湯馬士·克蘭麥

湯馬士·克蘭麥
出生日	1489年7月2號
出生地	Aslockton
死亡日	1556年3月21號  （66歲）
死亡地	牛津
死因	火刑
國籍	英國
識嘅語言	英文
信奉	聖公宗、天主教會
學位	Doctor of Divinity
母校	Jesus College、抹大拉學院、劍橋大學
職業	Anglican priest、神學家、canon law jurist、天主教嘅主教、大主教、Protestant reformer
僱主	劍橋大學
配偶	Margaret Cranmer
亞爸	Thomas Cranmer
亞媽	Agnes Hatfield
[改維基數據]

湯馬士·克蘭麥（Thomas Cranmer，1489年7月2日－1556年3月21日）係英國一位神學家，亦都係當地宗教改革嘅領袖，並且喺亨利八世、愛德華六世同埋瑪麗一世統治期間做坎特伯里大主教。他喺英國聖公會裡面視為殉道者。

克蘭麥幫手提出亨利同埋阿拉貢凱瑟琳婚姻無效嘅理據，哩個後尾成為咗英國教會同羅馬教廷分家嘅其中一個的原因。佢同湯瑪斯‧克倫威爾一齊支持王權至上嘅原則，認為國王喺佢嘅領土內對教會擁有最高話事權，保護人民唔再受羅馬教權嘅欺負。喺佢做坎特伯里大主教嘅期間，佢制定咗英國教會改革後嘅第一套教義同禮儀架構。喺亨利統治底下，由於保守派同改革派之間嘅權鬥，克蘭麥對教會未能夠做到太多激進改革。佢後尾出版咗第一部官方批准嘅當地語言崇拜文，叫做《勸勉與禱文》。

當出晒名虔誠嘅愛德華登基之後，克蘭麥可以嗱嗱臨搞改革。佢寫咗並且編輯咗頭兩版嘅《公禱書》，為英國嗰邊嘅教會提供咗完整嘅禮儀，並遷就當地人講嗰啲話。佢收留好多位歐洲大陸嘅宗教改革家並且庇護佢哋，喺聖餐、神職人員獨身、禮拜場所裡面啲聖像呀，同埋聖徒崇敬等方面推動教義或者係規範上嘅改變。克蘭麥透過《公禱書》、《講道集》同埋其他出版物宣揚佢主張嘅新教規。

喺天主教女王瑪麗一世登咗基之後，克蘭麥因為叛國同異端罪畀人拉去審。佢坐咗超過兩年監，並且喺政府同埋教會嘅壓力底下多次收返佢嘅主張，曾經一度同天主教會好返。雖然咁樣可以令到佢避過異端罪嘅處斬，但瑪麗女王仍然唔放過佢，並且以叛國罪要求處死佢。佢最後喺1556年3月21日俾火刑處決咗；喺行刑嗰日，佢公開收返先前嗰份聲明，以天主教眼中嘅異端身份被處決，不過就成為咗英國宗教改革嘅殉道者。克蘭麥嘅死寫咗喺本《福克斯殉道者列傳》裡面，佢對世人嘅貢獻得到延續全靠本《公禱書》同埋《三十九條信綱》，後面嗰本仲發展成英國聖公會嘅基本教義。