石燕子

出自維基百科,自由嘅百科全書
Jump to navigation Jump to search

石燕子1920年1986年9月9號 [1]),原名麥志勝香港大戲電影男演員

新派武狀元,文武兼備,擅長做傳統排場戲目,1930年代成名,40至50年代喺舞台上紅極一時,喺香港拍咗好多武俠電影同粵劇電影。70年代佢同老婆任冰兒嘅燕新聲劇團係香港頗有威望嘅猛班,喺紀錄片《六國大封相》可一睹佢武狀元嘅風采。

雖然石燕子年紀比何非凡後生兩歲,但何非凡都拜佢為師學藝,嗌他做師父,羅家寶亦曾經係佢旗下演員。不過1980年代佢喺香港電台《紅伶訴心聲》專訪節目入邊曾經評價,話何非凡同羅家寶都淨係專注唱腔,忽略粵劇喺表演各方面演、打、翻、唸等五功、五法藝術。

石燕子晚年嗜好騎術同國畫,生活多彩多姿。1986年7月24號,石燕子同朋友打蔴雀後,因突發性腦中風送入九龍伊利沙伯醫院[2],其後轉送聖德肋撒醫院。入院第一個星期重清醒,同探病嘅朋友傾到偈,粵劇名伶任劍輝白雪仙多次探望。第二個星期後病情惡化,每日處於半昏迷狀態,左邊身亦癱瘓,直到9月9號上晝9點45分病逝,終年66歲。9月12號喺九龍殯儀館佛教儀式出殯,隨即奉柩葵涌政府火葬場火化。

參考[編輯]

  1. "石燕子逝世 生前韻事多有一子一女". 華僑日報第五張第一頁. 1986年9月10號.  (繁體中文)
  2. "五十年代大紅星 石燕子暈迷住醫院". 華僑日報第四張第一頁. 1986年7月27日.  檢查日期值喺: |date= (詳情); (繁體中文)

出面網頁[編輯]