犀照 (電影)
呢篇文講一部電影。想搵同名嘅其它條目描述嘅話，請睇犀照 (搞清楚)。| 犀照 49 Days | |
|---|---|
| 資料明細 | |
| 導演 | 林健龍 |
| 監製 | 徐小明 李鳳鳴 |
| 編劇 | 方世強 馬嘉慧 |
| 主演 | 馮德倫 鐘欣桐 張茜 黃浩然 吳天瑜 |
| 製片商 | 驕陽電影有限公司 |
| 片長 | 93分鐘 |
| 產地 |  香港 |
| 上畫同發行 | |
| 上畫日期 | 2006年2月16號 |
| 發行商 | 安樂影片有限公司 |
| 分級 | |
| 香港電影分級 | 第ⅡＢ級 |
犀照（英文：49 Days）係一部2006年上映嘅港產片，係有線集團屬下驕陽電影有限公司嘅第一部電影作品。犀照係一部奇幻片，由林健龍導演，馮德倫、鍾欣桐、張茜、黃浩然、羅莽同吳天瑜主演。2006年2月16號喺香港上映。
劇情大綱
[編輯]故事發生喺1930年代，闊少劉誠（馮德倫飾）帶住幾名鄉間兄弟到省城開辦藥店「仙草堂」。正當生意上咗軌道，突然一場大火燒晒成間藥店，眾兄弟一個個被大火奪去性命。而放火嘅真兇就係劉誠最信任嘅助手彭四（黃浩然飾）。彭四為咗謀奪劉誠祖業，去誣陷劉誠放火殺人，令劉誠成為兇手。
劉誠喺獄中遇上年青女律師小芊（鍾欣桐飾），小芊竭力為劉誠洗脫罪名，四圍搵有利人證不果，恍惚間遇到一紅衣女子蘇絲，話可以證明劉誠唔係兇手，但終審嗰日就苦等唔到佢出庭，劉誠最終被判死刑。行刑前，劊子手大喝一聲：「一走之後莫回頭。」條繩竟然斷開，劉誠於是逃脫，同小芊返咗家下。但祖屋已荒廢，劉妻小惠（張茜飾）終日坐住唔郁，個女靈芝行為詭異，成日點着犀牛角蠟燭行動。一日，一個男子嚟劉宅搵劉誠，靈芝唔肯告知劉誠下落，男子留低一個地址，交代靈芝轉達劉誠。小芊以為差人上門追緝劉誠，就決定返省城尋找有利證據，為劉誠翻案。
劉誠送小芊到碼頭上船返省城，咁啱遇到返鄉下嘅彭四，劉誠於是一路跟蹤，竟然發現彭四告訴鄉人劉誠放火燒死一齊去省城打拼嘅同伴，劉誠怒火中燒，衝上前想教訓彭四，但連揮數拳都穿過彭四身體，佢先至明白自己已經死咗。當晚劉誠依照字條搵到日前搵佢嘅男人，竟然係佢嘅劊子手，佢至知原來嗰時劊子手第一刀先將佢嘅魂魄拍離身體，令佢能夠脫離束縛返鄉下。呢個時候小芊返到仙草堂遺址，俾水缸裏面嘅紅衣女子（蘇絲）拉入水缸，小芊極力掙扎後驚醒，至知道原來嗰日退庭後，佢失足跌落路上坑洞，就一直昏迷，但因為屋企人確實喺仙草堂水缸發現蘇絲遺體，令佢確信昏迷期間所經歷嘅嘢係真嘅。
劉誠由劊子手口中得知自己喺陽間徘徊嘅日子無多，就教個女靈芝煎葯畀小惠食，點知竟然因此得知原來佢老婆喺佢死前數日就自殺死咗，女兒亦喺佢返屋企嗰日就知佢已經唔喺人世，至會點犀牛角蠟燭以便見到死咗嘅阿爸阿媽。呢個時候，彭四潛入劉宅捉住靈芝逼問房契下落，彭四得手後，正想殺靈芝嗰時，小芊及時趕到救走靈芝，而彭四就失手將自己殺死。
最後劉誠將靈芝託付小芊之後，放棄轉世為人嘅機會，決心前往惡鬼道搵小惠。