游念慈
游念慈（又叫賽鳳凰）係無綫電視電視劇《皆大歡喜》入面一個角色，由薛家燕飾演。
古裝版游念慈[編輯]
大明嘅游念慈信守言諾、公正不阿、不拘小節、重道義、機智、深得眾人敬畏。由於出身草莽、有江湖人嘅豪氣、閱歷多、武功了得、但係深藏不露，唔到重要關頭都唔輕易出手。但係有時亦有小女人嘅性格，做事好有原則：人不犯我、我不犯人，人若犯我、有仇必報。
游念慈未嫁前外號「賽鳳凰」，武功高強，劫富濟貧，機緣巧合遇到金華（羅樂林飾），佢老婆游淑娟作動，游念慈硬住頭皮幫娟接生，娟生咗三胞胎之後死咗，游念慈其後鍾意咗金華，決定將三胞胎年、月、日養育成人，當作己出，自此金盤洗手，脫離黑道，做返正行。後來金華病死，游念慈見游淑娟親細佬游念富（阮兆祥飾）孤苦無依，於是隱姓埋名帶住年、月、日同埋富去到池力共鎮落腳，開咗一間食店「洞蜜園」，由於經營得法，親力親為、客似雲來。
時裝版游念慈[編輯]
現代版嘅游念慈喺1973年18歲中學畢業後就加入警界，經歷過寶生銀行劫案、英女皇訪港、地鐵通車、東區走廊通車百萬行等等。1985年嫁畀茶餐廳老闆金華，退出警界，前後任職警隊12年。由於游念慈係當年嘅警花，追求者眾，其中好多舊史嘅伙記已經成為今日高官，故此多年後嘅今日游念慈喺警界入面重幾吃得開。
游念慈嫁金華做繼室之後，專心幫金華打理洞蜜園茶餐廳，同埋照顧金華前妻留低嘅三個仔女年、月、日。其後金華死咗，游念慈獨力撫養年月日三人。
