穆罕默德·查希爾·沙阿

出自維基百科,自由嘅百科全書
跳去導覽 跳去搵嘢
穆罕默德·查希爾·沙阿
King Zahir Shah of Afghanistan in 1963.jpg
1963年攝
阿富汗國王
在位1933年11月8號 – 1973年7月17號
加冕1933年11月8號
前任穆罕默德·納弟·沙阿
繼任職位廢除

配偶胡梅拉·貝金
子嗣
  • 比奇絲·貝金公主
  • 穆罕默德·阿克巴·汗
  • 艾哈邁德·沙阿王儲
  • 瑪麗文·貝金公主
  • 穆罕默德·納第·汗
  • 沙阿·艾哈邁迪·汗
  • 穆罕默德·達烏德·普什圖亞·汗
  • 米·韋士·汗
家族巴拉克宰王朝
父王穆罕默德·納弟·沙阿
母后馬赫(Mah Parwar Begum)
出世1914年10月15號
出世地 阿富汗喀布爾
2007年7月23號(2007-07-23)(92歲)
死地 阿富汗喀布爾
簽章
宗教伊斯蘭教遜尼派

穆罕默德·查希爾·沙阿波斯文:محمد ظاهرشاه‎,1914年10月15號2007年7月23號),係阿富汗末代國王,1933年11月8號至1973年7月17號在位。

查希爾響1933年登基,係巴拉克宰王朝入面在位時間最長嘅國王。響佢統治嘅四十年之間,佢同好多國家建立友好關係,帶領阿富汗現代化,係阿富汗最後嘅穩定時期。

不過佢嘅改革惹起好多人嘅反對,最終響1973年,前總理穆罕默德·達烏德·汗趁住查希爾去意大利期間發動政變,建立阿富汗共和國,廢咗查希爾,查希爾響8月宣佈落台。

跟住佢響意大利流亡接近三十年。最終響2002年返到阿富汗,5年之後響喀布爾過身。

家族同早年[編輯]

查希爾1914年10月15號響喀布爾Deh Afghanan出世,屬於普什圖族杜蘭尼家族德拉爾分支,係穆罕默德·納弟·沙阿同馬赫(Mah Parwar Begum)嘅大仔,祖先蘇丹穆罕默德·汗·德拉爾(Sultan Muhammad Khan Telai)係前阿富汗國王多斯特·穆罕默德汗(Dost Mohammed Khan)嘅兄弟。當時佢只係巴拉克宰王朝嘅王室成員。佢老豆納弟·沙阿,由印度流亡到阿富汗[a],1903年開始出任國王軍近衛騎兵團指揮官,以出色嘅軍事才能留響國王身邊,響1919年嘅第三次英阿戰爭入面帶住阿富汗獨立。

查希爾細個響哈比比亞高中附屬嘅Elementary 小學讀書,啲堂多數用英文教。之後佢升讀Amaniya高中(即依家嘅Centre d'Enseignement Français en Afghanistan),啲堂多數用法文教。後嚟因為老豆出任阿富汗駐法國大使,佢因而到法國留學,先係入讀詹森薩伊中學,跟住響巴士德研究所蒙比利耶大學學嘢[1]。1929年,響讀完書返阿富汗後,佢入讀喀布爾一間步兵軍校。

國王生涯[編輯]

1930年代,查希爾著住軍服影嘅一張相

1933年11月8號,老豆納弟·沙阿畀人暗殺而死,只有19歲嘅查希爾繼位做國王。響最初,佢將政府都交畀佢嘅叔叔穆罕默德·哈西姆·汗同沙阿·穆罕默德·汗打理,而呢兩位叔叔都曾經出任總理[2]

同年,佢就重建咗同初阿曼諾拉汗起嘅女校,恢復咗好多阿曼諾拉汗嘅措施[3]

1934年,阿富汗加入國際聯盟,兼且得到美國嘅承認。同時阿富汗同好多國家達成貿易協議,包括軸心國德國意大利日本

雖然阿富汗同軸心國關係唔錯,但佢響二戰期間並冇表態支持定反對,令到阿富汗成為響二戰時期少數可以保持中立嘅國家。響1944至1947年之間,阿富汗經歷咗一系列嘅部落起義。在此之後,查希爾認為阿富汗需要做出改變、要更加現代化,所以佢搵嚟一班外國顧問嚟協助佢嘅改革。

查希爾大力吸收西方文化,定立新憲法,將阿富汗由君主制改為君主立憲制,加入選舉、議會、公民權婦女權同埋普選權[3],使阿富汗成為民主國家。佢又起咗好多學校,而喀布爾國際機場就係響佢任內起嘅。

佢響冷戰時期同時要求美國同蘇聯提供金錢上嘅援助,係少數同時接受敵人同敵人資助嘅國家。

佢唔單止畀女人接受教育,可以著襯衫、短裙、有投票權,響1977年嗰陣阿富汗女性國會議員嘅人數仲多過當時嘅美國[4]。佢被認為係一位相對溫和嘅國王,響佢在任期間,佢從來都冇因為政治原因而授權執行死刑。

響1969年嘅一次訪問上,查希爾話:「我唔係一位資本家。但我都唔中意社會主義。我唔想要嗰種令到捷克斯洛伐克咁嘅局勢嘅社會主義。我亦都唔想成為蘇聯、中國或者其他國家嘅僕人。」不過由於佢響外交上奉行中間主義,所以佢同中國、蘇聯關係唔差,兩國嘅高官曾經多次訪問阿富汗,而阿富汗亦曾經支持中國恢復響聯合國嘅代表權。

查希爾嘅改革一方面的確令阿富汗更加現代化,同時亦激起各地方部族嘅反對,成日都有軍事抗爭。

流亡[編輯]

內文:1973年阿富汗政變

查希爾任內經歷過幾位總理,其中佢堂大佬、以親蘇嘅穆罕默德·達烏德·汗(Mohammed Daoud Khan)最為重要。達烏德因為唔接受杜蘭線,為咗向巴基斯坦施加壓力而單方面關閉邊境,令到經濟變差,達烏德要求蘇聯幫助,亦因咁傷害到阿富汗嘅唔結盟地位。查希爾因而親自出面炒咗達烏德,仲修改憲法唔畀王室成員參政。作為國王嘅堂大佬,達烏德自然就要離開政壇。

但達烏德並未心死,佢認為查希爾缺乏領導能力,又覺得議會阻住真正嘅進步。咁啱響七十年代初,阿富汗經濟開始走下坡,又發生咗天災,開始有人支持達烏德。最終響1973年7月17號,達烏德趁住查希爾去意大利醫隻眼嘅期間發動政變,建立共和制政府。同年8月,查希爾正式宣佈退位,結束自己四十年嘅國王生涯。最初佢老婆胡梅拉·貝金畀達烏德政府軟禁,後嚟先畀人送去意大利同查希爾會合[1]

響跟住落嚟嘅29年入面,查希爾一直流亡意大利。達烏德一直都有畀錢佢,呢筆錢係嚟自前王室嘅資金同莊園。直至1978年達烏德畀人推翻,阿富汗人民民主黨上台,就唔再畀錢佢。

查希爾一直響羅馬北部Via Cassia嘅別墅入面生活,響嗰度佢成日捉棋、打高爾夫、或者打理下花園。因為人民民主黨政府唔再畀錢佢,所以伊朗國王巴列維就出錢援助佢,而巴列維更加資助埋查希爾兩個仔出外國讀書嘅錢。響七十年代尾,人民民主黨政府唔畀查希爾返阿富汗。1979年,蘇聯入侵阿富汗,查希爾開頭並冇出聲;直至到1983年,查希爾秘密咁計劃建立流亡政府,但最後因為佢冇辦法同強大嘅伊斯蘭派系達成共識,所以計劃就算數。亦有人話,印度、蘇聯等國家曾經希望講點查希爾,畀佢返阿富汗出任一個中立、可能係臨時政府嘅阿頭;美、蘇兩國都有派人同佢見面,而阿富汗時任總書記穆罕默德·納吉布拉亦支持呢個決定,認為咁樣可以求到和平。但亦有人指,查希爾根本就冇心玩政治嘢。1990年5月,查希爾通過美國之音BBC,呼籲阿富汗人民團結同埋和平。據講呢點引起阿富汗人嘅興趣同支持,但呢個企圖恢復政治地位嘅舉動引起一啲激進伊斯蘭教政治人嘅不滿,就好似古勒卜丁·希克馬蒂亞爾

1991年,一個扮成葡萄牙記者嘅人想攞刀暗殺查希爾,不過失敗。響親蘇政府落台之後,好多人都希望查希爾能夠返阿富汗、建立一個君主制國家,而巴基斯坦三軍情報局就係反對嘅,佢哋驚查希爾響杜蘭線上嘅立場。1995年,國王嘅前代表Sardar Wali話查希爾會參加談判去完咗個阿富汗戰爭、但始終冇共識。

回國[編輯]

2004年12月7號響哈米德·卡爾扎伊嘅宣誓儀式上面,查希爾坐響最右手邊

2002年,即塔利班政府(阿富汗伊斯蘭酋長國)落台後,查希爾響美國嘅支持下、坐意大利軍機返到首都喀布爾,當時佢已經係一位87歲嘅老人家。佢返到阿富汗後受到好多人嘅支持,有人仲提議恢復君主制。同年6月,佢叫嚟各部落嘅阿頭,開一次支爾格大會。據傳,會上大部份部落阿頭都支持查希爾做返國王,諗住重新建立阿富汗王國;不過咁樣,美國所支持嘅臨時政府領袖哈米德·卡爾扎伊就唔可以做國家元首。響呢個時候,查希爾就出嚟講:「如果支爾格大會最終投票支持我做國家元首,我會接受。但我並唔打算恢復君主制,唔稀罕國王呢個銜頭。我更加中意啲人叫我做Baba[b]。」據知,佢所講嘅嘢同美國有關[3]

查希爾最終揀咗支持哈米德·卡爾扎伊,而卡爾扎伊響出任阿富汗總統之後就尊佢為「阿富汗國父」,代表住佢響阿富汗歷史上身為民族團結象徵嘅角色,所做嘅貢獻。2002年8月,查希爾搬到阿格住,而阿格係查希爾做國王嗰陣住嘅王宮。

[編輯]

查希爾嘅陵墓

老咗之後嘅查希爾,身體開始越嚟越差。2002年10月訪問法國期間,佢唔小心響沖涼房入面跌親,傷咗肋骨。2003年6月佢到法國醫病期間,佢又整傷股骨。2004年2月,由於佢一直呻自己個腸胃有問題,所以佢由喀布爾坐機到印度新德里醫病。三個月後,佢因為鼻出血而畀人送到阿聯酋一間醫院。同年12月,佢出席卡爾扎伊嘅宣誓儀式。

響生命最後嘅幾年,佢身體好差,要咪高峰裝響佢件衫,啲人先至聽到佢把聲。2007年1月,有媒體指佢已經病得好犀利,瞓響張床上面。最終佢無耐就走咗,終年92歲。卡爾扎伊響國家電視台公佈咗佢嘅死。而佢嘅葬禮就響7月24號響總統府搞,好多政治人都有出席。而棺材一開頭放響一座清真寺,之後葬響喀布爾東部嘅皇家陵園。

評價[編輯]

啲人會叫佢統治嘅四十年做「Decade of democracy」[5]

私生活[編輯]

個人[編輯]

查希爾鍾意影相、玩國際象棋同埋食雪茄。據指,佢係一個怕醜、謙虛同埋「講野把聲好柔和」嘅人。

佢除咗識達里話(佢嘅母語)同普什圖話之外,仲識講英文法文

屋企[編輯]

1931年11月7號,佢響喀布爾娶咗自家表妹胡梅拉·貝金,佢哋有六個仔兩個女:

出世
比奇絲·貝金公主英文Princess Bilqis Begum (1932-04-17) 1932年4月17號(90歲)
穆罕默德·阿克巴·汗英文Muhammed Akbar Khan, Crown Prince of Afghanistan王儲 1933年8月4號 1942年11月26號(1942-11-26)(9歲)
艾哈邁德·沙阿·汗王儲英文Ahmad Shah Khan, Crown Prince of Afghanistan (1934-09-23) 1934年9月23號(88歲)
瑪麗文·貝金公主英文Maryam Begum (1936-11-02) 1936年11月2號(85歲)
穆罕默德·納第·汗王子 (1941-05-21) 1941年5月21號(81歲)
沙阿·艾哈邁迪·汗王子 1946年11月15號 2002年12月7號(2002-12-07)(56歲)
穆罕默德·達烏德·普什圖亞·汗王子 (1949-04-14) 1949年4月14號(73歲)
米·韋士·汗王子 (1957-01-07) 1957年1月7號(65歲)

[編輯]

  1. 第一次英阿戰爭入面,納弟嘅阿爺葉海亞·汗畀英國軍捉住,送到英屬印度做戰俘,所以納弟係響英屬印度出世。佢哋直至1901年先畀時任國王阿布杜·拉曼·汗接返嚟。
  2. 「Baba」,意指「老豆」、「先生」,係波斯文嘅一個尊稱

[編輯]

  1. 1.0 1.1 "The last King and Queen of Afghanistan". Royal Central (英國英文). 2021-08-28. 喺2022-02-24搵到.
  2. "The last King and Queen of Afghanistan". Royal Central (英國英文). 2021-08-28. 喺2022-02-24搵到.
  3. 3.0 3.1 3.2 Howard, Harry (2021-08-31). "King of Afghanistan championed women's rights before coup in 1973". Mail Online. 喺2022-02-24搵到.
  4. 為何女性都怕塔利班?上世紀阿富汗婦女還可穿短裙上街 現變奴隸當戰利品獻給聖戰士. tw.news.yahoo.com (中文). 喺2022-02-19搵到.
  5. Feroz, Emran. "When Afghanistan Almost Worked". Foreign Policy (美國英文). 喺2022-02-24搵到.