玉置浩二

玉置浩二
男歌手
原文名	玉置 浩二
羅馬拼音	Koji Tamaki（たまき こうじ）
國籍	日本
出世	(1958-09-13) 1958年9月13號 日本北海道旭川
職業	創作歌手 填詞 作曲家 編曲家 演員
音樂類	搖滾樂 鄉村音樂 民謠搖滾 J-pop
演奏樂器	人聲歌唱 結他 貝斯 爵士鼓 電子琴 敲擊樂器
活躍年代	1973年—2008年 2009年—
經紀公司	Sony Music Records自主品牌Saltmoderate、環球唱片（日本）
網站	saltmoderate.com （日文）
相關團體	安全地帶

玉置浩二（粵拼：juk6 zi3 hou6 ji6；1958年9月13號—），係日本知名男歌手、演員，搖滾樂團「安全地帶」主唱。喺北海道旭川神居町出世，身高177公分、血型A型。所屬經紀公司係Sony Music Records自主品牌Saltmoderate。

音樂事業

1973－1993

1973年組成流行搖滾樂團「安全地帶」。1981年以井上陽水伴奏樂團嘅身份，去東京發展並喺第二年正式出道。之後以「酒紅色的心（ワインレッドの心）」「戀愛的預感（恋の予感）」「向悲傷說再見（悲しみにさよなら）」等幾首歌紅咗。1986年以電影「普魯士藍的肖像（プルシアンブルーの肖像）」首次挑戰戲劇演出。1987年出第一隻個人單曲「All I Do」。1993年「安全地帶」解散後，專心發展個人演藝事業，參與過慈善募款而成立嘅音樂團體「USED TO BE A CHILD」。

百萬金曲「田園」

1996年，佢為自己做主角嘅電視連續劇「教練（コーチ）」所編寫嘅主題曲「田園」好受歡迎、所以受邀喺嗰年年尾嘅紅白歌唱大賽演出。但伴奏並唔係採用原本合作嘅樂團、而係嗰時同屬Sony Music Entertainment唱片公司嘅樂團TOKIO，喺歌詞頻頻出錯嘅情況下收視率仲有成59.9%、破咗歌手類別嘅最高收視率紀錄。雖然1996年依日本公信榜嘅調查「田園」銷售紀錄係92.4萬張、但喺紅白歌唱大賽嘅演出播放之後，銷售量又再次上升。結果「田園」係佢個人同團體作品入面，第一張銷售量破百萬張嘅歌。

1997－

1998年同女星藥師丸博子離婚後，搬去長野縣輕井澤，改簽唱片公司BMG FUN HOUSE。2002年，又簽返唱片公司Sony Music Entertainment，「安全地帶」亦喺活動中止約十年後再次展開活動。2004年，因開設個人經紀公司アンクルオニオン而再次停止「安全地帶」活動，專心發展個人事業。

2008

2008年停止所有活動，為佢急性胰腺炎養病。

2010

「安全地帶」恢復音樂活動，3月出新單曲「蒼いバラ」。之後重搞巡迴演唱會「完全復活」。

2017

「安全地帶」喺12月9號夜晚香港亞洲國際博覽館搞出道35周年紀念演唱會，吸引成8,000個港日樂迷入場支持。