潛行凶間

《潛行凶間》電影海報

《潛行凶間》（英文：Inception），係１齣2010年嘅科幻動作片，由基斯杜化·路蘭編劇同執導，佢同佢老婆愛瑪·湯馬士共同做製片。呢套戲由里安納度·狄卡比奧做主演，佢飾演專門滲透入去目標人物嘅潛意識嚟偷資料嘅專業賊仔，有人畀一筆錢佢去將另一個人嘅諗法植入去目標人物嘅潛意識做代價嚟令佢有機會被抹走佢自己嘅犯罪紀錄。呢套戲群星雲集，包括有渡邊謙、祖瑟夫·哥頓-利域、瑪莉安·歌迪雅、愛略特·比茲、湯·赫迪、施利安·梅菲、湯·貝倫加、迪利普·拉奧同埋米高·堅。

2002年，喺完成咗《白夜追兇》之後，路蘭構思咗１套基於清醒夢嚟做基礎嘅「盜夢者」故仔。諾蘭決定喺處理呢個噉大規模同複雜嘅製作之前需要攞更多嘅經驗，佢暫時擱置咗呢個項目，轉身投入去製作2005年嘅《蝙蝠俠：俠影之謎》、2006年嘅《死亡魔法》，同埋2008年嘅《蝙蝠俠：黑夜之神》。劇本大綱經過咗６個月嘅修改，最終喺2009年2月畀華納兄弟買咗落嚟。《潛行凶間》嘅拍攝橫跨咗６個國家，喺2009年6月19號响東京開鏡，11月22號响加拿大煞科。呢套戲官方預算係$1.6億美金，由華納兄弟同傳奇影業共同出錢。諾蘭嘅名氣同埋憑住《蝙蝠俠：黑夜之神》嘅成功，呢套戲攞到１億美金嘅廣告開支。

《潛行凶間》喺2010年7月8號响倫敦舉行首映，仲喺2010年7月16日起喺傳統戲院同IMAX戲院上映。呢套戲全球票房去到$8.39億美金，成為咗2010年票房第四高嘅電影。

《潛行凶間》被睇成係2010年代其中１套最佳電影，榮獲好多個獎項，包括喺第83屆奧斯卡金像獎上面攞到４項大獎：最佳攝影、最佳混音、最佳音效剪輯同埋最佳視覺效果，仲攞到包括最佳電影、最佳原創劇本、最佳藝術指導，同埋最佳原創音樂嘅４項提名。

2025年，美國國會圖書館憑住《潛行凶間》「喺文化、歷史或美學上有重要意義」而將呢齣戲揀嚟列入去國家電影名錄嗰度保存。

劇情

故仔講述道明·科布同埋亞瑟都係利用實驗性嘅夢境共享技術嚟做商業間諜活動嘅人，簡單嚟講就係潛入去目標人物嘅潛意識嗰度偷情報，做企業間諜噉樣嘅人，佢哋就叫做「抽取者extractor」。佢哋最新嘅客仔係個叫做齋藤嘅人，齋藤對科布可以喺夢入面再套夢再一層一層噉玩嘅能力覺得佢好勁，於是就請佢做一單表面上睇落幾乎冇可能做到嘅任務——唔係偷情報，而係掉返轉頭將１個諗法擺入去人哋個腦（潛意識）度，即係所謂嘅「植入inception」；具體嚟講，齋藤就係要對佢自己嘅競爭對手—莫里斯·費沙個仔羅拔·費沙—要佢潛意識去相信應該要拆散佢老豆間公司嘅諗法。作為交換，齋藤應承會幫科布洗底，畀佢可以返屋企同啲仔女喺埋一齊。

科布接咗呢單job之後組隊：有假扮高手伊姆斯、整藥嘅化學家尤素夫，同埋大學生阿莉亞德妮。阿莉亞德妮嘅任務係負責設計成個夢境結構，呢個係科布自己唔敢做嘅嘢，因為佢好驚自己嘅諗法會畀佢已經過咗身老婆摩兒而搞亂晒成件事。科布嘅團隊喺莫里斯·費沙過咗身之後，佢哋就喺齋藤買咗飛去美國嘅飛機上面用鎮靜劑嚟將羅拔·費沙催眠咗，實現拉咗佢入１個３層共享夢境。每層夢境嘅時間過得比上一層慢好多，而且每一層都要有人留低喺嗰度，等時機到就用音樂—法文歌《不，我毫不後悔》嚟做同步「入睡抽動」嘅「跌墮」動作，一次過嗌醒晒３層夢境裡面嘅人。

團隊喺第１層夢境嘅城市入面綁架咗羅拔，但係團隊成員都唔知嘅係，原來羅拔嘅潛意識裡面係受過訓練而有個防禦機制，預先設定好同能夠預判呢種情況嘅投射，啲路人會全部變晒做保安嚟攻擊佢哋。喺齋藤受咗傷之後，科布喺呢個時候先至透露話，正常喺夢入面死係會嗌醒發夢嘅人，但係尤素夫打咗好重嘅鎮靜劑喺佢哋身上，如果死咗反而會將佢哋跌落去「靈薄獄」：１個無限深嘅潛意識世界，基本上會韞住咗出唔返嚟。伊姆斯扮成羅拔嘅契爺彼得·布朗寧，佢慢慢喺佢潛意識度植入其實佢老豆有份想拆公司嘅第２份遺囑嘅諗法。

科布後嚟向阿莉亞德妮講返佢同老婆摩兒以前嘅嘢：佢哋兩個喺實驗分享夢境嗰陣一齊跌咗落去靈薄獄嘅地方，因為時間膨脹效應，佢哋兩個喺一夜之間過咗成50年（現實中只係一晚）。摩兒喺醒咗之後仍然以為自己仲喺夢入面，佢為咗令自己「醒返」而自殺，仲嫁禍畀科布屈佢謀殺自己嚟逼佢要一齊死。結果科布變咗通緝犯，亦因為噉而留低咗佢啲仔女著草去美國。

返到去任務，當尤素夫揸車帶住團隊喺第１層度周圍兜圈嗰陣，其他人就被鎮靜去到第２層夢境，嗰度係由亞瑟設計嘅一間酒店夢境。科布說服羅拔話布朗寧綁架佢嚟阻止佢拆散公司，而佢自己只係幫佢嘅「防禦性投射」，呢個成功引導到羅拔落到去更深嘅第３層夢境，而呢個係作為入去羅拔潛意識嘅狡猾手段嘅一部分。

團隊喺第３層夢境裡面要潛入一座雪山堡壘，堡壘入面有羅拔嘅老竇—莫里斯嘅投影，真正嘅「植入諗法」就喺呢度發生。不過，因為尤素夫太過早揸車衝落橋嚟發動「跌墮」嘅動作，搞到其他層數嘅夢境要臨時改變計劃—亞瑟同伊姆斯臨時設計咗一套新嘅「跌墜」，佢哋分別喺𨋢同埋堡壘度裝炸藥，令到「跌墮」嘅動作可以同尤素夫衝落到水面嗰刻全部同步去做。摩兒喺呢個時候突然間出現仲射死咗羅拔嚟阻止佢接受植入，羅拔同齋藤跟住就跌咗落去靈薄獄裡面迷失，搞到科布同阿莉亞德妮冇得唔及時落去救佢哋出嚟，嚟等羅拔接受植入儀式同埋伊姆斯去發動「跌墮」嘅動作。科布仲坦白話其實當年係佢令摩兒離開靈薄獄，就喺對方個腦入面種咗個「呢個世界係假嘅」諗法，點知摩兒將呢個諗法帶返嚟現實，搞到摩兒自己後永遠都分唔清現實同夢。摩兒喺靈薄獄嗰度唔肯返番去現實世界，科布亦冇得唔說服佢話呢個只係一場夢，但係就意外噉令佢相信現實世界仍然係一場夢。最後，科布接受咗自己喺摩兒嘅死裡面扮演嘅角色，仲放低咗自己對老婆死嘅內疚。阿莉亞德妮就開槍打散咗摩兒嘅投影，然後用一下「跌墮」嚟嗌醒羅拔。

羅拔喺第３層夢境入面翻生，仲接收咗個植入嘅諗法，佢阿爸囑咐佢要為自己創一番事業，而唔係跟住家族公司。科布就自己落去靈薄獄搵返齋藤，對方嗰陣時已經老晒，仲提醒齋藤話佢哋當初嘅協議；其他人就借助「跌墮」同步返番去現實世界，全部人都喺飛機上面醒返晒，而齋藤就打咗個電話......

最後，科布喺洛杉磯到埗落機之後順利過關，而佢嘅外父就接佢返屋企，科布終於返到屋企見返佢啲仔女。科布為咗測試自己係咪真係喺現實世界裡面，佢最後就攞出自己老婆嘅「圖騰」，嗰個係個會喺夢裡面唔停噉旋轉嘅陀螺嚟做測試，不過佢就冇等結果，而係直接走去攬住啲仔女。

演員

2010年7月，出席電影首映會嘅演員卡士。由左至右：施利安·梅菲、瑪莉安·歌迪雅、祖瑟夫·哥頓-利域、愛略特·比茲、渡邊謙、米高·堅，仲有里安納度·狄卡比奧

• 里安納度·狄卡比奧 飾 道明·科布Dom Cobb，１個專門透過趁目標人物喺睡夢狀態入面思維最軟弱嗰陣潛入去佢哋嘅夢境嚟設置信任騙局去盜取機密資料嘅專業神偷。狄卡比奧第１個喺呢套電影入面係第１個確定嘅演員。根據《荷里活報道》話，畢彼特同韋史密夫兩個都係最初嘅人選，仲攞到呢個角色。不過韋史密夫因為唔理解呢個角色而推咗。Cobb嘅角色被比喻做「哥德式浪漫愛情片入面飽受折磨嘅鰥gwaan1夫」。
• 渡邊謙 飾 齋藤先生Mr. Saito，１個請Cobb去執行團隊任務嘅日本商人。導演喺創作呢個角色嗰陣時就諗到渡邊謙，因為佢想喺《蝙蝠俠：俠影之謎》之後再同佢合作。。《潛行凶間》係渡邊謙第１次以現代嚟做背景，仲用英語做主要語言嘅作品。渡邊試吓喺每個夢境關卡入面強調齋藤唔同嘅性格特質：「第１章係我嘅城堡，我捕捉到一啲關於循環嘅隱藏感受。嗰度充滿魔力，強大無比，然後就係第１個夢。然後返去第２章，喺間舊旅館入面，我覺得自己更加犀利，同埋更加冷靜同聰明，而呢度係有個略略唔同嘅過程去塑造電影嘅任何角色。
• 祖瑟夫·哥頓-利域 飾 亞瑟Arthur，科布嘅拍檔，負責管理同研究任務嘅人。哥頓-利域將亞瑟比喻做科布藝術嘅製作人，「佢會話，『好啦，你有咗你嘅願景；而家我就諗辦法將所有具體細節都落實到位，噉樣你就可以做你嘅嘢嘞』呢位演員除咗其中１場特技戲之外，其餘全部都係親自去完成，仲話準備嘅工作「充滿挑戰，但為咗達到逼真嘅效果一定要噉做」。占士·法蘭高曾經同基斯杜化·路蘭去傾演出亞瑟嘅角色，但係最後因為檔期撞咗而未能成事。
• 瑪莉安·歌迪雅 飾 摩兒Mal，科布已經過咗身嘅老婆，佢係科布對摩兒自殺真正原因所帶嚟罪惡感嘅體現。道明控制唔到關於摩兒嘅投射，呢樣挑戰咗佢作為提取者嘅能力。導演形容摩兒係「致命女郎嘅精髓」，而狄卡比奧就讚歌迪雅嘅演繹，話「佢可以同一刻時間展現出堅強同脆弱、充滿希望同令人心碎嘅複雜情感，呢個完美噉詮釋咗佢個角色嘅所有矛盾之處。」
• 愛略特·比茲 飾 阿莉亞德妮Ariadne，１個受邀去建造各種被形容做迷宮嘅夢境場景嘅建築系研究生。阿利亞德妮呢個名字源自於希臘神話裡面嘅１個公主，佢係米諾斯國王個女，佢曾經幫過英雄忒修斯搵到迷宮，畀咗把劍同一個繩球佢，幫佢能夠喺迷宮裡面導航，令到佢能夠走得出韞住米諾陶爾嘅迷宮。導演話，揀比茲係因為佢係個「新鮮、精明同成熟嘅完美結合」，呢樣嘢喺嗰個年紀嘅人並唔常見。比茲話，佢飾演嘅角色係觀眾嘅化身，因為「佢正喺度學緊呢啲概念嘅諗法，而本質上係幫觀眾去了解共享夢境」。
• 湯·赫迪 飾 伊姆斯Eames，佢係科布嘅１個牙尖嘴利嘅同伴。佢被叫做銷贓者，不過佢嘅專長係偽造，再準確嚟講係身份盜竊。伊姆斯利用佢喺夢境世界入面假扮其他人嘅能力去操縱費沙。赫迪形容佢嘅角色係「一個老派嘅格拉咸格連式嘅外交官；有啲褪色、爛溶溶，但係又帶住幾分高貴—就好似莎士比亞筆下嘅舊情人同英國皇家特種部隊成員嘅混合體」，佢著住「老土、老錢家族式old money」嘅服裝。
• 施利安·梅菲 飾 羅拔·米高·費沙Robert Michael Fischer，佢係１個商業帝國嘅繼承人，亦都係團隊嘅目標人物。梅菲話費沙被形容做「１個好需要佢阿爸大量關注嘅任性細路，佢喺物質上擁有晒一切，但係喺情緒上極度匱乏」。呢位演員仲研究咗梅鐸啲仔，「嚟更好噉詮釋生活喺個咁強大嘅人物個陰影之下嘅感受」。
• 湯·貝倫加 飾 彼得·布朗寧Peter Browning，羅拔·費沙嘅契爺，亦都係也是費沙家族公司嘅另一位高層。貝倫加話布朗寧係費沙嘅「代理阿爸」，費沙叫嗰個角色做「彼得叔叔Uncle Peter」，仲強調「布朗寧成世都同羅拔一齊，而且同佢有質素嘅相處時間可能比佢自己阿爸嘅仲要多。」
• 米高·堅 飾 史提芬·邁爾斯Stephen Miles教授，科布嘅導師兼外父，佢係阿莉亞德妮嘅大學教授兼向團隊推薦對方。
• 迪利普·拉奧 飾 尤素夫Yusuf。拉奧將尤素夫形容做「１個前衛藥理學家，佢係個好似科布噉樣嘅人力資源，佢哋想喺冇人監督、未有註冊，同埋未經任何人批准嘅情況下開展呢項工作嘅人提供幫手」。聯合製片人佐敦·歌德堡Jordan Goldberg話，化學家嘅角色「尤其有挑戰性，因為你唔想令佢睇起上嚟成個毒販噉」，而拉奧之所以被揀中，係因為佢「風趣幽默、引人入勝，而且明顯係好聰明」。
• 盧卡斯·哈斯 飾 拿殊Nash，科布請返嚟嘅建築師，佢出賣咗成隊人，後來畀阿莉亞德妮取代咗。
• 妲露娜·萊莉 飾 １個叫做金髮女郎Blonde嘅女人，伊姆斯喺夢入面扮成佢。萊莉就算戲份唔多不過佢好鍾意呢個角色：「我可以著條靚裙，喺酒吧裡面勾搭吓男人，然後將佢哋推入𨋢裡面。演一啲成年人角色嘅感覺好好，平時我都係做啲15歲嘅英國學生妹。」
• 彼特·保士圖伏維特 飾 莫里斯·費沙Maurice Fischer，羅拔·費沙嘅阿爸，１個商業帝國垂死嘅創辦人。

製作

愛瑪·湯馬斯同埋基斯杜化·路蘭答有關《潛行凶間》嘅問題。呢個夫妻檔透過佢哋嘅公司Syncopy嚟製作呢套戲。路蘭亦都係呢套戲編劇同導演。

最初，基斯杜化·路蘭寫咗篇長到80頁關於盜夢者嘅劇本大綱。路蘭原本諗住將《潛行凶間》構思做１套恐怖片，就算佢發現「傳統上，呢類電影喺情感方面係非常刻意噉流於表面」，所以最後都係將呢套戲寫成套搶劫片。喺重新睇返佢份劇本嗰陣時，因為呢個故仔「非常之依賴內心嘅狀態、夢境嘅諗法同埋記憶嘅概念」，所以佢意識到將故仔設定喺呢個流派嚟做基礎係行唔通嘅。我意識到我需要提升情感上嘅衝擊力。」

路蘭喺創作劇本上面花咗９-１０年。當路蘭最初開始諗去拍呢套戲嗰陣，佢受到例如係1998年嘅《移魂都市》、1999年嘅《廿二世紀殺人網絡》同《十三度凶間》，仲有2000年《凶心人》嘅呢啲「嗰個時代電影嘅影響」。呢啲戲都係基於你身處嘅世界可能唔係真實嘅原則嚟拍嘅。

路蘭早喺2001年就向華納兄弟提出咗《潛行凶間》嘅構思，但係佢認為自己需要製作更多大型製作電影嘅經驗，於是轉去執導咗2005年嘅《蝙蝠俠：俠影之謎》同埋2008年嘅《蝙蝠俠：黑夜之神》。佢好快就意識到好似《潛行凶間》呢類戲需要大筆嘅預算，因為「一旦涉及到夢境，人類思維嘅潛能係無限嘅。所以套戲嘅規模一定要畀人有一種無限嘅感覺。喺套戲完嗰陣，你一定要覺得你可以去任何地方，而且呢套戲一定要喺宏大嘅規模入面運作。」喺拍完《蝙蝠俠：黑夜之神》之後，路蘭決定拍《潛行凶間》，仲用咗半年時間去完成劇本。路蘭話完成劇本嘅關鍵係喺度諗如果幾個人發埋同一個夢會發生啲咩事。「一旦你剝奪咗私隱，你就創造咗無限噉多個平行宇宙，喺呢啲宇宙入面，啲人可以做有意義嘅互動，呢啲互動係有真實性、分量，仲會產生戲劇性嘅後果。」

路蘭噉多年嚟一直都想同里安納度·狄卡比奧合作，亦都同佢見過幾次面，不過直到《潛行凶間》之前都冇辦法成功邀請對方演出任何一套佢自己嘅電影。狄卡比奧憑住「畀呢個概念深深吸引——呢個盜夢概念嘅構思，同埋呢個角色點樣解鎖佢嘅夢境世界，最後影響佢現實嘅生活」而最後同意演出。佢睇咗個劇本，覺得個劇本「寫得非常好好，好全面，但你真係要基斯親身去試吓更好噉去理解一啲佢喺過去８年嚟一直喺腦海度諗緊嘅嘢。」狄卡比奧同路蘭用咗好幾個月嘅時間嚟傾劇本，路蘭為咗「確保佢（狄卡比奧）個角色嘅情感歷程係電影嘅驅動力」而用咗好長時間嚟重寫劇本。2009年2月11號，據宣布華納兄弟買咗路蘭創作《潛行凶間》 嘅待售劇本。

拍攝地點同布景

主體拍攝喺2009年6月19號响東京開拍，第１場戲係齋藤喺直升機飛越東京上空嗰陣時第１次請科布做嘢嘅場面。

劇組將拍攝地點移師去到英國，喺倫敦北邊貝德福德郡卡丁頓嘅一個改建過嘅飛艇機庫嗰度開拍。劇組喺嗰度搭建咗個傾斜30°嘅酒店酒吧佈景。另外，美術指導佳·亨德斯·戴亞斯、特效總監基斯·科博爾德，同埋攝影指導禾利·費士達仲搭建咗１條酒店嘅走廊；呢條走廊可以360°旋轉嚟營造第２層夢境嘅場景入面重力方向交替嘅效果，夢境扇區嘅物理定律喺嗰度會變得好混亂。呢個諗法嘅靈感嚟自史丹利·寇比力克嘅1968年電影《2001太空漫遊》。路蘭話：「我有興趣嘅係將呢啲理念、技巧同哲學運用喺動作場景入面。」電影製作人原本計劃將走廊淨係做40英尺（12米）噉長，但係隨住動作場面每日漸漸噉複雜，走廊嘅長度加到去100英尺（30米）。走廊沿住８個大型同心環嚟懸掛喺度，呢啲環距離相等噉樣分佈喺走廊牆出面，仲由兩部大型電動摩打嚟供電。

飾演亞瑟嘅祖瑟夫·哥頓-利域花咗幾個禮拜嘅時間喺個好似「巨型倉鼠轆」噉樣旋轉嘅走廊度去學打交。路蘭講到呢個裝置話：「呢樣嘢就好似某啲令人難以置信嘅刑具噉樣；我哋折磨咗祖瑟夫好幾個禮拜，但最後我哋睇咗啲片段，發現呢啲嘢睇落完全唔似我哋之前見過嘅任何嘢。呢啲嘢嘅節奏係獨一無二嘅，就算你知道呢啲嘢係點樣拍，但當你睇嗰陣時，呢啲嘢都會擾亂你嘅認知而搞到你觀感混亂。呢啲嘢用咗一種奇妙嘅方式嚟令人不安。」哥頓-利域回憶話：「嗰個真係連續６日，每晚返屋企都攰到散晒......天花板上面啲燈具會喺地板上面周圍轉，而你一定要揀啱時機嚟穿過佢哋，如果唔係就會跌落去。」2009年7月15號，劇組喺倫敦大學學院拍咗故仔入面發生喺巴黎建築學院裡面嘅場景，包括圖書館、佛拉斯曼畫廊Flaxman Gallery，同埋古斯塔夫·塔克劇院Gustave Tuck Theatre。

拍攝地點跟住轉到去法國，佢哋喺嗰度拍咗科布入去建築學院（地點係用咗巴黎時尚博物館嘅入口）、阿莉亞德妮同科布喺間餐酒館裡面嘅關鍵場面（係喺塞薩爾·法蘭克街Rue César Franck同埋布舒街Rue Bouchut虛構嘅轉角位），仲有最後嘅就係喺比爾哈基姆橋上面拍。對於當地政府唔會畀用真正嘅炸藥，小酒館場景裡面嘅爆炸場面就用咗高壓氮嚟製造一系列爆炸嘅效果。攝影指導禾利·費士達用咗６部高速相機由唔同角度捕捉呢一系列嘅鏡頭，嚟確保拍得到佢哋要嘅畫面。視覺特效部門加入咗更多嘅破壞同飛濺嘅碎片嚟加強呢個系列嘅場面。對於「巴黎摺疊Paris folding」嘅場景同埋阿莉亞德妮「創造」橋樑嘅場景嗰陣，劇組喺現場用咗綠幕同埋電腦特效去做。

科布請咗伊姆斯同尤素夫嘅地方，係喺摩洛哥嘅丹吉爾用嚟做蒙巴薩取景嘅地方。有場追逐戲喺歷史悠久嘅麥地那老城區嘅街道同巷仔裡面拍攝。為咗捕捉呢段戲，費士達採用咗結合手提攝影機同斯坦尼康嘅拍攝手法。丹吉爾呢個地方亦都被用嚟做拍攝最初進攻入到去齋藤思維嘅重要騷亂場景地點。

拍攝地點後來轉到去洛杉磯地區，部分場景喺華納兄弟攝影棚裡面搭建出嚟，包括齋藤嘅日本城堡嘅內部房間（外景就係喺加州馬里布海灘搭建嘅小型佈景上面拍嘅）。餐廳嘅設計靈感係嚟自起喺1603年左右歷史悠久嘅二條城。呢啲布景嘅靈感融合咗日本建築風格同西方元素嘅影響。

劇組喺洛杉磯市中心拍咗場多車追逐戲，其中有架貨運列車衝過馬路中間。為咗去拍呢場戲，電影製作人喺架拖拉機拖車嘅底盤上面裝咗個火車引擎。呢架複製品係嚟自由真實火車零件上面拆落嚟嘅纖維玻璃模嚟整成，仲喺顏色同設計上面都力求還原。另外，追車戲原本設定喺暴雨裡面做，但係洛杉磯嘅天氣仍然一如既往噉晴朗。為咗令觀眾有種陰雨綿綿同濕濕哋嘅假象，電影製作人精心設計咗複雜嘅特效裝置（例如係屋頂上面嘅水砲）嚟營造呢個效果。洛杉磯亦都係呢套戲高潮位嘅拍攝地方，在這場戲中，一架福特Econoline麪包車用慢動作嘅方式嚟衝落斯凱勒海姆大橋。根據演員迪利普·拉奧嘅講法，呢場戲係斷斷續續噉樣拍咗幾個月，而架貨車係用大砲發射出去。用慢動作嚟拍攝啲演員被懸掛喺貨車裡面足足嘥咗成日嘅時間。

當架麪包車跌咗落水之後，啲演員面對嘅挑戰就係避免驚過​龍​唔​知點​算。施利安·梅菲解釋話：「而當佢哋叫你做戲嗰陣，呢個係個有啲要求嘅事」。啲演員要喺水底４-５分鐘，同時喺潛水氣缸度呼吸；呢段戲騷咗水底下嘅同伴呼吸技術。

最後嗰個階段嘅主體攝影係喺2009年11月底喺亞伯達嗰度進行。外景經理發現咗個暫時閂咗嘅滑雪勝地—堡壘山。劇組嘥咗３個月嘅時間喺加拿大空中纜椅頂站附近搭建咗個精細嘅佈景。劇組冇得唔等一場大雪，而呢場暴雪最終都如期噉嚟到。滑雪追逐戲嘅靈感嚟自路蘭最鍾意占士邦嘅1969年電影《鐵金剛勇破雪山堡》：「我最鍾意嘅係，我哋喺呢套戲入面試吓模仿嘅係，嗰套動作喺規模、浪漫、悲劇同埋情感之間達到咗完美嘅平衡。」

攝影

呢套戲主要係用35毫米電影菲林嘅變形格式嚟拍，重點場景就用65毫米電影菲林，而空中拍攝場景就用VistaVision嘅格式。路蘭冇好似《蝙蝠俠：黑夜之神》噉樣用IMAX鏡頭嚟拍任何片段：「我哋唔覺得我哋會因為鏡頭嘅大細而可以用IMAX去拍，鑑於呢套戲處理嘅係個潛在嘅超現實區域、夢境嘅本質等等，我想呢啲嘢盡可能噉真實。就算我非常鍾意呢種格式都好，我都唔想畀IMAX相機嘅晒士綁住。」另外，路蘭同費士達仲測試咗Showscan同埋Super Dimension 70用嚟拍電影做潛在大畫率同高幀率嘅格式。

慢動作鏡頭係用Photo-Sonics 35毫米相機以高達每秒1,000幅嘅速度嚟拍攝。禾利·費士達曾經試吓用高速數碼攝影嚟拍一啲鏡頭，但係發現呢種格式因為技術故障而唔太可靠。佢話：「喺我哋用數碼格式嚟拍嘅６次入面，淨係得１個可以用，而且最後都冇用喺電影裡面；而我哋用Photo-Sonics相機同埋35毫米菲林拍攝嘅６次入面，每一個鏡頭都出現喺電影裡面。」

路蘭亦都揀咗唔用3D形式嚟拍呢套戲，因為佢更加傾向鍾意用定焦鏡頭喺菲林上面嚟拍，而呢１點係3D相機冇辦法實現嘅嘢。路蘭亦都批評過3D投影所產生嘅暗淡影像，仲反駁咗傳統電影菲林冇辦法畀到景深感知嘅講法，佢話：「我認為用『3D』同『2D』嚟區分電影係個唔恰當嘅用詞。電影影像嘅意義就係喺呢樣嘢係立體嘅...你知啦，我哋95%嘅景深感知都係嚟自遮擋、解像度、顏色等等，所以將套2D電影叫做「2D電影」呢個諗法係有些少誤導。」路蘭喺後期製作入面確實測試過《潛行凶間》嘅將套戲轉成3D格式，但係最後佢決定，雖然行得通，但係佢唔夠時間去完成轉換嚟達到去佢滿意嘅標準。2011年2月，莊拿芬·利比士文建議華納兄弟試吓將3D格式轉換成藍光光碟嚟發行。

電影裡面大量噉採用咗交叉剪輯手法，禾利·費士達為咗幫觀眾去識別故仔裡面嘅地點，佢喺每個場景同夢境關卡都賦予咗獨特嘅視覺風格：雪山上面嘅堡壘顯得冷峻同肅穆，而酒店嘅走廊有溫暖嘅色調，而麪包車裡面嘅場景就更加中性。

路蘭話呢套戲「探討咗現實嘅層次同埋對現實嘅感知，呢個係我好有興趣嘅話題。呢個係１套以當代世界嚟做背景但係又略略帶啲科幻感嘅動作片」，同時佢又將呢樣嘢形容做「１套結構有啲似劫盜片嘅合奏電影，呢個係１套跨越全球嘅冒險動作片」。

視覺特效

路蘭喺《潛行凶間》嘅夢境場景入面好少用到電腦特效，盡可能噉採用實景特效。路蘭話：「對我嚟講，喺鏡頭入面做盡量多嘅嘢係非常重要嘅，如果有需要嘅話，電腦特效可以用嚟喺你實際攞到嘅成就上面建立或者增強係非常之有用」。視覺特效總監保羅·富蘭克林製作咗雪山堡壘場景嘅微縮模型，然後喺戲裡面將嗰度炸冧。對於喺零重力環境之下發生嘅打鬥場面，佢用咗基於電腦特效嘅技術嚟「巧妙噉扭曲物理定律、空間同埋時間呢啲元素」。

最有挑戰性嘅特效係電影結尾嘅「靈薄獄」城市層次，因為嗰度喺製作過程入面不斷噉演變。富蘭克林畀啲藝術家去畫概念圖，而路蘭就表達咗佢理想嘅構思：「有啲類似冰川噉樣嘅景象，有清晰嘅現代主義建築風格，不過又好似有塊冰山噉嘅嘢一塊塊噉樣崩斷跌落海」。富蘭克林同佢嘅團隊最後呈現出嘅效果係「個類似穿梭水流之間嘅冰山版葛咸城」。佢哋最先創造咗個冰川嘅基本模型，然後啲設計師創造咗個加咗啲路、十字路口同埋峽谷等等元素嘅程式，最後形成咗個複雜而又充滿自然有機氣息嘅城市景觀。對於折疊巴黎嘅場景，富蘭克林叫啲藝術家去畫概念草圖然後佢哋創作咗粗略嘅電腦動畫，畀佢哋去知道嗰個場景喺動態嗰陣嘅效果係點樣嘅。後來喺主體拍攝階段，路蘭能夠根據富蘭克林整嘅呢啲粗略嘅電腦動畫嚟指導狄卡比奧同比茲嘅演出。《潛行凶間》有接近500個視覺特效鏡頭（相比之下，《蝙蝠俠：俠影之謎》大概有620個），呢個數字同當代特效電影去比相對少啲，因為佢哋可以有多到去2,000個視覺特效鏡頭。

音樂

内文：潛行凶間電影原聲大碟

《潛行凶間》嘅配樂係由漢斯·森馬作曲同編曲，為咗配合返科布喺成套戲裡面嘅感受，佢將自己嘅作品形容做充滿「懷舊同悲傷」嘅「非常之電子化同濃鬱」嘅配樂。呢啲音樂同電影嘅拍攝同步去寫嘅，而且有一種令人聯想到由The Smiths嘅前結他手莊尼·馬爾演繹艾尼奧·摩列干尼嘅結他音色。伊蒂·琵雅芙嘅歌《不，我毫不後悔》貫穿晒成套戲，用嚟準確噉計算夢境嘅時間，森馬仲改編咗對歌曲嘅部分片段融入落去配樂裡面。呢張電影原聲專輯喺2010年7月11號由Reprise唱片公司發行。大部分配樂亦都以高解析度嘅5.1聲道環繞聲嘅形式收錄喺兩碟藍光套裝嘅第２隻光碟入面。漢斯·森馬嘅配樂喺2011年入圍奧斯卡金像獎最佳原創音樂，但最後輸咗畀《社交網絡》嘅特倫特·雷澤諾同阿提克斯·羅斯。