穆罕默德·達烏德·汗

穆罕默德·達烏德·汗 سردار محمد داود خان
阿富汗共和國第1任總統
任期 1973年7月17號－1978年4月28號
前任	穆罕默德·查希爾·沙阿 （阿富汗國王）
繼任	穆罕默德·塔拉基（阿富汗民主共和國革命委員會主席團主席）
阿富汗王國總理
任期 1953年9月7號－1963年3月10號
前任	沙阿·馬茂德·汗
繼任	穆罕默德·優素福
個人資料
出世	(1909-07-18)1909年7月18號 阿富汗王國喀布爾
死	1978年4月28號(1978-04-28)（68歲） 阿富汗共和國喀布爾
政黨	國家革命黨
配偶	薩米娜·貝金
仔女	7位，包括：杜克哈奈
父母	穆罕默德·阿茲·汗（老豆）
親屬	穆罕默德·查希爾·沙阿（堂細佬）

薩德·穆罕默德·達烏德·汗（普什圖文：سردار محمد داود خان‎，1909年7月18號—1978年4月28號），多數人會叫佢做達烏德·汗，係阿富汗政治人，響1953年至1963年出任總理。佢響1973年發動政變，推翻時任國王穆罕默德·查希爾·沙阿，出任阿富汗共和國第一任總統。佢響1978年嘅四月革命入面被暗殺。

生平

達烏德響喀布爾出世，係巴拉克宰王朝成員，係外交官穆罕默德·阿茲·汗個仔，穆罕默德·納弟·沙阿嘅侄仔。佢響法國讀書，1929年返阿富汗後響喀布爾軍事學院讀書。佢先後出任國防部長、內政部長、阿富汗駐法國、瑞士、意大利大使、中央軍團司令。

1933年，穆罕默德·阿茲·汗響德國柏林畀人暗殺。

1953年，佢畀堂細佬穆罕默德·查希爾·沙阿任命為阿富汗總理，接替沙阿·馬茂德·汗。同親美嘅馬茂德唔同，達烏德親蘇，一上台就同蘇聯打好關係，亦因為同蘇聯關係密切而畀人叫「紅色親王」。佢多次要求蘇聯軍事援助阿富汗。雖然係咁，佢依然冇放棄走中間路線，曾經接受過嚟自美國嘅資助。

佢雖然手段殘忍，但依然努力令阿富汗現代化，支持婦女解放、拋棄舊習同埋教育普及化。

「杜蘭線」，一條劃定咗巴基斯坦同阿富汗嘅邊界線，將呢到嘅普什圖人區域一分為二，東面屬於英屬印度（1947年後屬巴基斯坦），西面就屬於阿富汗。1947年印巴分治之後，當地嘅普什圖人表示唔想畀巴基斯坦統治，要建立另一個國家。阿富汗嘅支持令到巴基斯坦好嬲，跟住就係外交衝突，巴基斯坦更加三次封鎖邊界。咁啱呢件事發生響達烏德執政時代，而佢又係個民族主義者，所以佢為咗向巴基斯坦施加壓力而單方面關咗邊境，令到本身運去巴基斯坩嘅貨物路線斷咗。貨物賣唔出就自然蝕錢，達烏德只好求蘇聯幫助，同蘇聯越走越近，亦因咁傷害到阿富汗嘅唔結盟地位。國王查希爾因而親自出面炒咗達烏德，宣佈總理一職由穆罕默德·優素福繼位。響1964年，查希爾修改憲法，唔畀王室成員參政，作為王室成員嘅達烏德被迫退出政壇。

但達烏德並未心死，佢認為查希爾缺乏領導能力，又覺得議會阻住真正嘅進步。佢計劃發動政變。

1973年7月17號，達烏德趁住查希爾訪問意大利期間發動政變，建立共和制政府。同年8月1號，佢組成新內閣，一人身兼四職：總統、外交部長、國防部長同埋最高經濟委員會主席。內閣成員入面好多都係新人，兼且係阿富汗人民民主黨成員。

1975年，佢將阿富汗中央銀行國有化，同年訪問多個中東國家。響對外，佢繼續加深同蘇聯、美國兩國嘅友好關係，同時又保持距離。達烏德響後期開始企圖減少對蘇聯嘅依賴，加強同美國嘅關係，亦開始壓制包括人民民主黨響入面嘅左派勢力。

1977年，佢成立新黨「國家革命黨」，取代阿富汗人民民主黨。蘇聯批評達烏德嘅行為，因為佢哋擔心阿富汗投靠美國。呢個舉動亦激起人民民主黨嘅不滿。

1978年，達烏德為咗清除國內左派勢力，下令要捉人民民主黨嘅塔拉基、卡爾邁勒、阿明、潘吉舍里等領導人。阿明下令潛伏響空軍嘅成員發動政變。4月27號，人民民主黨發動政變，因為達烏德錯判形勢，所以叛軍好快就打入總統府，同支持總統嘅守衛隊打仗。響混戰入面，達烏德同佢大部份屋企人都死咗。4月28號，人民民主黨宣佈接管政府。

雖然達烏德當初響1973年發動嘅政變令到阿富汗呢幾十年嚟深受戰爭摧殘，但有人依然認為佢係自1973年之後最好嘅領導人。

2008年，佢同佢屋企人嘅屍體響Pul-e-Charkhi 監獄畀人發現。2009年3月17號，阿富汗政府幫達烏德國葬，佢唯一生存落嚟嘅仔杜克哈奈（Durkhanai）亦有出席。