東區走廊

Island Eastern Corridor; 東區走廊
	響太古城附近嘅東區走廊
基本資料
總長度	8.6公里
車速限制	70公里／小時
所在地區	香港香港島
起點	灣仔區銅鑼灣; 維園道
終點	東區柴灣; 柴灣道 / 環翠道
歷史資料
通車日期	1984-89年
地圖

東區走廊（Island Eastern Corridor）係香港 4號幹線嘅一部份，沿住香港島嘅北面海岸起，連接銅鑼灣同埋柴灣。全線係三線同部份四線雙程嘅分隔公路，主要係高架道路。車速限制淨係得每小時70公里。

歷史

東區走廊嘅興建，主要係為咗取代車流飽和嘅英皇道、筲箕灣道同埋柴灣道，成為連接東區同香港島中心地帶嘅主要通道。呢條公路喺1968年倡議興建，1976年展開咗詳細設計工作，並喺1978年至1981年期間開始填海同埋相關嘅工程，並且分成四階段嚟起，喺1984年首期通車，1989年先至全線通車。

現況

東區走廊全長8.6公里，由香港海底隧道附近嘅銅鑼灣維園道開始，經過咗1公里同中環灣仔繞道交匯後，之後就以2.1公里長的架空道路兜過銅鑼灣避風塘，然後經炮台山同埋北角到鰂魚涌，之後落返地面。呢個部份係太古城交匯處，同2號幹線嘅東區海底隧道交匯。跟住嘅3.5公里路段又係架空道路，檻過愛秩序灣到筲箕灣，再經過阿公岩去到香港海防博物館，之後又再落返地面到柴灣。

改善工程

2000年7月，政府喺鰂魚涌同埋太古城一段嘅東區走廊進行改善工程，嚟舒緩往來東區海底隧道嘅交通。工程包括喺海旁加建一條兩線嘅高架橋嚟做去柴灣嘅東行線，原本嘅三線東行就改做兩線通去東區海底隧道，讓出咗一條線改咗做西行。太古城交匯處亦都進行咗改建，加建多條行車線，令鰂魚涌至到西灣河一段嘅東區走廊成為四線雙程。工程喺2003年7月搞掂。

未來發展

建議緊嘅中環灣仔繞道，會連接到東區走廊，而家連接維園道嘅一段可能要重建嚟配合未來道路嘅發展。

睇埋

干諾道西天橋：俗稱「西區走廊」