甘泉香港航空
甘泉香港航空（全名甘泉香港航空有限公司，英文：Oasis Hong Kong Airlines）係香港一間長途航空公司，喺2005年2月成立，以香港國際機場為基地。佢哋喺2006年10月26號（遲咗1日）開辦來往香港同倫敦嘅長途客運航班，並且計劃喺2007年初開辦更多航線去歐洲同埋美國。甘泉香港航以低價機票作招徠，經營模式同廉價航空公司相似。
甘泉香港航空嘅創辦人係牧師李卓民同佢老婆（基督徒會嗌師母）李黃慧恂，而行政總裁就係香港另外一間航空公司港龍航空嘅創辦人之一，同時亦都係港龍第一位行政總裁苗禮士。
甘泉香港航空而家有兩架波音747-400客機（編號：B-LFA、B-LFB），2006年初由甘泉航空嘅姊妹公司Oasis Growth & Income Ltd公司向新加坡航空購買，再由甘泉香港航空承租，而第三架客機將會喺短期內付運。
但係甘泉航空喺2008年4月9號開記者會話佢哋夾埋蝕咗成10億港幣，並喺嗰日開始停飛，至於買咗飛嘅旅客，公司會盡量搵其他航空畀機位佢哋。管理層又話佢哋已經搵緊投資者買起成間甘泉航空。
