用自然語言作為編程語言

用自然語言作為編程語言（英文：natural language programming）喺好早已經有人認為係一種理想，但係截至2017年，除咗一啲嘅領域特定語言之外，研究人員都搵唔到任何用冇限制嘅自然語言作為編程語言嘅系統。有學者認為用自然語言其實唔係好事，因為數學都係改用符號先有重大進展，所以用自然語言編程反而會係一種倒退。

有啲人認為只要隻編程語言類似自然語言，就已經可以算係用自然語言作為編程語言；如果接受呢個定義，文言編程語言可以算係呢種編程語言嘅一個例子。但係有人覺得咁只係 ｢自然化嘅編程｣（naturalistic programming），並唔係用自然語言作為編程語言。