灰熊山極速礦車

出自維基百科,自由嘅百科全書
Jump to navigation Jump to search

灰熊山極速礦車英文Big Grizzly Mountain Runaway Mine Cars)係香港迪士尼樂園灰熊山谷入面嘅遊樂設施,故事講述喺1888年8月8日,乘坐極速礦車向礦洞進發嘅時候,經過起伏不平嘅道路,被一隻背癢嘅灰熊改寫旅程,改為一條通往礦洞外嘅危險斜路。途中礦車將會喺主山峰停一吓再倒後行,呢個遊樂設施係香港迪士尼樂園第二座過山車。

資料[編輯]

灰熊山谷極速礦車,路軌全長一點一公里,玩大概三分鐘,穿越成個景區。樂園話礦車已經進行過超過一千個鐘嘅安全測試;就算遇到突發事件,五至八分鐘就會有演藝人員去協助疏散賓客,兩至三個鐘就可以重新開放[1]

故事場景[編輯]

  1. 從灰熊山採礦公司出發,原本礦車要行嘅係8號洞,金礦熊爸爸(Rocky)因為拗背脊撞到一個轉轍器,令路軌通往4號,礦洞外嘅斜路。
  2. 當礦車上到灰熊山嘅最高點,纜索突然斷裂,礦車突然就急速倒墜。
  3. 倒後行之後礦車再次停落嚟,抵達炸藥庫,兩隻灰熊唸住偷走庫入面嘅魚穫,金礦熊寶寶(Nuggets)就唔小心撳咗炸藥掣。
  4. 因為撳咗炸藥掣,礦車就好快咁爆發之後就再次向前衝。
  5. 最後抵達灰熊山採礦公司。[2]

灰熊山谷小知識[編輯]

  1. 「灰熊山谷」嘅主要地標「灰熊山」高27米,總面積達到5,497平方米。
  2. 製作團隊每建造一個立方米嘅山石,就需要用到700公斤嘅水泥。所以,「灰熊山」總共需要3,850噸水泥,亦即係153,916包水泥。
  3. 務求令「灰熊山」睇落更雄偉,製作團隊精心計算每一個細節嘅最佳比例,同埋運用視覺錯覺嘅手法;將離賓客較近嘅景物以1:1原大表現,並且將遠處嘅景物縮細,就令「灰熊山」望落更為巨大。
  4. 建構「灰熊山谷」嘅另一個最大挑戰,就係喺打造山石嘅時候必須忠於地理邏輯。為咗配合「灰熊山谷」嘅尋金故事嘅背景,製作團隊細心考究真實嘅地理狀況,並喺「灰熊山」建構咗無數嘅金礦礦脈,同其他山石形態一脈相連。
  5. 為打造最真實嘅西部曠野景緻,幻想工程師仔細咁參考咗人類喺1888年之前用過嘅各種採礦工具,務求令每一個小細節都更逼真。
  6. 「灰熊山谷」嘅山石工程非常細緻。製作團隊要將雕工所需嘅細緻程度分為四個等級,根據實際需要將整個主題區嘅不同區域再加以區分,從而更有效分配雕刻同繪畫工作,令每個區域嘅景物都細緻像真。
  7. 為咗畀賓客見到最真實嘅觀感,製作團隊喺動土前特別製作咗1:100同埋1:50嘅模型,並且就石刻嘅整體造型以及繪畫作仔細研究。
  8. 製作團隊更特登複製局部地區以及14款「灰熊山谷」內景材樣板。呢啲團隊觀察實物嘅細節。同時,團隊更為灰熊山研發出一種全新嘅石材同繪畫方法。
  9. 雕刻團隊總共用咗14個月嘅時間,精心雕刻咗面積約13,000平方米嘅石材。

安全設施[編輯]

全長一點一公里嘅路軌總共裝咗500個安全感應器,號稱係全球最多,一旦系統啟動緊急煞停遊戲車廂,近百個賓客可以沿車軌隔離嘅平台同梯級,喺20分鐘之內全部疏散逃生,唔使驚半天吊。香港迪士尼工程服務經理江鏡泉話全條路軌穿梭整個「灰熊山谷」,由於行走範圍廣,當遇上緊急情況,樂園演藝人員將會分5隊出發疏散賓客,相信可以極少需要出動消防協助。佢提到新設施採多項雙重保障措施,例如路軌安全感應器以「一對對」咁運作,其中一個偵察對方喺0.2秒間無回應,包括樹葉遮擋,就會發出警報;礦車車轆裝上雙倍螺絲,再加保護罩,防止鬆脫。另外,負責推動礦車上山嘅鎖車扣亦係特別訂造「無縫」鋼,更安全耐用。喺月台附近嘅路軌磁力煞車系統,可確保減低車速返回車站。香港迪士尼遊樂設施及賓客服務總監陳志華亦都話,樂園已經累積試車超過1,000個鐘,期望可以喺6月中獲機電工程署正式批文。[3]

參考[編輯]

  1. 迪士尼灰熊山谷下周開幕 東方日報. 2012年7月4日.
  2. 灰熊山谷:攀越熊峰 互聯網檔案館歸檔,歸檔日期2012年3月21號,. Hong Kong Main Street Gazette. 2011年2月24日.
  3. 迪士尼灰熊山谷 增安全措施 東方日報. 2012年6月1日.

睇埋[編輯]

出面網頁[編輯]