瀦龍河

出自維基百科,自由嘅百科全書
Jump to navigation Jump to search
座標: 38°49′20.5″N 115°53′48.2″E / 38.822361°N 115.896722°E / 38.822361; 115.896722
瀦龍河
豬龍河、蟾河、楊村河、高陽河、布里河
Flag of the People's Republic of China.svg 中國
省/州/邦 河北省
保定市衡水市
安國市安平縣博野縣蠡縣高陽縣安新縣
屬於 大清河
源頭 磁河河口
 - 位置 中國保定安國
 - 座標 38°19′12.8″N 115°21′39.1″E / 38.320222°N 115.360861°E / 38.320222; 115.360861
河口 白洋澱
 - 位置 中國保定安新
 - 座標 38°49′20.5″N 115°53′48.2″E / 38.822361°N 115.896722°E / 38.822361; 115.896722
長度 80.5千米(50哩,161里)
闊度 1.8千米(1哩,4里)
流域面積 8,600 km²(3,320 mi²
長度、闊度、流域面積數據出自[1]。其中闊度取最大値。河源、河口等地理信息可查[2]

瀦龍河(瀦讀豬,粵拼zyu1 lung4 ho4),又寫豬龍河,係位於中國河北嘅河,屬大清河水系,係南支大清河最大嘅行洪河道[1],大體位於保定轄地內。瀦龍河係由三條河合流形成,主流係大沙河(沙河),喺安國一帶同磁河小清河(孟良河)合流後就叫瀦龍河,合流位置喺安平北郭村上游[1],其中最後滙入嘅磁河河口喺安國軍詵村北面。之後向東北流,流過安平北部、博野蠡縣高陽,最後喺劉李莊滙入白洋澱中嘅馬棚澱(又有講法喺東白莊、郝家莊入澱,因爲條河改過多次河道)[3]。當中從北郭村到白洋澱嘅河道長80.5公里,流域面積8600平方公里,條河闊800~1800米[1]

根據記載,歷史上瀦龍河原本係磁河(滋河)、大沙河、唐河合流而成,但喺清嘉慶六年(1801年),唐河發洪災,改咗河道,從定州向北遷移,經望都、清苑、安新,自己入白洋澱,而孟良河攞走唐河嘅舊河道,變成而家三河合流嘅局面[3][4]。喺更早時期,呢帶水系有好唔同嘅面貌,《山海經》時代呢度係古黃河嘅水脈,戰國中期先脫離黃河,形成獨自水系;之後相當長時間,磁河(滋水)、大沙河(泒水)係屬滹沱河水系,到宋代開始磁河脫離滹沱河,元代以後唐、沙、磁三河合流局面成型,就有咗現時嘅面貌,因爲元明之後當地水土流失嚴重,條河多次決堤、改道,根據改咗嘅河道,安過好多名[5]

[編輯]

瀦龍河嘅名有段古,根據明清地方志同民間傳說,話喺上古顓頊時,有豬化爲龍,條龍變成呢條河,所以就叫豬龍河,後來寫成瀦龍河[6]。瀦龍河舊河道之上嘅龍化就係根據呢個傳說而得名[7]

有種講法話,「豬化龍」其實係「瀦化瀧」,意思係「平靜嘅澤水變爲水勢急嘅河流」[6]。但根據《康熙字典》,「瀧」解「急流」係「南人名湍曰瀧」[8],換言之呢個係南方話,而瀦瀧河流域係華北地區;清代《畿輔通志》當中係寫「豬龍河」,冇三點水嘅,而且重畀咗另一解,話「豬龍」係轉化自「伏龍」,所以呢種講法可能唔係好可靠[6]

有觀點認爲,瀦龍河流過嘅高陽就係顓頊高陽氏嘅地望,而瀦龍河係顓頊出世地。根據史料,話顓頊嘅母系係蜀山氏,而佢喺若水出世,部份史家認爲噉表明顓頊喺四川雅礱江出世。根據呢個睇法嘅攷據,蜀山氏唔係話佢喺四川(蜀),而係通假,通做「涿」,蜀山即涿鹿山,喺河北;而古代若同桑係同一字,若水即係桑水,桑水即係瀦龍河上游地帶,所以顓頊有可能就出世喺而家瀦龍河流域[7]

瀦龍河有多個名。喺博野又叫蟾河sim4 ho4),喺蠡縣又叫楊村河joeng4 cyun1 ho4),喺高陽又叫高陽河gou1 joeng4 ho4),因爲順治年間曾經喺布里村決口,所以又叫布里河bou3 lei5 ho4[4][9]

水利[編輯]

大清河嘅水系分南北兩支,其中滙入白洋澱嘅都係南支,而瀦龍河係南支當中最大嘅行洪河道。瀦龍河兩邊嘅河堤都要防洪,其中右堤叫做千里堤,長189公里,係河北四條一級堤防之一,呢條河堤好緊要,係用來保住冀中平原免受洪災嘅屏障。佢嘅左堤次要啲,係三級堤防[1]

瀦龍河比較多沙,又係季節性河流,所以佢嘅河床淤積幾嚴重,有比較大嘅防洪壓力。所以1957年喺左岸嘅陳村起咗固定嘅分洪口,整咗條28公里長、1500米闊嘅陳村分洪道,以左堤爲主堤,設計流量1500 m³/s,不過過咗咁多年嘅淤積,過水能力同瀦龍河一樣低過從前。爲咗保住千里堤,按照洪水調度,當陳村水位超過19.1米兼持續上漲時,啟用陳村分洪道排洪;若果繼續漲,就喺仉村臨時分洪;若果繼續漲到19.7米,就會喺陳村以上、瀦龍河左堤嘅董莊、呈各莊附近分洪;如果噉都緩解唔到汛情,就會另揀其他地方開口分洪[1]

除咗防洪,又有其他水利工程。瀦龍河本身有青穿瀦幹渠穿過,可以引水灌溉;佢上游嘅河源亦有啲水庫,其中磁河上游有橫山嶺水庫,位於靈壽岔頭馮溝村附近;大沙河上游有王快水庫,位於曲陽鄭家莊西面;大沙河嘅支流郜河口頭水庫,位於行唐口頭。呢三個水庫都用來防洪、灌溉、發電用[1]

[編輯]

  1. 1.0 1.1 1.2 1.3 1.4 1.5 1.6 "大清河水系概況". 新華網河北頻道. 2006年7月11號. (原先內容喺2011年9月17號歸檔). 喺2015年11月30號搵到. 
  2. "天地圖". 中華人民共和國國家測繪地理信息局. 喺2015年11月30號搵到. 
  3. 3.0 3.1 "瀦龍河". 保定地方志. 2013年2月18號. (原先內容喺2016年3月4號歸檔). 喺2015年11月30號搵到. 
  4. 4.0 4.1 "白洋澱上游九河溯源". 保定日報. 2009年11月29號. (原先內容喺2013年12月29號歸檔). 喺2015年11月30號搵到. 
  5. 石超藝 (2013年3月6號). "歷史時期大清河南系的變遷研究──兼談與白洋澱湖群的演變關係". 中國歷史地理論叢. 中國經濟史論壇. 喺2015年11月30號搵到. 
  6. 6.0 6.1 6.2 "抬頭看見龍故事". 趙燕都市報. 搜狐滾動. 2012年2月19號. 喺2015年11月30號搵到. 
  7. 7.0 7.1 "顓頊高陽氏考釋". 保定日報. 2013年12月29號. 喺2015年11月30號搵到. 
  8. "瀧的解釋". 《康熙字典》. 漢典. 喺2015年11月30號搵到. 
  9. "志二十九 地理一". 清史稿. 保定府……博野疲…東南:豬龍河自安平緣界入,一曰蟾河,屈南逕白塔村入蠡……蠡繁難…南:豬龍河自博野入,一曰楊村河……高陽簡…東南:豬龍河亦自蠡入,順治中,復決布里村,故亦曰布里河