滿地寶
滿地寶（英文：Port Moody；舊譯名「慕迪港」），係加拿大卑詩省嘅一座城市，位於布勒內灣東端。面積25.89平方公里，2011年人口32975人。
名稱
[編輯]市名裡面嘅「慕迪」，係指殖民地時期嘅英軍皇家工程師軍團司令理察·慕迪（Richard Moody）。但係由於「慕迪」同「墓地」發音太相似，唔好意頭，市政府喺1998年啟用咗新嘅中文名「滿地寶」[1]。
歷史
[編輯]滿地寶嘅歷史同兩次歷史事件分唔開：1858年淘金熱潮同1885年橫加鐵路通車。
滿地寶一開始祇係一個人煙稀少嘅定居點。1858年，由於有消息話喺菲沙河谷發現金礦，數以千計嘅掘金人湧入英屬哥倫比亞（大致今日嘅卑詩省）。出於對當時嘅首都新西敏嘅防禦嘅考慮，英屬哥倫比亞政府要求英軍皇家工程師軍團開闢一條從布勒內灣通往新西敏嘅通道（伊條通道今日叫做「北路」），等喺布勒內灣落船嘅軍火可以行伊條路直接去到新西敏。雖然最終無戰爭爆發，但係由於伊條路嘅起點就喺滿地寶，滿地寶開始由定居點發展成小鎮。後來，皇家工程師軍團準備返去英國嘅時候，有啲士兵決定留喺英屬哥倫比亞，其中一個就係理察·慕迪。
1871年，英屬哥倫比亞決定加入加拿大，條件係加拿大要起一條連接英屬哥倫比亞同加拿大嘅鐵路。1879年，加拿大太平洋鐵路宣佈：會將終點站設喺滿地寶，滿地寶咁先至引起大家注意。
從19世紀80年代開始，越來越多人移居滿地寶。佢等希望第日鐵路通咗車之後，滿地寶會變成西海岸嘅一個大都會。1885年11月7日，加拿大太平洋鐵路完工，第二日就有火車開到咗滿地寶。1886年7月4日，第一班固定客車抵達滿地寶，房地產價格開始升高。但係好景不長，1887年，加拿大太平洋鐵路起咗一條又滿地寶通往溫哥華嘅支線，經濟重心同人口亦都開始移去溫哥華。雖然係咁，但係都有人決定留低，其中大部分人都係喺林場做嘢嘅。
1905年，英國帝國石油公司喺滿地寶郊外起咗一座煉油廠。
1913年，滿地寶正式升格做城市，有咗自己嘅市長同市議會。第一任市長係派利·A·魯（Perry A. Roe）。當時嘅滿地寶依然嚴重依賴林業。
二戰之後，滿地寶開始向郊區擴張，同時好多大公司，例如海灣石油（Gulf Oil）、省際鋼鐵（Interprovincial Steel）同太平洋海岸航運（Pacific Coast Terminals），都將總部設喺滿地寶。
「藝術城市」
[編輯]2004年，滿地寶市政府開始打造「滿地寶：藝術城市」伊個品牌。歷史上，滿地寶由於屋租低、環境美、光線夠而吸引咗好多藝術家喺道定居。今日，滿地寶通過藝術節、藝術家組合同多樣化嘅設施來鼓勵藝術創作。
概況
[編輯]人口
[編輯]根據2011年加拿大人口普查，滿地寶嘅人口係32,975人，同2006年普查結果相比上昇19.9%[2]，升幅係大溫地區城鎮最高[3]。
滿地寶嘅家庭收入中位數達到$70,239，係大溫地區城鎮中第四高。市内最大嘅僱主係係鷹嶺醫院和卑詩省第43校區。[4]
交通
[編輯]滿地寶嘅公共交通服務由運輸聯線提供。連接溫哥華市中心同米遜嘅通勤鐵路西海岸快線喺滿地寶設徂個車站，而市内亦都有好多條公車線路。此外，經滿地寶連通高貴林同本拿比嘅溫哥華架空列車長青線捷運喺2012年中期開徂工，暫定通車時間係2016年夏季[5]。長青線將會喺滿地寶市內設兩個車站，分別係慕迪中心站[暫譯]和內灣中心站[暫譯]，當中嘅慕迪中心站會設喺西海岸快線嘅滿地寶中央車站隔離。
滿地寶市内無高速公路，主要東西向幹道係班納公路同聖莊街組成。班納公路同聖莊街曾經係卑詩省7A省道，但係省道資格已經喺2006年取消徂。
參考
[編輯]- ↑ 〈存档副本〉。原著喺2013年7月6號歸檔。喺2014年8月8號搵到。
- ↑ 2011 Community Profiles - Census Subdivision
- ↑ "B.C. population outpaces national growth rate". 喺2012-05-02搵到.
- ↑ City of Port Moody: 2005 Statistical Economic Profile (2005). "City of Port Moody: 2005 Economic Profile" (pdf)[失咗效嘅鏈], Retrieved 08 February 2008.
- ↑ "Information Bulletin: Evergreen Line RFP released" (PDF). British Columbia Ministry of Transportation. 9 November 2011. 原著 (PDF)喺2012年1月5號歸檔. 喺10 November 2011搵到.
