白表居屋第二市場計劃

出自維基百科,自由嘅百科全書
  呢篇文講嘅唔係白居易

白表居屋第二市場計劃英文White Form Secondary Market Scheme),簡稱白居二,係香港房屋委員會(房委會)轄下嘅居者有其屋(居屋)嘅一項計劃。喺有呢個計劃之前,未補地價嘅居屋單位只能夠轉讓畀綠表(符合資產要求,又可以交出公屋單位)人士。而呢個計劃就將買未補價單位嘅資格擴展到白表(符合資產要求,但無公屋單位交出)人士。

歷史[編輯]

2010年代初期,香港樓價係噉升,有好多中低收入嘅家庭都買唔到樓,喺社會強烈要求下,房委會喺2013年同2015年兩次推出擴展居屋第二市場到白表買家嘅臨時計劃,容許獲配額嘅合資格白表申請者畀錢同房委會或者香港房屋協會(房協)申請白表資格「購買資格證明書」後,可以喺房委會嘅「居屋計劃第二市場」或者房協嘅「住宅發售計劃第二市場」自己搵同買未補價單位。2013年同2015年兩輪計劃分別有5000個同2500個配額,最終兩輪計劃夾埋約莫有4000位白表申請者買到單位。

房委會檢討過臨時計劃之後,喺2017年11月30號決定將計劃恆常化,每年都會推出,但一樣會有配額限制:

  • 2018年嘅配額有2500個,包括2250個家庭申請者配額同250個一人申請者配額
  • 2019年嘅配額有3000個,包括2700個家庭申請者配額同300個一人申請者配額
  • 2020年嘅配額有4500個,包括4050個家庭申請者配額同450個一人申請者配額

申請資格[編輯]

  • 家庭或者一人都申請得。
  • 申請截止嗰日夠18歲,喺香港住滿7年(唔受附帶逗留條件限制)。
  • 總收入同資產限額要符合居屋申請資格。
  • 由申請截止嗰日之前24個月起,直到簽訂臨時買賣合約嗰日,申請者同佢家庭成員唔可以擁有或者同人共同擁有任何香港住宅樓宇。
  • 申請者同佢家庭成員都無接受任何房屋資助。

參考[編輯]