繁體中文)。喺2021-02-25搵到。
- ↑ 6.0 6.1 新假期 (2019-12-13)。〈【放題推介2019】10間日式放題最強地區合集 旺角/銅鑼灣/尖沙咀/觀塘/荃灣都有｜區區搵食 | 飲食〉。《新假期》 (美國英文)。喺2021-02-26搵到。
- ↑ 7.0 7.1 7.2 〈大家仲記得元綠壽司嗎?〉。fanpiece (中文)。喺2021-02-25搵到。