港通控股
港通控股有限公司（港交所：00032）係一間做交通基建項目投資嘅控股公司，投資項目包括隧道營運，經營駕駛訓練學校，同埋電子道路收費系統。公司主席兼董事長係張松橋。
港通控股喺1965年4月26號成立，當時叫做香港隧道有限公司，有興建同埋經營紅磡海底隧道30年嘅專營權。1974年7月30號喺香港聯合交易所正式招股上市。
港通控股嘅大股東係渝太地產集團（港交所：00075），截至2011年5月，所持權益約莫41.66%。
公司改名
[編輯]由於紅磡海底隧道嘅專營權已經喺1999年8月31號完咗，為免公眾投資人士對公司嘅主要業務概念產生混淆，公司喺2000年5月17號正式改名做「The Cross-Harbour (Holdings) Limited」，再喺2005年6月7號改成「The Cross-Harbour (Holdings) Limited 港通控股有限公司」。
紅磡海底隧道嘅專營權完咗之後，港通控股重有透過另一間聯營公司香港運輸物流及管理有限公司（前稱「香港隧道及高速公路管理有限公司」），根據同香港政府續簽嘅「管理、營運和維修保養」合約，為紅磡海底隧道提供管理服務。
其他投資
[編輯]港通控股連同佢嘅全資附屬公司持有西區隧道有限公司50%股權。間公司擁有由1993年至2023年興建同埋經營西區海底隧道30年嘅專營權。
2008年，港通控股收購大老山隧道有限公司39.5%股權。間公司擁有由1988年至2018年興建同埋經營大老山隧道30年嘅專營權。
另外，港通控股持有香港駕駛學院有限公司70%股權。香港駕駛學院喺香港經營三間駕駛訓練學校。
港通控股重持有駕易通有限公司70%股權。駕易通有限公司持有快易通有限公司50%股權，而快易通提供嘅電子收費設施覆蓋香港11條收費道路同埋隧道。